मन्त्रीको आत्मकथन : देश मात्र चलाउने, परिवार चलाउनुपर्दैन ?

A+ A A-

डाम्‍नाहरू ! काम पाएका छैनन्, सामाजिक सञ्जालमा चाहिने-नचाहिँने लेखेर बस्छन् । कोही धेरै खाएर मात्तिएका, कोही खान नपाएर आत्तिएका मात्र होइन, दिँदा नखाने डाम्नाहरू पनि विरोध गर्छन् बा !

यिनीहरूको सेवाचाहिँ गर्नुपर्ने अनि हाम्रो सेवाचाहिँ नगर्ने । कत्ति थाहा नभएको हँ, मह काट्नेले हात पनि चाट्छ भन्ने कुरा । हामीले अलिकति बढी निकालेको मात्र त हो नि !

यिनीहरूको रक्षार्थ देशमा लकडाउन गरिएको छ । पाओस्, नपाओस् सहुलियतमा सामान दिने घोषणा हामीले गरेकै हौँ । थाहा पाउँदैनन् कि, बुझ्दैनन कि भनेर नेपाल टेलिभिजनमा प्रसारण पनि गरेकै हो । तर पनि हामीलाई मान्दैनन् । हेप्नुको पनि त हद हुन्छ नि !

३-४ जना साथीहरूको जागिरै खाइदिसके, डाम्नाहरू ! अझै पनि च्याउँच्याउँ गरिरहेका छन् । कोही हुनुमानको भेषमा आएर फसाउँछन्, कोही नारदको भेषमा गएर सताउँछन् । हद नाघ्‍न थालिसक्‍यो । त्यही पनि सहनुपरेको छ । अझै केही गर्न सकिन्छ कि भन्ने आस त छ नि !

देशमा २ साता लकडाउन गर्दा १ महिनाको बोर्डिङ शुल्क छुट दिने, १ महिनाको घरभाडा छुट दिने, कामै नगरे पनि तलब दिइने, बिजुलीमा छुट, टेलिकममा छुट, बैंकमा ऋण तिर्नु छ भने ढिला तिरे हुने सबै गर्नका लागि हामीले कम्तीमा निर्णय त गर्‍यौँ नि !

सामान्य अवस्थामा भन्दा यिनीहरूलाई लाभ दिने निर्णय त हामीले गरिसकेका छौँ । अनि यति जनपक्षीय निर्णय गर्ने हामीचाहिँ लाटोले केरा हेरे जसरी हेरिरहने ! अझ भएन भनेर हाम्रो १ महिनाको तलब पनि नलिने भनेका छौँ । हाम्रो त जयजयकार गर्नुपर्ने हो नि !

हुनत केही साथीले गर्दा हुन् तर बाहिर निस्कनु भएको छैन । ननिस्कन भनिएको छ । कतै बाहिर निस्किए भने त हामीले गर्न थालेको काम पनि त झ्यालबाट हेर्ने हुन् कि भन्ने पनि त छ नि !

त्यही व्यापारीकामा गएर परिस्थिति यस्तो छ, भोलि सामान पाउन गाह्रो छ भन्यो भने १० को सामान २० रुपैयाँमा किन्न तयार हुन्छन् । तर, हामीले त्यही व्यापारीसँग मिलेर काम गर्दाचाहिँ खायो रखायो भन्छन् । कति अनुशासन नभएका हुन् क्या ! कम्तीमा हामीले त केही हदसम्म सम्मान गरेका छौँ नि !

सामान किन्दाखेरी पनि कति बेला किन्दा ठीक हुन्छ भनेर लामो समय प्रतीक्षा गरेर किन्ने निर्णय गरेका थियौँ । हामीले स्वास्थ्य सामग्री ३ महिनाअघि किनेको भए पनि त हुने थियो नि ! यति लामो समय प्रतीक्षा गरेर एउटा समूहसँग कुरा मिलाएर किन्न लागेको, ल्याउनै नपाउँदै रद्द गर्ने गराए । भएन भनेर अख्तियार नलाग्ने ठाउँतर्फ लान खोजेको, त्यही पनि कराइरहेका छन् ।

हामीले गर्ने कामको त भैगो अरूलाई गर्नका लागि अनुमति दिइनेमा पनि त्यस्तै कराएका छन् । राष्ट्रिय ध्वजावाहकले एजेन्टमार्फत् विमान चार्टर पठाओस् अथवा प्रत्यक्ष पठाओस्, चासो किन होला ? २-४ करोड तलमाथि भयो भन्दैमा कत्ति चिन्ता हो क्या ! आखिर यिनका खल्तीबाट भर्खर पैसा झिकिएर आउने त होइन ।

कहिले पदमा पुगेको भए पनि थाहा हुन्छ इमान, इज्जत, मान र प्रतिष्ठा । कोहीकोही म पनि पुगेको थिएँ पनि भन्छन् इमान, इज्जत, मान र प्रतिष्ठा राखेको भए पनि थाहा हुन्छ पैसाको महत्त्व ।

देश चलाएर मात्र पुग्दैन, परिवार पनि चलाउनुपर्छ । परिवारलाई बिहान-बेलुका खुवाएर मात्र पुग्दैन, घरघडेरी यही समयमा जोर्नु छ । घरघडेरीले मात्र पुग्दैन, इज्जतका खातिर यही समयमा राम्रो गाडी पनि किन्नुपर्छ ।

त्यतिले मात्र पुग्दैन, यस्तै समय पारेर प्रतिष्ठाका खातिर सुन-चाँदी, हीरा-मोती पनि यही समयमा जोड्नुपर्छ । भावी पुस्ताको पनि ख्याल गर्नै पर्‍यो । उनीहरूका लागि पनि केही गर्नै पर्‍यो । देश चलाएर मात्र कहाँ पुग्छ र ! परिवार पनि त चलाउनुपर्‍यो !

खै कुरो बुझेको !

प्रकाशित मिति: शनिबार, चैत २२, २०७६ १५:१२