कोरोना महामारीविरुद्ध वैश्विक लडाइँ आवश्यक : चिनफिङ

A+ A A-

आफ्नो देशबाट संसारभरि महामारी फैलिएको आरोपको सामना गरिरहेका चीनका राष्ट्रपति सी चिनफिङले कोरोना भाइरसविरुद्ध वैश्विक लडाइँको आवश्यकतामाथि जोड दिएका छन् । उनले कोरोना भाइरसले विश्वव्यापी अप्रत्याशित स्वास्थ्य संकट उत्पन्न गरेको बताए ।

उनले विश्वव्यापी अर्थव्यवस्था मन्दीमा जानबाट बचाउनका लागि व्यापारिक अवरोध हटाउन र कर कटौतीको प्रस्तावसमेत गरेका छन् ।

कोरोना भाइरस (कोभिड–१९) का विषयमा छलफलका लागि बोलाइएको जी–२० को शिखर सम्मेलनलाई भिडियोमार्फत सम्बोधन गर्दै उनले यो महामारीविरुद्ध वैश्विक लडाइँ लड्नका लागि सबैमा दृढ संकल्पको आवश्यकता रहेकोमा समेत जोड दिए ।

उनले भने, ‘यो भाइरस कुनै सीमाभित्र मात्रै सीमित छैन । जुन प्रकोपसँग हामी जुधिरहेका छौँ, यो हाम्रो दुश्मन हो । संसारले यस्तो महामारी यसअघि कहिल्यै देखेन । यसमाथि नियन्त्रण र यसको उपचारका लागि मजबुत वैश्विक नेटवर्क तयार गर्नका लागि हामी सबै मिलेर काम गर्नुपर्छ ।’

समयमै जानकारी नदिएको भनेर चीनमाथि अमेरिकाले आरोप लगाइरहेको समयमा चीनका राष्ट्रपति सीको यस्तो भनाइ बाहिर आएको हो ।

उनले जी–२० राष्ट्रहरूलाई कोरोना भाइरस नियन्त्रणका लागि तीव्र रूपमा काम गर्न समेत सुझाव दिएका छन् । उनले कोरोना भाइरसको चपेटामा परेका देशहरूलाई सहयोग गर्न र यसको खोप आविष्कार गर्नका लागि संयुक्त रूपमा काम गर्न चीन तयार रहेको उनले बताए ।

उनले चीनले ‘कोभिड–१९ नलेज सेन्टर’ स्थापना गरेको पनि जानकारी दिए । सीले यो केन्द्र सबैका लागि खुला रहेको बताए ।

प्रकाशित मिति: शुक्रबार, चैत १४, २०७६ ०९:३१