४ दिनसम्म उठेन आइसोलेसनमा मृत्यु भएका थापाको शव

A+ A A-

बुटवलको धागो कारखानामा रहेको कोरोना अस्पतालकाे आइसोलेसनमा गत १६ चैतमा उपचारका क्रममा मृत्यु भएका बाबुराम थापाको शव चार दिन बितिसक्दा पनि उठ्न सकेको छैन् ।

मृत्युको यथार्थ रिपोर्ट अस्पतालले दिनुपर्ने र क्षतिपुर्ति समेत सरकारले दिनुपर्ने माग राख्दै परिवारले बाबुरामको शव नउठाएका हुन् । पाल्पा रिब्दिकोट गाउँपालिका–६ मा स्थायी घर भएका थापाको परिवार सैनामैना नगरपालिका वडा नंं ४ सिसौडाँडामा कोठा भाडामा बस्दै आएका थिए ।

गत ६ चैतमा दुबईबाट नेपाल आएका उनलाई हल्का ज्वरो देखिएको थियो । ५ बर्षपछि घर आएका उनी चैत १३ गते अटो रिक्सा रिजर्भ गरेर लुम्बिनी प्रादेशिक अस्पतालमा ज्वरो जाँचका लागि आएका थिए । तर, त्यहाँ उपचारमा खटिएका स्वास्थ्यकर्मीले आइसोलेसनमा राखेर उपचार गर्ने भन्दै धागो कारखानामा रहेको अस्थायी कोरोना अस्पतालमा पठाएका थिए । तर, तीन दिनपछि गत आइतबार दिउँसो उनको मृत्यु भएको थियो ।

मृतक थापाकी श्रीमती रिता थापाले कोरोनो नेगेटिभ भए मृत्युको यथार्थ रिपोर्ट डाक्टरले दिनुपर्ने बताइन् । उनले श्रीमान् हिँड्दै अस्पतालमा पुगेको र अर्को दिनसम्म फोन सम्पर्क समेत भएको अवस्थामा डाक्टरले अर्को दिन मृत्यु भयो भन्नु अस्पतालको गम्भीर लापरबाही भएको बताइन् । ‘मैले श्रीमानलाई सञ्चो होला भनेर अस्पतालमा पठाइएकी हुँ, मार्नलाई पठाएको होइन’ उनले भनिन्, ‘मलाई जिन्दगीभर पिरलो हुन्छ, मैले छोराहरु कसरी पाल्ने?’

उनले छोराहरु र आफूलाई पनि सरकारले हेर्नुपर्ने माग गरिन् । ‘अस्पतालमा समेत उहाँलाई अमानविय व्यवहार गरेका थिए । केही नभएको मान्छेलाई ३ दिनमै डाक्टरले मारे । यो सबै अस्पतालको लापरबाहीले भएको हो ।’ उनले भनिन् । रिताले आफूलाई शव बुझ्नका लागि कसैले पनि फोन नगरेको समेत बताएकी छिन् ।

मृतक थापाको शव लुम्बिनी प्रादेशिक अस्पतालमा रहेको छ । उनको सोमबार मात्रै कोरोना नेगेटिभ भएको रिपोर्ट आएको थियो ।

यता लुम्बिनी प्रादेशिक अस्पतालका कोरोना फोकल पर्सन डा. सुर्दशन थापाले बाबुरामको मृत्यु निमोनियाले भएको रिपोर्ट आएको र शव बुझ्नका लागि परिवारलाई खवर गरिएको जानकारी दिएका छन् ।

प्रकाशित मिति: बुधबार, चैत १९, २०७६ ०७:५१