आइसोलेसनमा ज्यान गुमाएका थापाको शव अलपत्र, न परिवार आए न क्षतिपूर्ति पाए

A+ A A-

गत १६ चैतमा बुटवलको धागो कारखानामा रहेको आइसोलेसन अस्पतालमा उपचारको क्रममा मृत्यु भएका बावुराम थापाको शव अस्पतालमा अलपत्र परेको छ ।

मृतक बावुरामको परिवारले डाक्टरले लापरबाहीले ज्यान गएको र उचित क्षतिपुर्ति दिनुपर्ने माग राखेपनि हालसम्म दुवै पक्ष बीच सम्वाद नै नभएको पाइएको छ ।

बावुरामकी श्रीमती रिता थापाले आफु र २ छोराहरुलाई बाँच्ने आधार सरकारले ग्यारेन्टी गर्नुपर्ने बताउँदै आएकी छिन् । तर अस्पताल प्रशासनले भने उपचारका क्रममा मृत्यु भएको र क्षतिपुर्ति अस्पताल विकास समितिबाट दिन नसकिने बताएको छ ।

अस्पताल विकास समितिका अध्यक्ष सुर्य भटट्राईले शव लैजान थापाको परिबार अहिलेसम्म नआएको र क्षतिपुर्ति बारेमा सञ्चार माध्यमबाट थाहा पाएको बताए ।

‘उहाँहरुले शव लैजान किन डराउनुभएको छ, थाहा छैन, श्रीमानको मृत्यु हुदा समेत उहाँ एक्लै आउनुभयो । सान्त्वना दिने त्यहाँ कोही भएनन् । पछि हामीले नै एम्बुलेन्सको व्यवस्था गरेर कोठा सम्म पुराएका हौं,’ थापाले भने, ‘त्यसपछि केही संवाद भएको छैन् ।’

अध्यक्ष भटट्राईले स्थानीय सरकार वा प्रदेश सरकारले क्षतिपुर्ति दिने वा नदिने विषय आफ्नो क्षेत्रभित्र समेत नपरेको स्पष्ट पारे ।

यता रिताका दाजु कमल टन्डनले घरतर्फबाट केही कुरा नउठाउँदा माईती पक्षबाट क्षतिपुर्तिका बारेमा कुरा उठाइएको बताए । अहिले सम्म घरपक्षबाट रिताको अवस्था बुझ्न कोही दाजुभाई समेत नआएको भन्दै २ छोराहरु र रिताको बाँच्ने आधार सम्बन्धित पक्षले गराइदिनुपर्ने बताउँछन् ।

‘हामी यो माग लिएर कुन निकायमा कसरी जाने भन्ने समेत थाहा छैन, उहाँहरुले शव नउठेपछि केही पहल गनुपर्ने हो’, उनले भने, ‘हामीले मिडिय बाट यो माग राखीरहेका छौ, सम्बन्धित निकायले ध्यान दिनेछ भन्ने आशा छ ।’

आइसोलेसन वार्डमा १३ चैतमा भर्ना भएका ज्वरोका विरामी रुपन्देही सैनामैनाका थापाको चार दिनपछि अर्थात १६ चैत दिउसो १ बजे मृत्यु भएको थियो ।

क्षतिपुर्ति दिन र सर्वपक्षीय समिति बनाउन माग

बुटवलको ‘कोरोना विशेष’ अस्थायी अस्पतालको आइसोलेसन वार्डमा भर्ना भएका ३४ वर्षिय बाबुराम थापाको मृत्युलाई समाजवादी पार्टी प्रदेश ५ ले सरकारको लापरवाहीका कारण भएको ठहर गरेको छ ।

‘कोरोना विशेष’ नामाकरण गरिएको अस्पतालमा आवश्यक उपचार सामग्रीको उचित व्यवस्था नहुंदा विरामीले राम्ररी उपचार नपाई ज्यान गुमाउनुपरेको पार्टीको प्रदेश समितिले पे्रस विज्ञप्तिमार्फत जनाएको छ ।

अस्पतालमा भेन्टिलेटर अभाव र समयमै विरामीको नमूना परीक्षण नगर्दा रोग पत्ता नलागी विरामीको अकालमा ज्यान गएको छ,’ पार्टीका प्रदेश अध्यक्ष अशोक यादवद्वारा जारी विज्ञप्तिमा उल्लेख छ ।

यता नेपाल तरुण दल रुपन्देहीले उचित क्षतिपुर्तिको माग गरेको छ । उनको रिर्पोटमा कोरोना भाइरस नेगेटिभ देखिएपछि उक्त अस्पतालमा किन लगिएको भन्ने प्र्रश्न गम्भीर रुपमा उठेको भन्दै उनको मृत्युको कारण दिन नसक्ने अस्पताल प्रशासन एवं प्रदेश र स्थानीय सरकारको गम्भीर लापरवाही देखिएको तरुण दलले आरोप लगाएको छ ।

प्रकाशित मिति: बिहीबार, चैत २०, २०७६ १५:३३