सार्क राष्ट्रमा कोरोना : कुन देश कति संक्रमित ? कतिले गुमाए ज्यान ?

A+ A A-

कोरोना भाइरसको संक्रमण दक्षिण एसियाली क्षेत्रीय सहयोग सङ्गठन (सार्क)मा समेत फैलिने क्रम बढ्दो छ । २ साताअघिसम्म सार्कका देशमा नदेखिएको कोरोना भाइरस हाल तीब्र गतिमा फैलिएको छ ।

गत डिसेम्बरमा चीनको हुबेई प्रान्तको बुहान शहरमा देखिएको कोरोना भाइरस हाल विश्वमा फैलिएको छ । हालसम्म १७ हजार १ सय ४७ जनाले कोरोना भाइरसका कारण ज्यान गुमाएको वर्ल्डओमिटर डटकमको तथ्याङ्कमा उल्लेख छ ।

कोरोना भाइरसको मापन गदै आएको वर्ल्डओमिटर डटकमका अनुसार सार्कका ८ वटै देशमा मंगलबार साँझसम्म १ हजार ६ सय १७ जनामा कोरोना संक्रमण पुष्टि भएको छ । त्यसमा १ सय ४ जना कोरोना संक्रमित निको भएर घर फर्किएको वर्ल्डओमिटरमा उल्लेख छ ।

यस्तै, सार्क देशबाट कोरोना भाइरसका कारण २२ जनाले ज्यान गुमाएका छन् । सार्क देशमा सबैभन्दा धेरै कोरोना भाइरसको संक्रमण पाकिस्तानमा देखिएको छ । हालसम्म पाकिस्तानमा ९ सय ८ जनामा कोरोना संक्रमण देखापरेको छ भने ७ जनाले ज्यान गुमाएका छन् ।

पाकिस्तानपछि भारतमा संक्रमित बढी छन् । भारतमा ५ सय ११ जनालाई संक्रमण पुष्टि भएको छ । त्यसमा १० जनाले ज्यान गुमाएका छन् । भारतपछि श्रीलंकामा कोरोना भाइरसको संक्रमण धेरै देखिएको छ । श्रीलंकामा १ सय जनामा कोरोना भाइरस देखिएको छ ।

सार्क देशका अन्य देशका तुलनामा नेपाल र भुटानमा कोरोना भाइरसको संक्रमण कम देखिएको छ । सार्क देश हाल लकडाउन छन् । यी देशमा व्यापार, हवाई उडान र यातायातसमेत बन्द छ ।

यसका कारण मानिसलाई एक स्थानदेखि अर्को स्थानमा आवतजावतसमेत रोक लगाइएको छ । सार्क क्षेत्रका नेताहरूसँगको संयुक्त भिडियो कन्फरेन्सलाई सम्बोधन गर्दै भारतीय प्रधानमन्त्री मोदीले कोरोना भाइरसविरुद्ध लड्न भारतले करिब १ अर्ब १८ करोड रुपैयाँ (१० मिलियन अमेरिकी डलर) आपतकालीन कोषमा राख्ने घोषणासमेत गरेका थिए ।

यो कोषमा नेपालले समेत १० करोड रुपैयाँ राख्ने निर्णय गरेको छ ।