बजारमा तरकारी र फलफूलकाे अभाव, ७० प्रतिशत आयात घट्यो

A+ A A-

बजारमा हरिया सागसब्जी, आलु तथा प्याज पाउनै मुस्किल हुन थालेको छ । सरकारले सोमबारदेखि गरेकाे ‘लकडाउन’का कारण बाहिरबाट तरकारी र फलफूलको आपूर्ति ठप्प भएपछि बजारमा अभाव हुने थालेको हो ।

उपत्यकामा तरकारीको अभाव हुन नदिनका लागि कालिमाटी फलफूल तथा तरकारी बजार विकास समितिबाट दैनिक ८ सय टनसम्म तरकारी बिक्री हुने गरेको थियो । साथै बल्खुबाट करिब दैनिक ३ देखि ५ सय टन फलफूल बिक्री हुने गरेको छ ।

कोरोना भाइरसका कारण सरकारले देश ‘लकडाउन’ गरेपछि तरकारी र फलफूल आपूर्ति ठप्प छ । जसकारण बजारमा तरकारी र फलफूल अभाव हुने समितिले जनाएको छ ।

दैनिक आवश्यक करेला, प्याज, गोलभेँडा, भिन्डी, फर्सी, आलु, बन्दाकोपी, फुलकोपी, लसुन, धनिया, खुर्सानी, काँक्रो, हरियो साग, भन्टालगायत फ्रेस तरकारीको बजारमा अभाव हुने थालेको हाे ।

काउलीका प्रकार, आलु, टमाटर, हरियो साग, चुच्चे करेला, तिते करेला, घिरौला, हरियो काँक्रो लगायत उच्च माग हुने गरेको समितिले जनाएको छ । यस्ता तरकारी आयात नै रोकिएपछि तरकारको अभाव हुन थालेकाे समितिले जानकारी दिएको छ ।

कालिमाटी फलफूल तथा तरकारी बजार विकास समितिका एक कर्मचारीका अनुसार बजारमा ३ दिनभन्दा धेरै धान्न सक्ने तरकारी स्टोर छैन । जसकाकारण अब दुई दिनपछि तरकारी फलफूल आयात नभए बजारमा अभाव हुने ती कर्मचारीले जानकारी दिए ।

धेरै मानिसले लकडाउन हुनु अगाडि नै उपत्यका छाडेका कारण आजसम्म तरकारीको अभाव भएको छैन । सामान्य समयमा जस्तो हुने हो भने तरकारी बिहीबारबाट नै अभाव हुने अवस्था आउने उनले जानकारी दिए ।

अभाव हुँदैन सहज बनाउने तयारीः समिति

बजारमा तरकारीको अभाव हुन नदिन र प्रभावकारी बनाउनका लागि आफूहरूले पहल गरिरहेको कालिमाटी फलफूल तथा तरकारी बजार विकास समितिका उपनिर्देशक विनय श्रेष्ठले बताएका छन् ।

तरकारी जस्तो अतिआवश्यक वस्तु आपूर्तिमा सरकारले ‘लकडाउन’ नगरेका कारण बजारमा अभाव नहुने समितिका उपनिर्देशक श्रेष्ठको दाबी छ ।

कालिमाटी बजारमा आएका तरकारी बिक्री भएको अवस्थामा आफूले आपूर्ति जति पनि गर्ने भनेर तरकारी व्यवसायीलाई सहज बनाउन आग्रह गरेको उपनिर्देशक श्रेष्ठको भनाइ छ ।

शानिबारदेखि बजारमा ३ सय टनभन्दा बढी तरकारी पठाउने तयारी भइरहेको उनले दाबी गरे ।
समितिकाअनुसार हाल खुद्रा व्यापारी तरकारी लिन आएका छैनन् ।

सामान्य दिनमा कालिमाटीमा ८ सय टन आउने गरेकोमा मंगलबार ३ टनमात्र आएको थियो । बुधबार र बिहीबार ‘लकडाउन’ को कारण तरकारी आयात भने जति नभएको समितिले जनाएको छ । सरकारले बिहीबारदेखि अतिआवश्यक सामग्री आपूर्ति र ढुवानीमा रोक नलगाउने निर्णय गरिसकेकाे छ ।

उपत्यकामा भारत र चीनसहित चितवन, भक्तपुर, ललितपुर, काभ्रे, धादिङ, वीरगञ्ज, नुवाकोट, सर्लाही, सिन्धुपाल्चोक, पर्सा, तनहुँ, झापा, गोरखा तथा दोलखा लगायत जिल्लाबाट पनि तरकारी भित्रिने गरेको छ । साथै फलफूल पनि भारत तथा चीन र तरकारीका जिल्लाबाट भित्रिने गरेको समितले जनाएको छ ।

कोरोनाका कारण आयात हुने मुख्य नाका नै बन्द छन् । जसकारण सामान्य समयभन्दा ७० प्रतिशत कम तरकारी भित्रिएकाे समितिले जनाएको छ । यस्तै उपत्यका भित्रिने फलफूल पनि घटेको छ ।

हाल भारत र चीनबाट आउने फलफूल बन्द नै भएको कालिमाटीका एक व्यापारीले बताए । भारत र चीनबाट दुई साता अघिदेखि नै फलफूल आउन रोकिएको उनको भनाइ छ ।

प्रकाशित मिति: बिहीबार, चैत १३, २०७६ ११:४९