गण्डकीमा ९३ जनाको कोरोना नमुना संकलनः २ पोजेटिभ, ७३ नेगेटिभ

A+ A A-

गण्डकी प्रदेशबाट कोराना भाइरस (कोभिड–१९) का ९३ जनाको नमुना संकलन गरिएको छ । ९३ वटा नमुनामध्ये रिपोर्ट आएका ७५ मध्ये ७३ जनाको नेगेटिभ र २ जनाको पोजेटिभ रिपार्ट आएको छ । अब १८ जनाको रिपोर्ट आउन बाँकी रहेको गण्डकी प्रदेश स्वास्थ्य निर्देशनालयले जनाएको छ ।

गण्डकी प्रदेशमा भेटिएका दुवै कोरोना संक्रमित बागलुङका हुन् । उनीहरूको अहिले धौलागिरी अञ्चल अस्पतालको आइसोलेसनमा उपचार भइरहेको छ । उनीहरू दुवै बेल्जियमबाट ४ चैतमा कतारको दोहाहुँदै काठमाडौं र बागलुङ पुगेका थिए ।

निर्देशनालयका अनुसार सबैभन्दा बढी कास्कीमा ४१ जनाको नमुना संकलन गरिएको छ । यस्तै, बागलुङका १८, स्याङ्जाका ८, पर्वतका १४, लमजुुङका ७, तनहुँका १, गोरखा २ र म्याग्दीका ३ जनाको स्वाब परीक्षण गरिएको छ ।

गण्डकी प्रदेशका मनाङ, मुस्ताङ र नवलपुरमा अहिलेसम्म कुनै शंकास्पद बिरामी फेला नपरेका कारण नमुना संकलन नगरिएको प्रदेश स्वास्थ्य निर्देशनालय पोखराका स्वास्थ्य शिक्षा प्रशिक्षक नवराज शर्माले जानकारी दिए ।

केही दिनअघि संघीय सरकारले पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालमा कोरोनाको परीक्षण गर्ने पोर्टेबल आरटी पीसीआर मेसिन सञ्चालनमा ल्याइएपछि नमुना परीक्षण र उपचारका लागि बिरामी आउन थालेका छन् ।

पोखरा स्वास्थ्य विज्ञान प्रतिष्ठानको प्रयोगशालामा ४६ वटा परीक्षण गरीएकामध्ये २८ वटामा संक्रमण नदेखिएको र १८ वटाको नतिजा आउन बाँकी रहेको शर्माले जानकारी दिए ।

२४ सय ९२ जना होम क्वारेन्टाइनमा

गण्डकी प्रदेशमा विभिन्न मुलुकबाट फर्किएका २ हजार ४ सय ९२ जनालाई होम क्वारेन्टाइनमा राखिएको छ ।

गण्डकी प्रदेश सामाजिक विकास मन्त्रालयअन्तर्गतको स्वास्थ्य निर्देशनालयले दिएको जानकारीअनुसार प्रदेशका ९ जिल्लामा विभिन्न देशबाट फर्किएकालाई २ साताका लागि होम क्वारेन्टाइनमा राखिएको हो ।

गण्डकी प्रदेशमा सबैभन्दा धेरै बागलुङमा ८०६ जना होम क्वारेन्टाइनमा राखिएको स्वास्थ्य शिक्षा प्रशिक्षक शर्माले जानकारी दिए ।

उनका अनुसार कास्कीमा ९६ जना होम क्वारेन्टाइनमा बसेका छन् । स्याङ्जामा ५१३ जना होम क्वारेन्टाइनमा रहेका छन् । यस्तै, तनहुँमा ५५०, गोरखामा २ ४८, पर्वतमा १८५, म्याग्दीमा ९१ जना होम क्वारेन्टाइनमा बसेका छन् ।

यस्तै, गण्डकी प्रदेशमा सबैभन्दा कम मनाङमा ३ जना मात्र होम क्वारेन्टाइनमा बसेका छन् । मुस्ताङ, नवलपुर र लमजुङमा भने होम क्वारेन्टाइनमा कोहि पनि नबसेको शर्माले बताए ।

गण्डकी प्रदेशमा राहतको योजना

गण्डकी प्रदेश र स्थानीय सरकारले दैनिक ज्याला मजदुरी गरेर जीविकोपार्जन गर्नेलाई राहत वितरण गर्दै आएको दाबी गरेका छन् । तर, राहत लक्षित वर्गसम्म सहजरूपमा भने पुग्न नसकेको गुनासो रोकिएको छैन ।

विभिन्न सामाजिक संघसंस्थाले समेत विपन्नका लागि विभिन्न राहत सामाग्री आफूखुसी वितरण गर्दै आएका छन् । निश्चित प्रक्रिया र मापदण्डबिना संघसंस्थाले राहत वितरण गरेपछि केही गुनासासमेत आउन थालेका छन् ।

गण्डकी प्रदेश सरकारले विपन्नलाई राहत वितरण गर्नका लागि ६ करोड ५० लाख रूपैयाँ विनियोजन गरेको छ । प्रदेश सरकारले स्थानीय तह मार्फत गरिव र विपन्नलाई रहत वितरण गर्न रकम निकासा गरिसकेको जनाएको छ ।

सरकारले प्रदेशका ८५ स्थानीय तहलाई ६ करोड ५० लाख रूपैयाँ राहतस्वरूप दिने निर्णय गरेको हो । जसअनुसार पोखरा महानगरपालिकालाई १ करोड रूपैयाँ, २६ नगरपालिकालाई प्रतिनगरपालिका १० लाखका दरले २ करोड ६० लाख रूपैयाँ र ५८ गाउँपालिकालाई ५ लाखका दरले २ करोड ९० लाख रूपैयाँ दिइने सरकारका प्रवक्ता एवं भौतिक पूर्वाधार विकासमन्त्री रामशरण बस्नेतले जानकारी दिए ।

यो रकम प्रदेश सांसदको सहभागितामा सरकारले गठन गरेको राहत तथा आपूर्ति समितिले वितरण गर्नेछ ।

पोखरा महानगरपालिकाको राहत योजना

पोखरा महानगरपालिकाले ‘लकडाउन’का कारण रोजगारी गुमाएकालाई प्रतिपरिवार २ हजार रूपैयाँबराबरको राहत सामग्री बाँड्ने योजना बनाएको छ । नामावली संकलनपछि मात्रै महानगरले राहतका कार्यक्रम बाँड्ने योजना बनाएको छ ।

वडाबाट केही परिवारलाई राहत सामग्री बाँड्न सुरू भए पनि महानगरको राहत कार्यक्रम अझैसम्म सुरू भएको छैन । महानगरपालिकाका प्रवक्ता धनबहादुर नेपालीका अनुसार महानगरले २ करोड ४८ लाख बराबरको राहत सामग्री विपन्न परिवारलाई उपलब्ध गराउनेछ ।

पालिकाहरूको राहत योजना

माछापुच्छ्रे गाउँपालिकाले विपन्न परिवारलाई राहत दिने तयारी थालेको छ । कार्यपालिकाबाट निर्णय पास गराएर राहत दिने तयारी भइरहेको गाउँपालिका अध्यक्ष कर्णबहादुर गुरूङले बताए । अहिलेसम्म राहत सामग्री भने बाँडिएको छैन ।

यस्तै, अन्नपूर्ण गाउँपालिकाले भने राहतमा कुनै पनि सामग्री नदिने निर्णय गरेकोे छ । गाउँपालिका अध्यक्ष युवराज कुवँरले ‘लकडाउन’पछि परिवारलाई दैनिक ५ सय रूपैयाँ पारिश्रमिकबराबरको श्रमदान गर्नुपर्ने शर्तमा मात्रै राहत दिने बताए ।

‘म राहतविरोधी हुँ । राहतको नाममा हुनेखाने मान्छेले ठगेर खाने भए’, उनले भने, ‘राहत दिए पनि राहतबराबरको शारीरिक श्रम गर्ने शर्तमा दिने हो ।’

यस्तै, मादी गाउँपालिकाले ७ सय परिवारलाई राहत सामग्री दिने तयारी गरेको छ । राहतमा २५ केजी चामल, तेल, नुन, दाललगायत २ हजारबराबरको खाद्य सामग्री बाँड्ने योजना बनाएको गाउँपालिका अध्यक्ष बेदबहादुर गुरूङले बताए ।

रूपा गाउँपालिकाका अध्यक्ष नवराज ओझाले गाउँपालिकामा अहिलेसम्म खाद्यान्न अभाव नदेखिएको बताए । खाद्यान्न पसललाई खाद्य सामग्री सकिन नदिने गरी व्यवस्थापन गर्न लगाएको उनले सुनाए ।

राहत सामग्री आवश्यक पर्ने परिवारको हकमा भने गाउँपालिको राहत दिनेछ । गाउँपालिको त्यस्ता परिवारको पहिचान गर्न शिक्षक, कर्मचारी, जनप्रतिनिधि घरघरमै परिचालन गरेर अवस्था बुझ्न लगाएको उनले बताए ।

गाउँपालिकामा अहिले कुनै पनि नयाँ मान्छे प्रवेशमा रोक लगाइएको छ । गाउँपालिका प्रवेश गर्न १४ दिनको क्वारेन्टाइन बसाइ पूरा गर्नुपर्ने अध्यक्ष ओझाले बताए । नियमित स्वास्थ चेकजाँचको व्यवस्था पनि गाउँपालिकाले मिलाएको उनले बताए ।

प्रकाशित मिति: सोमबार, चैत २४, २०७६ १४:०६