लकडाउनको पाँचौँ दिन : सडक सुनसान, आकाश व्यस्त

A+ A A-

विश्वव्यापी रूपमा फैलिएको कोरोना भाइरसको फैलावट रोक्नका लागि नेपाल अहिले लकडाउनमा छ ।

लकडाउनका कारण सडक र बजार मात्र होइन, आकाश पनि सुनसान थियो । शनिबार लकडाउनको पाँचौँ दिन चौथो दिनको तुलनामा थप सुनसान छन्- सडक र बजार । कारण, शनिबार भएर पनि होला । शुक्रबार थप १ जना संक्रमित बढेको कारण थप संयमता अपनाइएको पनि हुन सक्छ ।

तर, सडक सुनसान हुँदा आकाश भने शनिबार तुलनात्मक रूपमा व्यस्त भयो । नियमितको तुलनामा आन्तरिक उडान ७ प्रतिशत हो भने बाह्य उडान ३ प्रतिशत हो । तर, २ दिन आन्तरिक र ३ दिन बाह्य उडान शून्य भएको आधारमा व्यस्त मानियो शनिबारको आकाश ।

नेपाल नागरिक उड्डयन प्राधिकरणका प्रवक्ता राजकुमार क्षेत्रीका अनुसार ७ दशक लामो आन्तरिक उडान र ६ दशक लामो बाह्य उडानमा कहिल्यै खालि नभएको नेपाली आकाशमा २ दिन आन्तरिक र ३ दिन बाह्य उडान शून्य भए ।

लकडाउनका बीच आवश्यकताका आधारमा १३ चैतबाट केही आन्तरिक विमान कम्पनीले फ्याट्टफुट्ट उडान गरे । १३ चैतमा तारा र बुद्ध एयरले १-१ वटा उडान भरे ।

१४ चैतमा तारा र यतिले १-१ उडान भरे तर शनिबार आन्तरिक उडानमा नेपाल, तारा, समिट, यति मात्र होइन, २ वटा उडान हेलिकोप्टरका पनि भए । लुक्लामा मात्र ११ उडान भए ।

विमानस्थल कार्यलयका अनुसार नेपालगञ्ज र पोखरामा पनि उडान भएको छ । कोरोना संक्रमित आशंकामा सङ्कलन गरिएका नमुना लिन पुगेको नेपाल एयरलाइन्सको विमान नेपालगञ्जको राँझा विमानस्थलमा ठूलो दुर्घटना हुनबाट आजै जोगियो ।

नेपाल एयरले लुक्लामा ५ वटा उडान गरेको छ । त्यस्तै, ताराले ३ र समिटले १ उडान गर्ने तालिका लुक्लामा छ ।