टोलमा नयाँ मान्छेलाई ‘प्रवेश निषेध’

A+ A A-

कोराना भाइरसको संक्रमण फैलिन नदिन सरकारले ‘लकडाउन’ गरेको आज तेस्रो दिन । राष्ट्रपति, प्रधानमन्त्री, प्रदेश, स्थानीय तह सबैले जनतालाई घरभित्र बसेर लकडाउनको पूर्ण पालना गर्न आग्रह गरेका छन् ।

कतिपय स्थानमा भने टोलमा नयाँ मान्छेलाई ‘प्रवेश निषेध’ गरिएको छ । प्रसंग हो, बुटवल देवीनगरको ।

देवीनगर–बुद्धनगर जोड्ने पुल नजिकै रहेका टोलमा मानिसको प्रवेश हुन नदिन स्थानीयवासीले बाटो अवरोध गरेका हुन् । लकडाउन भएपछि टोलमा मानिसहरूको प्रवेश रोक्न कतिपय टोलमा रसीले बाटो छेकेका छन् भने कतिपय स्थानमा बाँसका घारा तेस्रो पारेर राखिएको छ ।

स्थानीय जगत रानाले काम नै नहुँदा पनि कतिपयले बाइक कुदाएपछि टोल विकास संस्थाको सहकार्यमा पथका व्यक्तिहरू मिलेर बाटो अवरुद्ध गरेको बताए । अहिले देवीनगरका भित्री सडकमा स्थानीयवासीले यसैगरी बाटो बन्द गरेको उनले बताए । देवीनगरका ५/७ ठाउँमा बाटो अवरुद्ध गरिएको छ ।साँझको समयमा बाटोमा बढी भिडभाड हुने भएपछि बाटो छेकबार गर्नु परेको अर्का स्थानीय नीर श्रेष्ठले बताए । स्थानीय प्रशासन र सरकारले बारम्बार घरभित्र बस्न आग्रह गरे पनि जनताले अटेर गरेपछि बाध्य भएर बाटोमा अवरोध सिर्जना गर्नु परेको उनको भनाइ छ ।

तेस्रो दिन सुनसान बुटवल

लकडाउनको तेस्रो दिन पनि बुटवलवासीले घरभित्रै बसेर सरकारलाई सघाएका छन् । पहिलो र दोस्रो दिनको तुलनामा सवारी साधन र मानिस घर बाहिर आउन कम भएको छ । हिजो मात्रै जिल्लाको सुरक्षा संयन्त्रको बैठकले तरकारी तथा खाद्यान्य पसल सञ्चालन गर्न दिने निर्णयअनुसार फाटफुटट रूपमा बजारमा पसल खुलेका छन् ।

स्थानीय प्रशासनले समेत घरबाट पसलसम्म आउजाउका लागि मात्र पास व्यवस्था गरेको छ । इलाका प्रशासन कार्यालय बुटवलका शाखा अधिकृत तुल्सीराम भण्डारीले पहिलो दिनको तुलनामा सवारी पास लिनेको संख्या बढेको बताए ।पहिलेको तुलनामा सवारी जाँचमा कडाइ भएपछि मानिसहरूले सवारी पास बनाउन प्रशासनमा आउने गरेको उनको भनाइ छ ।

एम्बुलेन्स, हस्पिटलका सवारी, प्रेस, अत्यावश्यक सवारी साधनबाहेक बजार पूर्ण रूपमा ठप्प छ । मुख्यमन्त्री शंकर पोखरेलले हिजो बुधबार प्रदेशवासीलाई सन्देश दिँदै जनताका लागि खाद्यान्य व्यवस्थापन भइरहेको समेत बताएका थिए ।

प्रकाशित मिति: बिहीबार, चैत १३, २०७६ १८:३३