कोरोना कहर : मर्कामा मिर्गौलापीडित

A+ A A-

नवलपरासी सार्दीकी वीरकुमारी खाम्चा बुटवलको गौतमबुद्ध सामुदायिक मुटु अस्पतालमा हप्तामा २ पटक मिर्गौला डायलाइसिस गर्न आउनुपर्छ । ३९ वर्षीया खाम्चा १ महिनाअघि मिर्गौला फेल भएपछि अहिले नियमित मिर्गौला डायलाइसिसमा छन् ।

मिर्गौला डायलाइसिस गर्न नियमित बुटवल आउने उनी देश लकडाउन भएसँगै कोठा भाडा लिएर रामनगर बस्न थालेकी छन् । श्रीमान कुलबहादुर खाम्चा र छोरी धनिश्वरा खाम्चासँगै कोठा भाडामा बस्न थालेको १५ दिन मात्र भयो ।

सार्दीमा ससुरा, सासू हुनुहुन्छ, गाडी केही नचलेपछि कोठा भाडामा बसेर भए पनि नियमित मिर्गौला डायलाइसिसको उपचार गराइरहेकी छु , उनले भनिन् ।

उनले सार्दीबाट हप्तामा २ पटक आउँदा एम्बुलेन्समा आउनुपर्ने र त्यसका लागि खर्च धान्न नसक्ने भएपछि कोठा भाडामा लिएर बसेको उनले बताइन् ।

त्यस्तै, कपिलवस्तु भेलाहीकी सुकुनी थरुनीले पनि बुटवलको गौतमबुद्ध सामुदायिक मुटु अस्पतालमा हप्तामा ३ पटक मिर्गौला डायलाइसिस गर्नुपर्छ । डेढ वर्षदेखि नियमित मिर्गौला डायलाइसिस गर्दै आएकी थरुनी हाल भने अस्पतालमै बसेर डायलाइसिस गर्दै आएका छन् ।

सरकारले लकडाउन गरेपछि सवारी साधन नपाइएको र एम्बुलेन्समा आउन-जान खर्चले नपुग्ने भएपछि हस्पिटलमै बसेर मिर्गौला डायलाइसिस गर्नुपरेको उनले बताइन् ।

त्यस्तै, रूपन्देही रुद्रपुर हरैयाकी पवित्रा क्षेत्री पनि लकडाउनमा सवारी साधन नचल्दा नियमित मिर्गौला डायलाइसिसमा समस्या भएको बताउँछिन् । हप्तामा २ पटक सोमबार र शुक्रबार डायलाइसिस गर्दै आएकी क्षेत्रीले अहिले एम्बुलेन्स रिजर्भ गरेर अस्पालमा आउने गरेको बताइन् ।

बाँच्नु त पर्‍यो, ऋण-धन गरेर भए पनि मिर्गौला डायलाइसिसका लागि आउने गरेकी छु , उनले भनिन् । २ वर्षदेखि नियमित डायलाइसिस गर्दै आएकी क्षेत्रीले अब पनि लकडाउन लम्बिए आफन्तकहाँ बसेर डायलाइसिस गर्ने सोच बनाएकी छन् ।

लकडाउनको समयमा सार्वजनिक गाडी नचल्दा खाम्चा, थरुनी र क्षेत्री जस्तै धेरैले घरदेखि टाढा अस्पताल पुग्न समस्या भोग्नुपरेको छ । हाल मुटु अस्पतालमा प्रत्येक दिन १ सय २० जनाले नियमित डायलाइसिस गर्दै आएका छन् ।

गौतमबुद्ध सामुदायिक मुटु अस्पताल बुटवलका अध्यक्ष एजाज आलमले लकडाउनको समयमा नजिकका बिरामीहरूका लागि घरमै गएर भए पनि मिर्गौला डायलाइसिस भइरहेको बताए । अस्पतालले लकडाउन हुनुपूर्व एउटा बिरामीलाई ४ घण्टा डायलाइसिस गर्ने गरेकामा अहिले ३ घण्टा मात्र उपचार गरेको बताएको छ । त्यस्तै, बिहान ७ बजेदेखि राती ११ बजेसम्म मात्र हाल सेवा प्रदान गरिएको अध्यक्ष आलमको भनाइ छ ।

गौतमबुद्ध सामुदायिक स्वास्थ्य संस्थाबाट सञ्चालित मुटु अस्पतालले बुटवल, पाल्पा र लमही गरेर ३ सय ५० जनाको मिर्गौला डायलाइसिस गर्दै आएको छ । प्रदेश ५ मा ६ सय जनाभन्दा बढी डायलाइसिसका बिरामी लकडाउनका कारण सर्वाजनिक सवारी साधन नचल्दा त्यसको प्रत्यक्ष मारमा परेका छन् । गरिब तथा विपन्न परिवारहरू, सार्वजनिक यातायात चढेरसमेत नियमित अस्पतालमा आउन नसक्नेहरू अहिले ऋण काढेरै एम्बुलेन्स रिजर्भ गरेर भए पनि डायलाइसिस गर्नुपर्ने बाध्यतामा छन् ।

हाल प्रदेश ५ मा ६ सय ५० जना मिर्गौला डायलाइसिसका बिरामी छन् । नेपालगञ्ज मेडिकल कलेजमा ५९, भेरी अस्पतालमा १४, राप्ती स्वास्थ्य विज्ञान प्रतिष्ठानमा १९, राप्ती प्रादेशिक अस्पतालमा २१, युनिर्भसल मेडिकल कलेजमा ७१ जना, क्रिमसन अस्पतालमा ३७, सिद्धार्थनगर सिटी अस्पतालमा ४६, पाल्पा मेडिकल कलेजमा १७, गौतमबुद्ध सामुदायिक मुटु अस्पतालले लमही, पाल्पा र बुटवलमा गरी ३ सय ५० जना र लुम्बिनी प्रादेशिक अस्पतालमा २० जना डायलाइसिसका बिरामीले उपचार गराइरहेका छन् ।

डायलाइसिसको कार्ड देखाउँदा जान दिइँदैन

सरकारले डायलाइसिसको उपचार नि:शुल्क गरेको छ । अस्पतालहरूले डायलाइसिस गर्ने बिरामीहरूको कार्ड बनाएर उपचार गरिरहेका छन् । तर, डायलाइसिस गर्ने बिरामीहरूले लकडाउनको समयमा आफ्नो सवारी साधन भएकाहरूले समेत अस्पतालमा आउन पाएका छैनन् ।

हामी कसैसँग अनुरोध गरेर अस्पतालमा आउन सक्थ्यौँ तर हामीसँग उपचारको कार्ड भए पनि प्रशासनले अनुमति नदिँदा एम्बुलेन्स रिजर्भ गरेर आउनुपरेको छ , रुद्रपुर हरैयाकी पवित्रा क्षेत्रीले भनिन् ।

उनले नियमित मिर्गौला डायलाइसिस गर्न आउने बिरामीको कार्ड हेरेर उपचारका लागि सवारी साधनमा आउन दिनुपर्ने बताइन् ।

प्रधानमन्त्रीसमेत मिर्गौलाको बिरामी हुनुहुन्छ, उहाँले हाम्रो पीडा किन बुझ्नुहुन्न ? , उनले भनिन्, लकडाउन अझ लम्बियो भने हामी कहिलेसम्म एम्बुलेन्स रिजर्भ गरेर यहाँ आउने ?

प्रकाशित मिति: शनिबार, चैत १५, २०७६ १२:००