गण्डकी प्रदेशमा ५६ जनाको नमूना संकलन, २ पोजेटिभ, ४१ नेगेटिभ

A+ A A-

गण्डकी प्रदेशबाट विश्वव्यापी रूपमा फैलिएको कोराना भाइरस (कोभिड–१९) काे आशंका गरिएका ५६ जनाको नमूना संकलन गरिएको छ ।तीमध्ये ४३ वटाको रिर्पोट आइसकेकाे छ ।

४३ मध्ये ४१ जनाको नेगेटिभ र २ जनाको पोजेटिभ रिपाेर्ट आएको छ । अब १३ जनाको रिर्पोट आउन बाँकी रहेको गण्डकी प्रदेश स्वास्थ्य निर्देशनालयले जनाएको छ ।

निर्देशनालयका अनुसार सबैभन्दा बढी कास्कीमा २६ जनाको नमूना संकलन गरिएको छ । यसैगरी बागलुङका १४, स्याङजाका ५, पर्वत र लम्जुङका ४/४, तनहुँ, गोरखा, म्याग्दीका १/१ जनाको स्वाब परीक्षण गरिएको छ ।

गण्डकी प्रदेशका मनाङ, मुस्ताङ र नवलपुरमा अहिलेसम्म कुनै शंकास्पद बिरामी फेला नपरेका कारण कुनै नमूना संकलन नगरिएको प्रदेश स्वास्थ्य निर्देशनालय पोखराका स्वास्थ्य शिक्षा प्रशिक्षक नवराज शर्माले जानकारी दिए ।

गण्डकी प्रदेशमा भेटिएका दुवै कोरोना पोजेटिभ बागलुङका हुन् । उनीहरूको धौलागिरी अञ्चल अस्पतालको आइसोलेसनमा उपचार भइरहेको छ । उनीहरू दुवै जना बेल्जियमबाट ४ चैतबाट कतारको दोहा हुँदै काठमाडौ झरेर बागलुङ पुगेका थिए ।

कतार एयरको त्यही फ्लाइटमा आएकी काठमाडौंकी १९ वर्षीया युवतीमा कोरोना संक्रमण भएको पुष्टि भएपछि उनीहरूको पनि नमूना परीक्षण गरिएको थियो, जसमा पोजेटिभ रिपोर्ट आएको थियो ।

क्वारेन्टाइनमा रहेका ९ जना घर फिर्ता

कास्की र स्याङ्जाको सीमा क्षेत्रमा पर्नेे फेदीखोला गाउँपालिकाको क्वारेन्टाइनबाट ९ जनालाई घर पठाइएको छ। गाउँपालिकाले विदेशबाट आएका ९ जनालाई १४ दिनसम्म क्वारेन्टाइनमा राखेर कुनै लक्षण नदेखिएपछि घर पठाएको हो।

गाउँपालिका स्वास्थ्य शाखा संयोजक खीलप्रसाद पौडेलका अनुसार १४ दिनको क्वारेन्टाइन बसाइपछि घर गएकाहरूमा विजय रानाभाट, जीवन भुजेल, कुमार रानाभाट, सुन्दर गुरुङ ,चन्द्रबहादुर क्षेत्री र राजेश गुरुङ रहेका छन् ।

यसैगरी, क्वारेन्टाइनबाट फिर्ता हुनेमा राजेश गुरुङकी श्रीमती भगवती गुरुङ, छोरी प्रिना गुरुङ र सुन्दर गुरुङकी श्रीमती सीता गुरुङ पनि रहेका छन् ।

नेपाल प्रवेश गरेको मितिले १४ दिन नाघेपछि उनीहरूलाई फिर्ता गरिएको हो ।

क्वारेन्टाइनमा बसेर सामाजिक उत्तरदायित्व पूरा गरेको भन्दै गाउँपालिकाले उनीहरूलाई १ हजारको दरले प्रोत्साहन रकमसमेत दिएको संयोजक पौडेलले बताए।

राजेश गुरुङ, भगवती गुरुङ र चन्द्रबहादुर बेल्जियमबाट ४ चैतमा कतारको दोहा हुँदै नेपाल आएका थिए । संक्रमितसँगै आएका उनीहरूको स्वाब परीक्षण गर्दा रिर्पोट नेगेटिभ देखिएको छ ।

हालसम्म सबैको अवस्था सामान्य रहेको गाउँपालिका स्वास्थ्य शाखा संयोजक पौडेलले जानकारी दिए ।

कोरोना भाइरसको त्रास र संक्रमणसँगै बजारमा स्यानिटाइजरको माग बढ्दै गएपछि गाउँपालिकाले आफैँले स्यानिटाइजर उत्पादन गरेको छ ।

स्थानीय दक्ष जनशक्तिद्वारा पालिकाको आर्थिक लागतमा ८० लिटर स्यानिटाइजर उत्पादन गरिएको हो । त्यसैगरी किटाणु मार्नको लागि ५० लिटर डिसइन्फेक्टेन्ट स्प्रे पनि पालिकाले उत्पादन गरेको जनाएको छ ।

गाउँपालिकाले स्याङ्जा जिल्ला छिर्ने कुभिण्डे नाकामा हेल्थ डेक्स सञ्चालनमा ल्याएको छ। ११ दिनदेखि सञ्चालित डेक्समा हालसम्म ३६ हजार भन्दा बढी यात्रुका ज्वरो परीक्षण गरिएको छ ।

मुटुरोगी र मिर्गौलाको डाइलसिस गर्ने बिरामीको लागि नि:शुल्क यातायात सेवा थालिएकाे अध्यक्ष घनश्याम सुवेदीले बताए ।

अध्यक्ष सुवेदीका अनुसार पालिकाले खाद्यान्न व्यवस्थापनलाई प्रभावकारी बनाएको छ । यसैगरी, विपन्न तथा दैनिक ज्यालादारी मजदूरकाे विवरणा संकलन गरी राहत वितरणको तयारी गरिएको छ ।

प्रकाशित मिति: शुक्रबार, चैत २१, २०७६ १२:२०