भ्रष्टाचारीलाई कारबाही गर्न किन सकिएन सरकार ?

A+ A A-

चीन समृद्ध र सफल हुनको मुख्य कारण त्यहाँका नागरिक इमानदार र अनुशासित भएको हुनाले मात्र हो । आज विश्वमा महामारीको रूपमा फैलिँदै गएको कोरोनाको लडाइँ पनि चीनले लगभग जितिसकेको अवस्था छ । बाँकी देशहरूले पनि चीनबाट पाठ सिक्ने कि ?

आज विश्वका २ सय ५ भन्दा बढी देशहरू कोरोनाको संक्रमणबाट आक्रान्त भएको भयावह परिस्थितिमा पनि किन चीनको वुहान शहरमा भन्दा अन्य ठूला शहरहरू साङ्घाई, बेइजिङ, ग्वान्जाओलगायतका शहरमा किन फैलिन सकेन भन्ने आश्चर्यजनक कुरा छ । अनुशासन र इमानदारी नै त्यसको मुख्य कारण हो ।

नेपालको परिवेशलाई हेर्दा सम्झिन पनि लाजमर्दो छ । सरकारका कर्मचारीलगायत जिम्मेवार निकायहरू भ्रष्टाचार गर्नमै लुछाचुँडी गर्दै छन् । विडम्बना त यही हो नेपालमा । दुई तिहाइ लगभगको कम्युनिस्ट सरकार छ । नेता धनी अनि देश गरिब छन् ।

स्वास्थ्य सामग्री खरिद प्रकरणमा करोडौँ रुपैयाँ घोटाला भएको भन्ने खुलासा हुँदा पनि के तिनीहरूलाई कारबाही हुँदैन र सरकार ? के दिनभर कुल्ली काम गरेर बेलुका छाक टार्ने जनताले बालबच्चा भोकै हुने अवस्थामा सामल खोज्न जाँदा ढाड सेकिने गरी कुटपिट गर्नु अथवा २ पैसा कमाएर गुजारा गर्न छिमेकी मुलुकमा गएका नागरिकलाई सीमा क्षेत्रमा छेकेर अलपत्र पार्नु मात्र सरकारको जिम्मेवारी हो र ? उनीहरूलाई सीमा क्षेत्रमा उचित स्वास्थ्य परीक्षण गरी सुरक्षित स्थानतिर पठाउने व्यवस्था गर्न सकिन्थ्यो नि होइन र ?

समस्या नेपालको मात्र होइन, अस्ट्रेलियामा बसोवास गर्दै आएका हजारौँ नेपालीसमेतलाई त्यहाँको सरकारले आफ्नै देशमा फिर्ता जान सुझाव दिएको छ । तीमध्ये ६० हजारभन्दा बढी पढ्न गएका नेपाली विद्यार्थीहरू छन् । यस विषयलाई गम्भीरतापूर्वक विचार गर्नुपर्ने हो कि सरकार ? अस्ट्रेलिया जस्तै विश्वका धेरै राष्ट्रमा छरिएर रहेका नेपालीहरूको अवस्था के कस्तो छ ? तिनीहरूलाई उद्धार गर्नुपरे के कस्तो तयारी गर्न सकिन्छ ? यतातिर पनि ध्यानाकर्षण गर्ने हो कि सरकार ?

अरू देशले त ती देशका नागरिकलाई हवाईजहाज चार्टर्ड गरेर लगे, हाम्रा पनि नेपाली दाजुभाइ दिदीबहिनीहरू विदेशमा बसेर नेपालको सरकारलाई सम्झेर टुलुटुलु आकशतिर हेर्दै होलान् । कतिले चुनाव जिताउन आर्थिक सहयोग पनि गरेका होलान् । के यातातिर हाम्रो दायित्व छैन र सरकार ? कोरोना राहत कोष बनाउने अनि जनतालाई राहत र स्वस्थ्य सामग्रीचाहिँ सञ्चार माध्यमको हारगुहारमा जनताले नै दिनुपर्ने ?

नेपालको अलौकिक वर्तमान सरकारलाई जनताले देख्न सकेनन्, छुन सकेनन् अनि महसुस गर्न सकेनन् भने आखिर केका लागि यो सरकार ? कसका लागि ? यदि सरकार छ भने जनताको रगत, पसिनाको करबाट चलेको सरकारी सेवा, सुविधा त्यागेर जनताको माझमा उभिन सक्नुपर्छ नि यस्तो बिपत्तिको बेलामा ।

भ्रष्टाचारीलाई कारबाही गर्ने किन सकिएन सरकार ? हालको परिवेशमा विश्वका धेरै देशहरूले लकडाउनको अवस्था खेप्नुपरेको हुँदा अर्थतन्त्रलाई धरासायी पार्ने भयावह स्थिति सिर्जना हुन केही दिन मात्र बाँकी छ । ध्रुवसत्य कुरा त आजको अवस्थामा पनि हाम्रो देश नेपाल रेमिट्यान्सले मात्र धानेको कुरामा कुनै २ मत छैन ।

भोलिको अवस्था धान्न सक्ने पूर्वतयारी र योजना के छ सरकार हामीसँग ? होला, सबै नागरिकको चित्त बुझाउन सकिँदैन तर चित्तबुझ्दो कामचाहिँ गर्नै पर्छ सरकार ! यो कोरोनाको माहामारीबाट आइपर्ने सबैखाले परिस्थितिसँग अनुशासित र इमान्दार भएर सङ्कटको सामना गर्न जरुरी छ ।

प्रकाशित मिति: सोमबार, चैत २४, २०७६ १८:३०