नेपालको उड्डयन इतिहासमै पहिलो पटक खाली आकाश

A+ A A-

नेपालको हवाई उडान इतिहासमै पहिलोपटक मंगलबार आकाश पूर्णरूपमा खाली भएको छ । सरकारले अन्तर्राष्ट्रिय उडानको लागि आइतबार रातिदेखि प्रतिबन्ध लगाए पनि उल्लंघन गर्दै सोमबार पनि अन्तर्राष्ट्रिय उडान भरिएको थियो ।

जिरो प्यासेन्जर अनुमतिअन्तर्गत सोमबार उडान अनुमति दिएको थियो भने कार्गो र अन्य इमरजन्सी केसमा अनुमति दिइएको थियो । तर, सरकारले दिएको अनुमतिभन्दा बाहिर गएर विमान कम्पनीले प्यासेन्जर लिने लाने गरेका थिए ।

गत शनिबार प्रतिबन्धित देश नेदरल्याण्डका १ नागरिकलाई सिल्क एयरले लिएको थियो भने खाली उडानको अनुमति लिएको इत्तिहाद विमानले सोमबार २ जना नेपाली लिएर आएको थियो ।

तर, मंगलबार भने पूर्णरूपमा बन्द भएको नेपाल नागरिक उड्ययन प्राधिकरणका प्रवक्ता राजकुमार क्षेत्रीले जानकारी गराए। विशेष विमानको लागि वा कार्गोको लागि पनि विमानस्थल कार्यालय तथा प्राधिरकणबाट छुट्टै अनुमति लिनु पर्ने हुन्छ ।

अहिले उडानको लागि छुट्टै प्रकियाबाट अनुमति लिनु पर्ने हुन्छ, अहिलेसम्म कसैले अनुमति लिएको छैन क्षेत्रीले भने । आकाश पूर्णरूपमा खाली रहेको छ ।

स्वास्थ्य तथा विशेष सामग्री लिएर आउने भनेको चिनियाँ विमानले पनि अहिलेसम्म उडान अनुमति लिएको छैन । सोमबारसम्म कार्गो तथा इमर्जेन्सी उडानको लागि विशेष अनुमति व्यवस्था नगरिए पनि मंगलबारदेखि १८ चैतसम्म भने विशेष अनुमति लिनु पर्ने व्यवस्था गरेको छ ।

आन्तरिक उडानतर्फ पनि कुनै पनि विमानले अनुमति पाएका छैनन । सुरक्षा तथा स्वास्थ्यको र खाद्यन्न ओसार्नको लागि उडान अनुमति दिन सकिने भए पनि मंगलबार कसैले पनि अनुमति लिएका छैनन् ।

नेपालको अन्तर्राष्ट्रिय उडान सुरु भएको ६ दशक र आन्तरिक उडानको करिब ७ दशक लामो इतिहासमा अहिलेसम्म कहिले पनि यसरी पूर्णरूपमा आकाश बन्द गराइएका थिएन । देशमा भएको पटक-पटक राजनीतिक आन्दोलन तथा द्वन्द्वमा पनि नियमित उडान हुने गरेका थिए । विश्‍वभर फैलिएको कोराना भाइरसको संक्रमण फैलन नदिनको लागि नेपाल र अन्य राष्ट्रहरूमा पनि कडा कदम चालिएको छ ।

नेपाली आकाशबाट अधिकतम दैनिक रूपमा १२० अन्तर्राष्ट्रि मुभमेन्ट (एक राउन्ड) हुने गरेको थियो । अर्थात १२० पटक नेपालमा आउने र १२० पटक नेपालबाट उडान हुने गरेको थियो ।

त्यस्तै, आन्तरिक उडानमा अधिकतम ३०० मुभमेन्ट हुने गरेको थियो । तर, कोरोना भाइरसको आन्तरिक ट्राफिक ३० प्रतिशतसम्म र अन्तर्राष्ट्रिय ट्राफिक १० सम्ममा झरेको थियो । तर, सरकारले लामो दूरीको सवारी साधनमा रोक लगाउने निर्णय गरेपछि आन्तरिक उडान भरि भएका थिए ।

प्रकाशित मिति: मंगलबार, चैत ११, २०७६ १०:४९