उपभोक्तालाई राहत : वाणिज्य चुह्लो लिएर आउँछ, विद्युतमा छुट हुन्छ

A+ A A-

सरकारले आमउपभोक्ताको भान्सा सहज गर्नका लागि विद्युतीय चुह्लो प्रयोग गर्न अधिकतम प्रोत्साहनको प्याकेज ल्याएको छ । नेपाल-भारत दुवै देशमा लकडाउन भएको अवस्था र नेपालमा विद्युतको खपत कम तथा ग्यासको खपत बढी भएको सन्दर्भलाई समेत हरेर यस्तो प्याकेज घोषणा गर्न लागिएको हो ।

ऊर्जा, जलस्रोत तथा सिँचाइमन्त्री वर्षमान पुनले उपभोक्तालाई अधिकतम छुट दिने योजनासहित प्याकेज तयारी गरिएको शिलापत्रलाई जानकारी दिएका छन् । उनले बिहीबार बिहानै नेपाल विद्युत प्राधिकरणका कार्यकारी निर्देशक कुलमान घिसिङलाई सम्पर्क गरेर छुटका योजना ल्याउन र तत्काल कार्यान्वयनमा लैजाने वातवरण सिर्जना गर्न निर्देशन दिएको बताए ।

५० युनिटदेखि डेढ सय युनिटमा इन्डक्सन चल्दो रहेछ , मन्त्री पुनले भने, ५० देखि डेढ सय युनिटसम्म ३० लाख ग्राहक हुँदो रहेछ । २० प्रतिशत छुट दिँदा औसत २४ करोड लाग्दो रहेछ । हामीले यो छुट दिन लागेका हौँ ।

पुनका अनुसार ५० देखि डेढ सय युनिट खपत गर्नेलाई २० प्रतिशतका दरले छुट दिने व्यस्था गरिएको छ ।

उच्चस्तरीय संयन्त्र समितिको बुधबारको बैठकले इन्डक्सन चुह्लो र विद्युतमा महसुल छुट दिने निर्णय लिएको थियो । यसका लागि अर्थ, ऊर्जा, जलस्रोत तथा सिँचाइ र उद्योग, वाणिज्य तथा आपूर्ति मन्त्रालयका बीच समन्वय गरेर तत्काल निर्णय लिने बताइएको थियो ।

मन्त्री पुनका अनुसार वाणिज्य मन्त्रालयको टोलीले घरघरमा इन्डक्सन चुह्लो लिएर आउनेछ । चुह्लोमा समेत उपभोक्तालाई छुट हुने जनाइएको छ । अहिले ४ हजार रुपैयाँ इन्डक्सन चुह्लोको मूल्य रहेको छ । २० प्रतिशतको भन्सार महसुल छुटमा आएसँगै कम्तीमा २० प्रतिशत छुट हुनेछ ।

अहिलेको यो निर्णयले विद्युतमा आत्मनिर्भर बन्दै गएको नेपाललाई दीर्घकालसम्म सहयोग पुग्ने अपेक्षा गरिएको छ भने नेपालको व्यापार घाटा घटाउन पनि सहयोग पुग्ने बुझाइ विद्युत प्राधिकरणको रहेको छ ।

सामान्य अवस्थामा विद्युतको माग १२ सय मेगावाट रहेकामा अहिले लकडाउनको समयमा ९ सय मेगावाट पनि नरहेको नेपाल विद्युत प्राधिकरणले जनाएको छ ।

प्रकाशित मिति: बिहीबार, चैत १३, २०७६ ११:०४