ज्वरोका बिरामी बोक्न नमान्ने सरकारी एम्बुलेन्स चर्को भाडामा यात्रु ओसार्दै

ज्वरोका बिरामी बोक्न नमान्ने सरकारी एम्बुलेन्स चर्को भाडामा यात्रु ओसार्दै

A+ A A-

सामान्य ज्वरो र रुघाखोकीका बिरामी बोक्न नमान्ने कालिकोट जिल्ला स्वास्थ्य सेवा कार्यालयको सरकारी एम्बुलेन्सले भाडामा यात्रु बोक्ने गरेको पाइएको छ ।

‘लकडाउन’को समयमा बिरामी बोक्नुपर्ने अवस्थामा त्यहाँको एम्बुलेन्सले भने चर्को भाडा लिएर यात्रु बोक्ने गरेको पाइएको हो ।

बिहीबार राती जिल्ला स्वास्थ्य सेवाको एम्बुलेन्स वीरेन्द्रनगरबाट ७ यात्रु बोकेर कालिकोट गएको छ ।

बिरामी नपाएको भन्दै बुधबार राती एम्बुलेन्सले सुर्खेतको वीरेन्द्रनगरबाट ७ जना यात्रुलाई ४ हजारका दरले भाडा लिएर कालिकोट गएको हो ।

सुर्खेतबाट एम्बुलेन्समा कालिकोट गएका रास्कोट नगरपालिका–६ सनेश शाहीले आफूलाई ज्वरो नआएकाले यात्रुको रुपमा एम्बुलेन्सले बोकेको बताए ।

‘मबाट एम्बुलेन्स चालकले ४ हजार रुपैयाँ भाडा असुलियो ।’ उनले भने, ‘ज्वरोका बिरामी बोक्न नमान्ने एम्बुलेन्सले यात्रु भने लकडाउनमा बोक्ने गरेको छ ।’

यता जिल्ला स्वास्थ्य सेवा कार्यालय कालिकोटका प्रमुख कटकबहादुर महतले आफूलाई एम्बुलेन्सले यात्रु बोकेको जानकारी नआएको बताएका छन् । उनले त्यसबारेमा सत्य बुझेर गलत पाइए तत्काल कारबाही प्रक्रिया अगाडि बढाइने बताए । ‘मलाई कुनै जानकारी नै छैन् ।’ स्वास्थ्य प्रमुख महतले भने, ‘गलत कार्य गरेको भए कारबाही प्रक्रिया अगाडि बढाउँछु ।’

मंगलबार मात्र जिल्ला स्वास्थ्य सेवा कार्यालयको एम्बुलेन्सले कालिकोट प्रदेश सभा ‘क’ का सांसद कुर्मराज शाही लगायतको टोलीलाई बोकेर कालिकोट पुगेको थियो ।

गत बिहीबार नै सुर्खेतस्थित नेपाल अर्बुद निवारण संस्थाको एम्बुलेन्सले बिरामीको बहानामा सुर्खेतबाट मुगुसम्म खचाखच मान्छे बोकेकोसमेत भेटिएको थियो । भे १ च ६७६ नम्बरको सो एम्बुलेन्सले १२ जनालाई बोकेर मुगु पुगेको पाइएको छ ।

प्रकाशित मिति: शनिबार, चैत २२, २०७६ ०९:५०