बागलुङकी कोरोना संक्रमित युवतीका परिवारका सदस्यसहित २१ जनाको नमुना काठमाडौं पठाइयो

बागलुङकी कोरोना संक्रमित युवतीका परिवारका सदस्यसहित २१ जनाको नमुना काठमाडौं पठाइयो

A+ A A-

विश्वव्यापी रूपमा फैलिएको कोरोना भाइरस कोभिड–१९) को आशंकामा गण्डकी प्रदेशबाट २१ जनाको नमुना काठमाडौं पठाएको छ । पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पताल पोखराले आइतबार र सोमबार विभिन्न जिल्लाबाट संकलन भएका स्वाव काठमाडौं पठाएको हो ।

अस्पतालले सोमबार राति ९ वटा स्वाबलाई गाडीबाट काठमाडौं पठाएको छ । यस्तै, बागलुङबाट आएको १२ स्वाबलाई मंगलबार हेलिकोप्टरमार्फत परीक्षणका लागि काठमाडौं पठाएको छ । काठमाडौं पठाइएका १२ नमुना बागलुङ नगरपालिका– ४, कुँडुलेकी कोरोना भाइरस (कोभिड १९) संक्रमित युवतीको परिवार र उनका साथीहरूको भएकाे अस्पतालले जनाएकाे छ ।

धौलागिरी अञ्चल अस्पतालका स्वास्थ्यकर्मीको टोलीले सोमबार दिउँसो संक्रमितको परिवारका ७ सदस्य र अन्य साथीहरूको गरी १२ जनाको स्वाव संकलन गरिएको प्रदेश स्वास्थ्य निर्देशनालय पोखराका स्वास्थ्य शिक्षा प्रशिक्षक नवराज शर्माले जानकारी दिए ।

त्यसैगरी, कास्कीबाट ७ जना, स्याङजा, तनहुँबाट १/१ जनाको स्वाब परीक्षणका लागि पठाएको उनले बताए । पश्चिमाञ्चल क्षेत्रीय अस्पतालमा पछिल्लो दिनमा नमुना परीक्षण र उपचारका लागि बिरामीहरू आउन थालेका छन् ।

गण्डकी प्रदेशमा ३२ जनाको कोरोना परीक्षण भएकोमा २० जनाको नेगेटिभ, १ को पोजेटिभ आएको छ । पोजेटिभ रिपोर्ट आउनेमा बागलुङ नगरपालिका– ४, कुँडुलेकी युवती हुन् । उनको बागलुङ अस्पतालको आइसोलेसन वार्डमा उपचार भइरहेको छ ।

२ महिनाअघि बेल्जियम पुगेकी उनी यही चैत ४ मा कतारको दोहा हुँदै काठमाडौं आएकी थिइन् । कतार एयरको त्यही फ्लाइटमा आएकी काठमाडौंकी १९ वर्षीया युवतीमा कोरोना संक्रमण भएको पुष्टि भएपछि उनको पनि नमुना परीक्षण गरिएको थियो, जसमा पोजेटिभ रिपोर्ट आएको थियो ।

प्रकाशित मिति: मंगलबार, चैत १८, २०७६ १३:३८