दक्षिण कोरियाले विना लकडाउन यसरी गर्‍यो कोरोना नियन्त्रण

A+ A A-

यतिबेला विश्व नै कोरोना भाइरसको महामारीविरुद्ध लडिरहेको छ । कतिपय देश नै लकडाउन गरिएको छ । तर, दक्षिण कोरिया यस्तो देश हो, जसले विना लकडाउन कोरोना भाइरसलाई नियन्त्रण गर्न सफल भयो ।

चीनपछि सबैभन्दा बढी कोरोना संक्रमित दक्षिण कोरियामा थिए र तीव्र गतिमा कोरोना भाइरस संक्रमण फैलिएको थियो । तर, उसले विना लकडाउन कोरोना भाइरसलाई नियन्त्रणमा लियो ।

कोरोना भाइरसको बढ्दो संक्रमण नियन्त्रण गर्नका लागि उसले थर्मल इमेजिङ क्यामेरा लगाउनेदेखि मानिसहरूलाई दाहिने हातको साटो देब्रे हातको प्रयोग गर्न सिकायो ।

दक्षिण कोरियामा लगातार सेनाको सहयोगमा सडकलाई स्यानिटाइज गरियो र धर्मगुरुहरूलाई समेत आफ्ना अनुयायीको ज्वरो नाप्न अनिवार्य गरियो ।

चीनपछि सबैभन्दा बढी संक्रमण फैलिँदै गरेको दक्षिण कोरियामा ४ सातापछि यतिबेला सबैभन्दा कम नयाँ संक्रमित भेटिने गरेका छन् ।

दक्षिण कोरियामा कोरोना भाइरसबाट करिब ९ हजार संक्रमित रहेका छन् भने १ सय २६ जनाको मृत्यु भएको छ । यस्तै, ३ हजार ७ सय ३० जना निको भएर घर फर्किसकेका छन् । ९ मार्चसम्म संक्रमितको संख्या ८ हजार पुगिसकेको थियो तर नयाँ संक्रमितको संख्या विस्तारै घट्दै गएको छ ।

बजार बन्द गरिएन

कोरोना भाइरसविरुद्ध दक्षिण कोरियाको लडाइँ विश्वका लागि नयाँ मोडलको रूपमा हेरिएको छ । दक्षिण कोरिया संक्रमित संख्याका आधारमा विश्वमा १०औँँ नम्बरमा रहेको छ तर यहाँ न कुनै शहर लकडाउन गरियो, न त बजार बन्द भए ।

दक्षिण कोरियामा एक दिन पनि बजार बन्द गरिएन । सपिङ मल, स्टोर, साना-ठूला पसल नियमित रूपमा नै खुलेका थिए । मानिसलाई बाहिर निस्कन र अन्य गतिविधि गर्न पनि रोक लगाइएन ।

छिटो परीक्षण र उपचार

दक्षिण कोरियाले टेस्ट किटको उत्पादन बढायो । छिटो परीक्षण गरेर उपचार सुरु गरेका कारण मृत्यु हुनेको संख्या बढ्न पाएन । ६ सयभन्दा बढी परीक्षण सेन्टर खोलियो र सक्रिय भएर मानिसहरूको स्क्रिनिङ गरियो ।

शरीरको तापक्रम र घाँटीको जाँच १० मिनेटमा गरियो र १ घन्टाभित्र रिपोर्ट दिइयो । त्यहाँका हरेक टेलिफोन बुथलाई परीक्षणस्थल बनाइयो भने ५० भन्दा बढी ड्राइभिङ सेन्टरमा स्क्रिनिङको व्यवस्था गरियो ।

संक्रमणको जाँचका लागि सरकारले ठूला भवन, होटल, पार्किङ र सार्वजनिक स्थानमा नर्मल इमेजिङ क्यामेरा लगाइयो । होटलमा आउने मानिसको जाँच गरियो । ज्वरो जाँचपछि मात्र मानिसलाई होटलमा जान दिइयो ।

बायाँ चलाउनेलाई दायाँ, दायाँ चलाउनेलाई बायाँ हातको प्रयोग गर्न सल्लाह

स्वास्थ्य विशेषज्ञले संक्रमणबाट बच्न दायाँ हातको सट्टा बायाँ हात प्रयोग गर्ने सल्लाह दिए । जो बायाँ हातले काम गर्थे, उनीहरूलाई दायाँ हातले काम गर्न भनियो ।

मानिसहरूलाई मोबाइल चलाउने, ढोकाको ह्यान्डल समात्नेदेखि लिएर हरेक काम गर्नका लागि आफूले प्रयोग गरिरहेको भन्दा अर्को हात प्रयोग गर्न सल्लाह दिइयो । मानिसले हरेक समय जुन हातको प्रयोग गरेर काम गर्छ, त्यही हातले आफ्नो अनुहार पनि छुने भएका कारण उनीहरूलाई यस्तो सल्लाह दिइएको थियो ।

टेस्ट किटको उत्पादनमा वृद्धि

जनवरीमा पहिलो संक्रमण देखिएपछि दक्षिण कोरियाले तत्काल टेस्ट किट उत्पादन बढायो । २ सातामा जब संत्रमणका घटना बढे, तब तीव्र रूपमा सबै स्थानमा टेस्टिङ किट उपलब्ध गराइयो । अहिले दक्षिण कोरियामा दैनिक १ लाख टेस्ट किट उत्पादन भइरहेको छ र १७ देशमा निर्यात पनि गरिरहेको छ ।

अनुभवले गर्‍यो काम

सन् २०१५ मा दक्षिण कोरियामा मर्स (मिडिल इस्ट रेस्पिरेटरी सिन्ड्रोम) फैलिएको थियो । त्यस समयमा त्यहाँका मानिसले संक्रमणको डटेर सामना गरेका थिए । कोरोना भाइरसको रोकथामका लागि सूचनासम्बन्धी कानुनमा परिवर्तन गरियो ।

यसबाट कुनै स्थानमा कोरोनाका सम्भावित बिरामी फेला परेमा पनि फोनमा सतर्क रहन सन्देश पठाइयो । यसले गर्दा संक्रमित पत्ता लगाएर उपचार गर्न सजिलो भयो भने बाँकी मानिस संक्रमितबाट सतर्क भए । यसबाट कोरोना भाइरस थप फैलिन पाएन ।

प्रकाशित मिति: बिहीबार, चैत १३, २०७६ १०:५३