आइसोलेसनमा मृत्यु भएका बाबुरामकाे परिवारका सदस्यकाे स्वाब अझै परीक्षण गरिएन

आइसोलेसनमा मृत्यु भएका बाबुरामकाे परिवारका सदस्यकाे स्वाब अझै परीक्षण गरिएन

A+ A A-

बुटवलको धागो कारखानामा रहेको कोरोना विशेष अस्पतालमा गत १६ चैतमा मृत्यु भएका बाबुराम थापाको परिवारका सदस्यले अझै पनि स्वाब परीक्षण नगरेको पाइएको छ । कोरोनाको आशंकामा १३ चैतमा आइसोलेसन भर्ना भएका बाबुरामकाे ३ दिनपछि अथार्त १५ चैत दिउँसो मृत्यु भएको थियो ।

६ चैत दुबईबाट नेपाल आएका उनी १३ चैतसम्म परिवारका साथमा बसेका थिए । आइसाेलेसनमा मृत्यु भएको ९ दिनसम्म पनि परिवारका कुनै पनि सदस्यको स्वाब परीक्षण नभएको पाइएको हो ।

२ छोरा र श्रीमतीसँग ७ दिन बाबुराम साथमै बसेका थिए ।

कोरोनाको आशंकाका आइसाेलेसनमा भर्ना भएका बाबुरामको मृत्यु भए पनि उनको नतिजा भने नेगेटिभ आएको थियो । तर, परिवार र छिमेकी एवं आफन्त रिपोर्ट नेगेटिभ आए पनि अझै शसंकित छन् ।

९ दिनदेखि लुम्बिनी प्रादेशिक अस्पतालमा थापाको शव छ । परिवारका सदस्यले डाक्टरको लापरबाहीले बाबुरामको मृत्यु भएको भन्दै शव उठाउन मानेका छैनन् ।

शव उठाउने विषयमा आज पाल्पाली समाज रुपन्देहीका अध्यक्ष पदम कार्की, मानवअधिकारकर्मी विनोद पहाडी, होटल तथा रेष्टुरेन्ट व्यवसायी संघ रुपन्देहीका अध्यक्ष समुन्द्र जिसीले सामाजिक विकासमन्त्री सुदर्शन बरालसँग भेट गरी जनाकारी गराउँदा परिवारका कुनै पनि सदस्यको स्वाब अहिलेसम्म पनि जाँच नगरिएको थाहा भएकाे हाे ।

पाल्पाली समाज रुपन्देहीका अध्यक्ष पदम कार्कीले स्वाब परीक्षण पहिल्यै गर्नुपर्नेमा अहिलेसम्म नगरिएकाे पाइएकाले यसमा मन्त्रालयको ध्यानाकर्षण गराइएकाे बताए ।

परिवारका सदस्यहरूको स्वाब परीक्षण नगरिँदा अन्य छिमेकी पनि डराएका छन् ।

६ चैतमा दुबईबाट नेपाल आएका बाबुराम थापालाई हल्का ज्वरो आएपछि सैनामैना मुर्गियास्थित एक फार्मेसीबाट औषधि लिएर सेवन गरेका थिए । तर, ज्वारो आउन कम नभएपछि उनी १३ चैतमा अटो रिक्सामा लुम्बिनी प्रादेशिक अस्पतालमा पुगेको र ज्वराे आएपछि उनलाई धागो कारखानामा रहेको आइसाेलेसन अस्पतालमा पठाइएको थियो । तर ३ दिन पछि उनको उपचारका क्रममा मृत्यु भएको थियो ।

२५ लाख क्षतिपुर्ति माग

आइसाेलेसनमा मृत्यु भएका बाबुराम थापाको शव नउठेपछि पाल्पाली समाज रुपन्देहीले शव उठाउने विषयमा पहल गरिरहेको छ । दुई पटक सम्म मृतक थापाको परिवार संग समाजले छलफल गरेको थियो ।
छलफलमा परिवारका सदस्यहरूले २५ लाख क्षतिपुर्ति दिनुपर्ने, निष्पक्ष छानविनका लागि समिति बनाउनुपर्ने र दोषि चिकित्सकलाई कारबाही गर्नुका साथै छोराहरू र परिवारलाई सरकारले रोजिरोटीको व्यवस्था गर्नुपर्ने बताएपछि उक्त प्रस्ताव लगेर आज समाजका अध्यक्ष सहितको टोली सामाजिक विकास मन्त्री सुर्दशन बराल संग छलफल गरेको थियो । छलफलमा क्षतिपुर्ती सरकारले दिने कुनै पनि ठाउ नरहेको र दिन नमिल्ने सामाजिक विकास मन्त्री सुदर्शन बरालले बताएका थिए ।

२ छोराहरूलाई उच्च शिक्षा पढाउन मन्त्रालयले लिखित रुपमै प्रतिबद्धता जनाउन तयार भएको तर क्षतिपुर्तिको रकम बारे भने दिन नसक्ने मन्त्रालयको तर्फबाट धारणा आएको समाजका अध्यक्ष पदम कार्कीले बताए । मृतक बाबुरामकी श्रीमती रिता थापालाई सैनामैना नगरपालिकाले रोजगार दिन नगरपालिकाको तयार भएको समेत बताइएको छ । तर क्षतिपुर्तीको रकमले ठोस निर्णय अहिले सम्म नभएको अध्यक्ष कार्कीको भनाई छ ।

मृतक बाबुराम थापाका सहदोर दाजु पाल्पा रिब्दिकोटमै रहेका छन् । १५ दिन अघि मात्र भारतबाट घर आएका उनी क्वारेन्टाईनमै रहदा समाजले कुराकानी गरेको थियो । श्रीमती रिता थापाले माईती पक्ष र घर तर्फले गरेको सम्झौता अनुसार शव उठाउन सकिने बताउँदै आएकी छिन् ।

शव उठाउनै डर छ

पिडित परिवारले माग गरे अनुसार परिवारलाई रोजगारी, छोराहरूलाई उच्च शिक्षाको जिम्मा स्थानिय सरकारले ल्याएपनि बाबुरामको शव कसरी उठाउने भन्नेमै दाजुभाईहरू बीच अन्यौल देखिएको पारिबारिक स्रोतले बताएको छ । कोरोनाको आशंकामा अस्पतालमा भर्ना भएका बाबुरामको स्वाब परीक्षणमा नेगेटिभ आएपनि कोरोनाकै कारण मृत्यु भएको हुन सक्ने डरले शव उठाउन, लैजान र त्यसलाई जलाउन दाजुभाईनै अघि सर्न सकेका छैनन् । कोरोनाकै डर र भएले बाबुरामको मृत्यु हुँदा आइसाेलेसन अस्पतालमा आइएकी श्रीमती रितालाई पनि पानी दिने समेत मानिसहरू थिएनन् । घरमा पुग्दा पनि सान्त्वना दिने र समाल्ने न छिमेकी थिए न त दाजुभाई नै । कोरोनाको डरले शव लैजान समेत दाजुभाईले अप्ठयारो मानेको परिवारले बताएको छ ।

प्रकाशित मिति: सोमबार, चैत २४, २०७६ २०:४७