कोरोनाको कहरमा कृषकः कुखुराको मासु र अण्डा कुहिने भयो, के गर्ने सरकार ?

A+ A A-

कोरोना भाइरस (कोभिड–१९) का कारण सरकारले गरेको ‘लकडाउन’का कारण कुखुरापालक कृषक मारमा परेका छन् । ‘लकडाउन’ले गर्दा कुखुराको मासु र अण्डा बिक्री हुन छाडेपछि व्यवसायीहरु मारमा परेका हुन् ।

धदिङ सूर्यमोहन पोल्ट्री फार्ममा कोरोना प्रभावका कारण १५ लाख रुपैयाँको अण्डा विक्री हुन बाँकी छ । अण्डा बिक्री नहुँदा कुखुराको दाना किन्ने पैसा नभएर व्यवसायमा समस्या हुने थालेको फार्मका सचिव सूर्यमोहन पोखरेलले जानकारी दिए ।

अण्डा उत्पादन भइरहे पनि बजार बिक्री नहुँदा कुखुराका लागि आवश्यक दाना किन्न नपाइएको उनको गुनासो छ ।

‘दाना किन्न पैसा नहुँदा कुुखुरालाई स्याहार पुगेको छैन । सरकारले किसानले उत्पादन गरेको अण्डा किन्न दिनुपर्ने हो । तर, राज्यलाई कृषकको पीडाको विषयमा चिन्ता छैन ।’ उनले भने, ‘कुखुरा फार्ममा उत्पादन भएका अण्डा ७ रुपैयाँ १४ पैसामा बजार पुग्छ । प्रत्येक दिन एउटा कुखुरा स्याहारसुहारका लागि ७ रुपैयाँ खर्च हुन्छ । अण्डा नै बिक्री नभएपछि कुखुरा हेरचाह कसरी गर्ने भन्ने समस्या छ ।’

‘लकडाउन’का देशभर उत्पादन भएका कुखुराको मासु र अण्डा बिक्री भएको छैन । नेपालमा दैनिक करिब ४० करोड बराबर कुखुराको मासु र अण्डा उत्पादन हुने गरेको व्यवसायी बताउँछन् । नेपालभर कुखुरा व्यवसायीले अहिले दैनिक झण्डै ३० करोड रुपैयाँ घाटा ब्यहोर्नु परेको जानकारी दिएका छन् ।

सरकारले कोरोना संक्रमण रोकथामका लागि गरेको ‘लकडाउन’ले अहिलेसम्म करिब ३० करोड घाटा भएको व्यवसायीले बताएका छन् । दाना खुवाउन नसकेपछि महिनौं बजार पठाउन तयार कुखुराको अण्डा र मासु स्टोर भइरहेको उनीहरुको गुनासो छ ।

काठमाडौं, भक्तपुर, ललितपुर, सिन्धुपाल्चोक, धादिङ, चितवन, काभ्रे, सुनसरी, मकवानपुर, रुपन्देही, कास्की, कैलाली, दाङ, लगातका जिल्लाका किसानले व्यावसायिक रूपमा कुखुराको मासु र अण्डा उत्पादन गर्दै आएका छन् ।

‘लकडाउन’ सुरु भएको दिनबाट बजारमा कुखुरा ढुवानी हुन छोडेपछि किसान कुखुराको मासु र अण्डा कसरी बजारमा पुर्‍याउने भनेर चिन्तित छन् ।