सुरक्षा गार्डलाई कार्यक्षेत्र र घरसम्म आउनजान समस्या

A+ A A-

काठमाडौं, १८ चैत

विश्वभरि महामारीको रूपमा फैलिएको कोरोना भाइरसका कारणले विश्वलाई नै आतंकित बनाइरहेको छ । कोरोना भाइरसकाे संक्रमण फैलिएसँगै सबै क्षेत्रका कर्मचारीले बिदा पाएका छन् । तर, निजीक्षेत्रकाे तर्फबाट सुरक्षा दिँदै आएका सुरक्षा गार्डले भने बिदा पाएका छैन ।

उनीहरू यो अवस्थामा पनि सुरक्षाका लागि खटिइरहेको सुरक्षा व्यवसायी संगठन नेपालले जानकारी दिएको छ ।

सुरक्षा गार्ड पनि प्रहरीजस्तै अरूको सुरक्षाको काममा खटिइरहेको सुरक्षा व्यवसायी संगठन नेपालका अध्यक्ष उद्धवराज डल्लाकोटीले बताएका छन् ।

सरकार र रोजगारदाता कम्पनी दुवैले उनीहरूको सुरक्षाका विषयमा चासो नदिएको संगठनका अध्यक्ष डल्लाकोटीको गुनासो छ । नेपालमा निजीक्षेत्रबाट विभिन्न बैंक तथा वित्तीय संस्था, अन्य संस्था, सरकारी, अर्धसरकारी कार्यालय, उद्याेग, कलकारखाना, अस्पताल, होटल, स्कुल, कलेज, कुटनीतिक नियोगलगायतका कार्यालयहरूमा २४ सै घण्टा आलोपालो गर्दै काम गर्दै आएका सुरक्षा गार्डलाई आवतजावतमा समस्या भइरहेको सुरक्षा संगठनले जानकारी दिएको छ ।

नेपाल प्रहरी, नेपाली सेना र सशस्त्र प्रहरी बलजस्तै निजीक्षेत्रबाट प्रदान गरिने सुरक्षा सेवा पनि अत्यावश्यक सेवाभित्र पर्ने संगठनको बुझाइ छ । सुरक्षा गार्डले सरकारलाई सुरक्षाको क्षेत्रमा ठूलो सहयोग पुर्‍याउँदै आए पनि उनीहरूको स्वास्थ्य र यस्तो महामारीका बेला आवश्यक सुविधा सरकारले नदिएको संगठनका अध्यक्ष डल्लाकोटीले गुनासाे गरे ।

‘आलोपालो मिलाई सुरक्षा गर्नुपर्ने सुरक्षा गार्ड, कम्पनीका सञ्चालक, कर्मचारीलाई नेपाल सरकारले सवारी साधन लिएर हिँडन रोक लगाएकाे छ । जसका कारण उनीहरूलाई काम र घरमा आउनजान समस्या भइरहेको छ,’ संगठनका अध्यक्षले भने ।

उनले थपे, ‘सुरक्षा गार्डलाई आआफ्नो निवासबाट ड्युटीमा आवतजावत गर्ने वातावरण सरकारले बनाइदिनुपर्छ । सुरक्षा व्यवसायी संगठन नेपालले यो विषयमा सरकारलाई पटकपटक आग्रह गरेको छ ।’

निजीक्षेत्रबाट खटिने सुरक्षागार्डलाई रोजगारी तथा कार्यक्षेत्रसम्म आवतजावत गर्ने वातावरण मिलाइदिन सम्बन्धित निकायलाई आग्रह गरेको उनको भनाइ छ । हाल देशभर २ लाखभन्दा धेरै सुरक्षागार्ड कार्यरत रहेको संगठनले जानकारी दिएको छ । कोरोना भाइरसको महामारीमा पनि निजीक्षेत्रबाट सञ्चालित सेक्युरिटी कम्पनीबाट सुरक्षागार्डहरूले आफ्नाे ज्यानकाे जाेखिम माेलेरै भए पनि आफ्नाे क्षाेत्रमा काम गरिरहेकाे संगठनले बताएकाे छ ।

प्रकाशित मिति: मंगलबार, चैत १८, २०७६ १२:४६