पोखरा आइपुग्यो कोरोनाको परीक्षण गर्ने पीसीआर मेसिन

A+ A A-

विश्वव्यापी रूपमा फैलिएको कोरोना भाइरस (कोभिड–१९) जाँच गर्ने पोर्टेबल आरटी पिसिआर मेशिन पोखरा आइपुगेको छ । मंगलबार हेलिकोप्टरबाट पोखरा स्वास्थ्य विज्ञान प्रतिष्ठानमा मेसिन झारिएको हो ।

संघीय सरकारले मित्र राष्ट्र चीनबाट ल्याइएका ५ ओटा पिसिआर मेसिनमध्ये ४ वटा प्रदेशलाई १/१ वटा दिने र एउटा इमर्जेन्सीका लागि संघले नै राख्ने उच्चस्तरीय समितिको बैठकले निर्णय गरेपछि गण्डकी प्रदेश विमुख भएको समाचार शिलापत्रले प्रकाशन गरेको थियो ।

उच्चस्तरीय समितीले काठमाडौंमा पत्रकार सम्मेलन गरी गण्डकी प्रदेशबाहेका ४ वटा प्रदेशलाइ परीक्षण मेसिन दिने जानकारी गराएलगत्तै सामाजिक सञ्जालमा गण्डकी प्रदेश सरकार जनताको स्वास्थ्यप्रति निरीह बनेको भन्दै विरोध सुरु भएको थियो ।

कोरोना रोकथामसम्बन्धी उच्चस्तरीय समितिको आइतबार बसेको बैठकले कोरोना परीक्षणका लागि मेसिन प्रदेश-२ को वीरगंज, प्रदेश-५ को बुटवल, कर्णाली प्रदेशको सुर्खेत र सुदूरपश्चिम प्रदेशको धनगडीमा राख्ने निर्णय गरेको थियो ।

प्रधानमन्त्री कार्यालयका सचिव नारायण विडारीले समितिको निर्णय सुनाउँदै प्रदेश-१ मा यसअघि नै स्थापन भइसकेको र बागमती प्रदेशको शुक्रराज ट्रोपिकल हस्पिटमा यसअघि नै चालु अवस्थामा रहेका कारण चीनबाट ल्याइएको पिसिआर मेसिन गण्डकी प्रदेशबाहेका अन्य प्रदेशमा पठाएको बताएका थिए।

प्रदेश सरकराले यस्तो अवस्थामा पनि कोरोना परीक्षण गर्ने मेशिन ल्याउन पहल नगरेको आरोप लागेपछि मुख्यमन्त्री पृथ्बी सुब्बा गुरुङ र पूर्वस्वास्थ्य मन्त्री एवं सांसद खगराज अधिकारी परीक्षण गर्ने मेसिन ल्याउने पहल थालेका थिए ।

पिसिआरे मेसिनले ३ घण्टामै कोरोना भाइरस जाँच गर्न सक्ने बताइएको छ । पोखरा स्वास्थ्य विज्ञान प्रतिष्ठानका उपकुलपति बुद्धि थापाले मेसिन प्रयोगशालमा जडानको काम भइरहेको बताए ।

उनले मेसिन जडान गरेर आजैदेखि कोरोना भाइरसको टेस्ट सुरु गर्ने गरी कार्य भइरहेको जानकारी दिए । मेसिनसहित विज्ञहरूको टोली पनि पोखरा आईपुगेको उपकुलपति थापाले बताए ।