विदेशमा रहेका नेपाली भन्छन् : ‘कोरोनाले घरको न कम्पनीको बनायो’

A+ A A-

कोरोना भाइरसले गर्दा काम गर्ने कम्पनी नगएको ३ हप्ता भएको मलेसियामा कार्यरत झापाका भगीरथ पाठकले बताए । कम्पनीले बस्न र सामान्य खानाचाहिँ दिएको मलेसियाबाट पाठकले फेसबुकमार्फत् जानकारी दिए ।

‘मलेसियामा सबै ठप्प छ । कम्पनीभित्र बसेर रातदिन बिताइरहेका छौँ । एउटा कोठामा ५ जना बस्नुपर्छ । कोरोना भाइरसका डरले कतै निस्कन पनि डर लाग्छ’, उनले भने, ‘अहिलेसम्म कम्पनीले खाना दिएको छ । अब केही दिनमा आफैँ व्यवस्था गर्नुपर्ने हो कि जस्तो छ । अन्य देशका कामदारलाई सम्बन्धित देशको सरकारले खाना र औषधिको समेत व्यवस्थ गर्न थालेको छ ।’

मलेसियास्थित नेपाली दूतावासले भने अवस्था कस्तो छ भनेर अहिलेसम्म जानकारीसमेत नलिएको पाठकको गुनासो छ । केही कारण समस्या भयो भने मलेसियामा रहेका धेरै नेपालीलाई खानेकुराको समस्या हुने उनको भनाइ छ ।

मलेसिया सरकारले लकडाउनको समयसमेत बढाएको छ, जसका कारण अब बस्नमा होइन, खानेकुरामा समस्या उत्पन्न हुने त्यहाँ कार्यरत नेपालीमा चिन्ता बढेको छ ।

यस्तै, यूएईमा ब्युटी पार्लरमा काम गर्दै आएकी इलामकी सरिता प्रधान कोठामा बसेर दिन बिताइरहेको बताउँछिन् । बाहिर हिँड्न पाइँदैन । बाहिर हिँड्नेले जरिमाना तिर्नुपर्छ । त्यही भएर कोठामा बसेर दिन काटिरहेको सरिताले बताइन् ।

‘खानेकुरा केही दिनका लागि छ । अब किन्न जान पनि पाइँदैन । मैले काम गर्ने व्युटी पार्लर निजी हो, जसका कारण यो कम्पनी त बन्द हुन सक्छ’, उनले भनिन्, ‘कम्पनी बन्द भयो भने मेरो त बिजोक हुन्छ होला । न त घर जान पाइन्छ ।

धेरै नेपाली महिलाहरू निजी कम्पनीमा काम गर्छन्, जसका कारण कोरोना भाइरसको संक्रमण बढे उनीहरूको पनि अवस्था नाजुक हुन्छ । अहिलेसम्म यूएई सरकारले कोरोना भाइरस संक्रमणको स्वास्थ्य परीक्षण नि:शुल्क गरिरहेको उनको भनाइ छ ।

यूएईमा हालसम्म ४ जना नेपालीमा कोरोना भाइरसको संक्रमण देखिएको त्यहाँको स्वास्थ्य मन्त्रालयले पुष्टि गरेको छ, जसमा २ जना निको भएर कम्पनी फकिर्एका छन् भने २ जना अस्पतालमा उपचारत छन् । यसैगरी कतारबाट जीवन बराइली जेल बस्न सजिलो हुने तर बन्द कोठामा बस्दा गाह्रो भएकोे बताउँछन् । कतार हुँदै नेपाल गएका सबैलाई कोरोना भाइरसको संक्रमण भएको सुन्दा धेरै डर लागेको उनले बताए ।

‘समाचार सुन्दा त कतारमा कोरोना भाइरसको संक्रमण फैलाउन देश हो कि जस्तो लाग्छ । त्यही भएर डरले कोठाबाहिर निस्किएका छैनौँ । हामी एउटा रुममा ४ जना बसेको छौँ’, उनले भने, ‘२ पटक कम्पनीले कोरोना भाइरसको स्वास्थ्य परीक्षण गराएको छ । कोठामा पानी, खानेकुरा र औषधिको व्यवस्था गरेको छ । तर, डरले गर्दा खाना पनि रुच्न छाड्यो ।’

एउटा कोठाका मान्छेलाई अर्को कोठाका मान्छेसँग भेटसमेत नदिएको उनको भनाइ छ । कतारमा रोजगारीमा कार्यरत नेपालीमा हालसम्म कोरोना भाइरसको संक्रमण देखापरेको छैन, जसका कारण कतारमा रहेका नेपालीमा कोरोना जोखिम कम छ ।

कोरोना भाइरसका कारण ३ हप्तादेखि कम्पनीले दिएको टहरामा बसेको कुवेतदेखि सल्यानका दीपक मगर बताउँछन् । नेपालमा गोठमा बस्न सजिलो भएको थियो । तर, कम्पनीको टहरामा बस्न गाह्रो भएको उनको भनाइ छ ।

नेपाली श्रमिकको मुख्य श्रम गन्तव्य खाडीका ६ देश (साउदी, कतार, यूएई, कुवेत, बहराइन, ओमान) र मलेसियामा पनि कोरोना भाइरस संक्रमित बढिरहेका छन् । कोरोना संक्रमणको जोखिमसँगै रोजगारीका लागि यी देशमा करार अवधि र भिसा सकिएका, ओभर स्टे भएका, कागजातविहीन भएर काम गरिरहेका, पर्यटक भिसामा गएर काम गर्दै आएका नेपाली श्रमिकलाई अर्को समस्या थपिएको छ, जसका कारण उनीहरू हाल सेल्फ क्वारेन्टाइजमा बसेका छन् ।

पर्यटक भिसामा गएर अथवा श्रम अवधि सकिए पनि नेपाल नफर्किई रोजगारी गरिरहेका नेपालीलाई कोरोनाका कारण समस्या हुने देखिन्छ । विदेशमा करिब ७ लाख नेपाली अवैध रूपमा बसिरहेको सरकारी अनुमान छ ।

प्रकाशित मिति: आइतबार, चैत १६, २०७६ १३:२४