अस्ट्रेलियन नागरिक र पीआरधारी बोकेर नेपाल एयरलाइन्स आज अस्ट्रेलिया उड्दै

A+ A A-

कोरोनाको संक्रमणको त्रास र देशले गरेको लकडाउनका बीच नेपालको ध्वजावाहक नेपाल वायु सेवा निगमले बुधबार अस्ट्रेलियन नागरिक र अस्ट्रेलियन पीआर पाएका नागरिक बोकेर बुधबार (आज) अस्ट्रेलिया जाँदै छ ।

नेपालस्थित अस्ट्रेलियन दूतावासले विमान चार्टर गरेर अस्ट्रेलिया पठाउन लागेको हो । बेलुका साढे ५ बजे नेपालबाट अस्ट्रेलियाका लागि उडान गर्ने नेपाल एयरको वाइडबडी मलेसियाको क्‍वाललम्पुर पुगेर रि-फ्युलिङ गर्नेछ ।

मलेसियामा रि-फ्युलिङ गरेपछि अस्ट्रेलियाको अस्ट्रेलियाको ब्रिसबेनको लागि उडान गर्दै गरेको नेपाल वायुसेवा निगमले जनाएको छ । यसका लागि नागरिक उड्डयन प्राधिकरणका तर्फबाट अनुमति भइसकेको प्राधिकरणका प्रवक्ता राजकुमार क्षेत्रीले जानकारी गराए ।

बुधबार २ सय ७० जना यात्रु बोकेर अस्ट्रेलिया जाँदै छ, जसमा अस्ट्रेलियन नागरिक र अस्ट्रेलियाको पीआर पाएका नेपाली नागरिक रहेका छन् ।

नेपाल एयरलाइन्सका २ वटा जहाजले लामो दूरीको यात्रा गर्न सक्छन् । तीमध्ये १ वाइडबडीलाई बुधबार अस्ट्रेलियन नागरिक बोकेर पठाउन लागिएको हो ।

अस्ट्रेलियाका लागि वाइडबडी जहाजको यो पहिलो उडान पनि हो ।

यसअघि लकडाउनको समयमा विदेशी नागरिक उठाउन कतार एयर मात्र प्रयोग गरिएकामा बुधबारबाट नेपाल एयरले पनि स्थान पाएको हो । यसअघि नेपाल एयरले लकडाउनका बीच चीनको ग्वान्झाओबाट कार्गो उडान गरेको थियो ।

अघिल्लो बुधबार बसेको कोरोना रोकथाम तथा उच्चस्तरीय समन्वय समितिको बैठकले नेपालका विभिन्न भागमा रहेका पर्यटकलाई काठमाडौं ल्याउने र उपयुक्त उडान मिलाएर पठाउने निर्णय लिएको थियो । सोही निर्णयअनुसार कतार एयरको विमान चार्टर्ड गरेर करिब १ हजार जना युरोपेली मुलुकका नागरिक र ३ सय २ जना अमेरिकन नागरिकका साथै अमेरिकाको ग्रीन कार्ड पाएका नेपालीलाई पठाइएको थियो ।

प्रकाशित मिति: बुधबार, चैत १९, २०७६ ०८:३३