कुकुर र बिरालाको मासु खान रोक, भालुको पित्तबाट कोरोनाको उपचार !

A+ A A-

चीनको शेन्जेन सहरमा कुकुर र बिरालाको मासु खान रोक लगाइएको छ । कुकुर र बिरालोको मासु खान रोक लगाउने शेन्जेन चीनको पहिलो सहर हो ।

जंगली जनावरको मासु खाएका कारण कोरोना भाइरस संक्रमण फैलिएको बताइरहँदा चीनको शेन्जेन प्रान्तमा कुकुर बिरालोको मासुमा प्रतिबन्ध लगाइएको हो ।

चीन सरकारले पनि जंगली जनावरको मासु खान रोक लगाएको छ । तर शेन्जेनले त्यसभन्दा अघि बढेर कुकुर बिरालोको मासु खान रोक लगाएको हो ।

ह्युमन सोसाइटी इन्टरनेसनल नामको संस्थाका अनुसार एसियाका केही देशमा हरेक वर्ष तीन करोड कुकुर मासुका लागि मारिन्छन् । यद्यपि चीनका सबै मानिसले कुकुर र बिरालोको मासु खाँदैनन् ।

शेन्जेन सरकारले भनेको छ, ‘कुकुर र बिरालो पाल्तु जनावरका रुपमा मानिसको ज्यादै नजिक रहेका हुन्छन् र पाल्तु जनावरको मासु खानमा विकसित देशहरु र हङकङ तथा ताइवानमा समेत प्रतिबन्ध लगाइदै छ । यो प्रतिबन्ध मानव सभ्यता अनुकुल छ ।’

जनावरको हितमा काम गर्ने संस्था ह्युमन सोसाइटी इन्डरनेशनलले यो कमदको स्वागत गरेको छ । संस्थाका विशेषज्ञ डाक्टर पीटर लीले भने, ‘यो निर्णय चीनमा हरेक वर्ष १ करोड कुकुर र ४० लाख बिरालोलाई मासु खानका लागि मार्ने बर्बर व्यापारमा रोक लगाउने दिशामा एक ऐतिहासिक कदम हो ।’

भालुको पित्त प्रयोग गर्न अनुमति

कुकुर र बिरालोको मासु खान रोक लगाइएको भएपनि चीनमा भालुको पित्त कोरोना संक्रमितको उपचारका लागि प्रयोग गर्न चीनले अनुमति दिएको छ ।

चीनमा भालुको पित्तमा रहेको एसिडको प्रयोग पथरी र कलेजोको विरामीको उपचारमा औषधिका रुपमा प्रयोग हुँदै आएको छ । यो कोरोनाको उपचारमा समेत लाभदायक छ भन्ने कुनै प्रमाण छैन ।

एनिमल एसिया फाउन्डेसन नामक संस्थाका प्रवक्ता ब्रायन डेलीले भने, ‘हामी यो खतरनाक भाइरसको उपचारका लागि जंगली जनावरमा निर्भर हुनु हुँदैन । जबकि यसको स्रोत नै जंगली जनावर भएको बताइदै आएको छ ।’

प्रकाशित मिति: शुक्रबार, चैत २१, २०७६ ०९:०५