पोखरामा विदेशबाट आएका ६७ जना सेल्फ क्वारेन्टाइनमा

A+ A A-

विश्वव्यापीरूपमा फैलिएको कोरोना भाइरसको संक्रमण फैलिन नदिन पोखरा महानगरपालिकाका विभिन्न स्थानमा ६७ जना सेल्फ क्वारेन्टाइनमा बसेका छन् ।

पोखरा महानगरपालिका -२७ ले विदेशबाट आएका १३ जना आफ्नै घरमा क्वारेन्टाइनमा राखेको छ । विदेशबाट आएकाहरूको तथ्यांक संकलन गरी उनीहरूलाई आफ्नै घरमा सुरक्षित बस्न आग्रह गरिएको वडाध्यक्ष पूर्णकुमार गुरुङले जानकारी दिए ।

उनका अनुसार वडाको बडहरे गन्धर्व टोलमा भारतबाट आएका ४ जना, कालीगण्डकी विद्युतको सबस्टेशन नजिक खाडी मुलुकबाट आएका १ जना, कोलेफाँट टोलमा खाडीबाटै आएका १ जना, भित्री डाँडाको नाकमा खाडीबाट आएका १ जना, लक्ष्मी आदर्श टोल नजिक खाडीबाट आएका १ जनालाई घरमै सुरक्षित पूर्वक क्वारिन्टाइनमा बस्न लगाइएको छ ।

यसैगरी रिठेपानी जलजले टोलमा माल्दिभ्सबाट आएका १ जना र बेलायतबाट आएका रिठेपानी दुर्गा टोलका आमा छोरालाई पनि सावधानी अपनाएर घरबाहिर ननिस्कन भनिएको वडाध्यक्ष गुरुङले बताए ।

यसैगरी, एकता टोलमा भारतबाट आएका आमा छोरालाई पनि आफ्नै घरमा क्वारेन्टाइनमा बस्न भनिएको छ । उनीहरूको नियमित अनुगमन गर्न सम्बन्धित क्षेत्रका वडासदस्यलाई जिम्मेवारी दिइएको पनि वडाध्यक्ष गुरुङले बताए । उनले दैनिक ज्यालादारी काम गरेर परिवार पाल्नेहरूलाई सहयोगको तयारी भइरहेको समेत जानकारी दिए ।

सरकार र आधिकारीक निकायबाट दिईएको स्वास्थ्य निर्देशनलाई पालना गरी लकडाउन अवधिभर घरमै बसीदिन आग्रह गरिएको वडाध्यक्ष गुरुङले बताए ।

यसैगरी पोखरा महानगरपालिका वडा नं ३२ का विभिन्न ठाउँमा २३ जना विदेशबाट आएकाको तथ्यांक संकलन गरिएको वडाध्यक्ष अक्कलबहादुर कार्कीले जानकारी दिए । उनले वडाको खुदीखोला र बडहरे क्षेत्रमा विदेशबाट आउनेहरूको संख्या बढी भएको उल्लेख गर्दै घरमै सुरक्षित तरिकाले क्वारेन्टाइनमा बस्न आग्रह गरिएको बताए । ‘होम क्वारेनटाइनमा राखिएकाहरूको अनुगमन गर्न वडासदस्यलाई जिम्मेवारी तोकिएको छ’ उनले भने ।

वडाध्यक्ष कार्कीले यो समयमा समूह बनाएर मकै गोड्ने चैते धान रोप्ने जस्ता कृषिकर्मका कारण समस्या परेको उल्लेख गरे । वडाध्यक्ष कार्कीले विपन्न बस्तमा खाद्यान्नसहितको राहत प्याकेज महानगरसँग समन्वय गरेर छिट्टै व्यवस्थापन गरिनेसमेत बताए ।

यता, पोखरा महानगरकै वडा नं. ३० मा भने १३ जनाको तथ्यांक प्राप्त भएको वडाध्यक्ष श्रीराम पोखरेलले जानकारी दिए । उनले चैत्र १ गतेदेखि यात्रा विवरण रहेका १३ जनाको नाम वडालाई प्राप्त भएको उल्लेख गर्दै, सेल्फ क्वारेन्टाइनमा बस्न आग्रह गरिएको र समय समयमा निगरानी गरिएको बताए ।

वडाध्यक्ष पोखरेलका अनुसार वडा नं. ३० को रामबजारमा २ महिला भारतको बेंगलोरु र १ पुरुष दुबईबाट आएको विवरण प्राप्त भएको छ । यस्तै गगनगौडामा कतारबाट १ जना, खुदी माछापुच्छ्रे टोलमा पति-पत्नीसहित दुई जना चैत ७ गते कतार एयरवेजबाट आएका र उनीहरू घरमै क्वारेन्टाइनमा रहेको वडाध्यक्ष पोखरेलले बताए ।

यसैगरी शिशुवा बजारमा १ जना पुरुष कतारबाट र खयरखोरमा दुई जना महिला भारतबाट एवं सुकेडाँडामा १ जना पुरुष हङकङबाट आएको र घरमै क्वारेन्टाइनमा बस्न आग्रह गरिएको बताए ।

यसैगरी, पोखरा महानगरपालिका वडा नं. २९ मा बिदेशबाट आएका १८ जनाको तथ्यांक संकलन गरिएको र उनीहरूलाई घरमै क्वारेन्टाइनमा बस्न भनिएको वडाध्यक्ष चेतवहादुर गुरुङले जानकारी दिए । उनले सचेतनाका लागि घरदैलो, माइकिङ र विभिन्न संचार माध्यमबाट सन्देश प्रसारण गरिएको उल्लेख गर्दै, विषम परिस्थितिमा राज्य र महानगरले जारी गरेका निर्देशन पालना गर्न वडाबासीलाई आग्रह गरेका छन् ।

प्रकाशित मिति: सोमबार, चैत १७, २०७६ १२:३२