अस्ट्रेलियामा रहेका विद्यार्थी र पर्यटकलाई प्रधानमन्त्रीको आग्रह–अप्ठेरो भए आफ्नै देश फर्किनुहोस्

अस्ट्रेलियामा रहेका विद्यार्थी र पर्यटकलाई प्रधानमन्त्रीको आग्रह–अप्ठेरो भए आफ्नै देश फर्किनुहोस्

A+ A A-

अस्ट्रेलियाका प्रधानमन्त्री स्कट मोरिसनले त्यहाँ रहेका पर्यटक र विद्यार्थीलाई अप्ठेरो अवस्था आइपरेको भए आफ्नै देश फर्किन सल्लाह दिएका छन् । उनले भने, ‘तपाईंहरु अहिलेको परिस्थितिमा समस्यामा छु जस्तो लागेको छ भने आफ्नो देश फर्किन सक्नुहुन्छ ।’

उनले विद्यार्थी भिसाका साथै अन्य विभिन्न भिसामा अस्ट्रेलियामा बसोबास गरिरहेकाहरुले आफ्नो देश फर्किएमा आफूले चाहेको सहयोग पाउनसक्ने समेत बताए ।

प्रधानमन्त्री मोरिसनले अहिलेको अवस्थामा आफूहरु आफ्ना देशका नागरिक तथा स्थायी बासिन्दामा केन्द्रित रहेको स्पष्ट पारेका छन् ।

अन्य देशबाट अस्ट्रेलिया आउँदा नै आफू एक वर्षसम्मका लागि सबल रहेको प्रमाण पेश गरेर आएको स्मरण गराउँदै अध्ययनका क्रममा कुनै समस्या भए आफ्नै देश फर्किन सक्ने बताए ।

उनले विद्यार्थीले अस्ट्रेलिया आउनुअघि गरेको प्रतिबद्धताअनुसारको अपेक्षा राख्नु गलत नभएको बताउँदै यसबारेमा अध्यागमन मन्त्रीले जवाफ दिनसक्ने बताए ।

यद्यपि उनले अन्तर्राष्ट्रिय विद्यार्थीहरुका बारेमा केन्द्रीय सरकारले कस्तो योजना बनाइरहेको छ भन्ने बारेमा सम्बन्धित मन्त्रीले जानकारी दिने सुनाए ।

अस्ट्रेलियामा हाल कम्तीमा पनि ७ लाख विभिन्न देशका विद्यार्थी अध्ययनरत रहेका छन् । उनीहरुले सरकारलाई आफूहरुका लागि समेत सरकारले सहायताका कार्यक्रमहरु ल्याउनुपर्ने माग गरिरहेका छन् ।

सरकारले गर्ने दैनिक पत्रकार सम्मेलनमा उनीहरुलाई भने सम्बोधन गरेको पाइँदैन । त्यहाँ रहेका विद्यार्थीले घरभाडा लगायतका अन्य अत्यावश्यक कुरामा राहत आफूहरुलाई समेत दिनुपर्ने भन्दै विद्यार्थीहरुले हस्ताक्षर अभियान समेत चलाइरहेका छन् ।