प्रशासनका कारण अत्यावश्यकीय सेवा प्रवाहमा समस्या भएको गुनासो

A+ A A-

विश्वव्यापी रूपमा फैलिएको कोरोना भाइरस संक्रमण फैलिन नदिन प्रशासनले कडाइ गरेपछि अत्यावश्यकीय सेवाअन्तर्रगत पर्ने व्यवसायीले प्रहरी प्रशासनका कारण सेवा प्रवाहमा समस्या भएको आरोप लगाएका छन् ।

सरकारले अत्यावश्यकीय सेवामा सूचीकृत गरेका कृषि जन्य उत्पाद, स्वास्थ्य सेवा, खानेपानी, दैनिक उपभोग्य वस्तु, होटल व्यवसायलगायतका व्यवसायीले अनावश्यकरूपमा प्रहरी प्रशासनले दुःख दिएको आरोप लगाउका हुन् ।

प्रशासनले पोल्टी र कृषि जन्य उत्पादन ओसारपसार गर्न पास नचाहिने बताएपछि सुरक्षा जाँचमा खटिने प्रहरीमा आफूहरूले दुःख पाएको पोल्टी व्यवसायी विजय पाण्डेले बताए । ‘पोल्टी व्यवसायीले गाईवस्तु र कुखुराको दाना ओसारपसार गर्दासमेत चेकिङमा खटिने प्रहरीले पास देखा भन्छन्’ उनले भने ‘तर, जिल्ला प्रशासनमा जाँदा कृषजन्य उत्पादन र अन्य अत्याबस्यकीय सेवालाई पास चाहिँदैन भन्छ, पास बनाइदिँदैनन् ।’ अब कसरी सेवा दिन सकिन्छ ? उनले प्रति प्रश्न गरे । सुरक्षा जाँचमा खटिने प्रहरीले गाडीको चाबी खोसेर ब्यवसायीलाई प्रताडित बनाएको उनले बताए ।

राष्ट्रिय व्यावसायिक पशुपालन तथा दुग्ध उत्पादक कृषक समाज नेपाल गण्डकी प्रदेशका सचिव जीवनकुमार अधिकारीले स्थानीय प्रशासन बीचको समन्नयको अभाबमा दुग्ध उत्पादक कृषकले विभिन्न समस्या भोग्न बाध्य भएको बताए । कृषकले उत्पादन गरेका दुग्ध जन्य उत्पादन बजार ल्याउदा सुरक्षा जाँचमा खटिने प्रहरीबाट गाडी रोक्नेलगायतका समस्या देखिएको बताए । प्रशासनले वास्तविक कृषकको पहिचाहन गरेर पासको व्यवस्था गर्नुपर्ने उनको भनाइ छ। गाईवस्तुको दानापानी र पराललगायतका सामाग्री धुवानीमा समेत समस्या देखिएको अधिकारीले बताए । ‘व्यवसायीका समस्यामा स्थानीय प्रशासन गम्भीर बन्नु पर्छ’ उनले भने ‘आफ्नो स्वास्थ्यबारेमा गम्भीर बनेर व्यवसायीले पनि गलत कार्य गर्न हुँदैन ।’

उपभोक्ता मञ्च गण्डकीका अध्यक्ष कमिलनाथ कोइरालाले सरकारले तोकेका अत्यावश्यकीय वस्तुको सेवा प्रवाहलाई सहज बनाउने उद्देश्यले स्थानीय प्रशासनसँग आग्रह गरेको बताए । उनले सेवा प्रवाहमा समस्या देखिएपछि बैठक नै बसेर अत्यावश्यकीय सेवालाई सहज बनाउने विषयमा छलफल गरेको बताए । ‘अतिआवश्यकीय सेवा प्रवाहमा देखिएका समस्यामा केन्द्रीत भएर छलफल गरेका छौँ’ उनले भने । ‘छलफलमा व्यवसायीका विभिन्न समस्याका बारेमा पनि ध्यानाकर्षण गराएका छौँ । यसलाई समाधान गर्न प्रशासन तयार देखिएको छ ।’

अध्यक्ष कोइरालाले बजारमा अहिलेसम्म कुनै पनि वस्तुको थोक मूल्यमा मूल्यवृद्धि नभएको बताए । ‘बजारमा खुद्रा व्यवसायीले आफूखुशी मूल्यवृद्धि गरेको देखियो’ उनले भने ‘यसलाई रोक्न स्थानीय प्रशासनले मञ्चले अनुगमनलाई निरन्तरता दिइराखेको छ ।’

कास्कीका प्रमुख जिल्ला अधिकारी ज्ञानप्रसाद ढकालले अत्यावश्यकीय वस्तुको ओसारपसारमा समस्य नरहेको बताए । केही व्यवसायले एउटा प्रयोजनलाई देखाएर अन्य कार्य गरेका कारण सुरक्षा जाँचमा खटिने प्रहरीले सवारी नियन्त्रणमा लिएको बताए । ‘व्यवसायीले गलत प्रयोजनमा प्रयोग गर्नु भएन’ उनले भने ‘यसमा प्रशासन थप सजग बन्ने छ ।’

प्रकाशित मिति: बिहीबार, चैत १३, २०७६ १२:२०