वीरेन्द्रनगरस्थित खुल्ला मञ्चमा ४ सय बेडकाे क्वारेन्टाइन कक्ष निर्माण सुरु

वीरेन्द्रनगरस्थित खुल्ला मञ्चमा ४ सय बेडकाे क्वारेन्टाइन कक्ष निर्माण सुरु

A+ A A-

कोरोना भाइरस (कोभिड–१९) को सम्भावित जोखिम न्यूनीकरण गर्न वीरेन्द्रनगरस्थित खुल्ला मञ्चमा क्वारेन्टाइन कक्ष स्थापनाको काम सुरु भएको छ ।

आइतरबारदेखि नेपाल खुलामञ्चमा नेपाली सेनाले क्वारेन्टाइन कक्ष निर्माण थालेको हो । नेपाली सेनाको उत्तरपश्चिम पृतना हेडक्वार्टर नेवारेबारे खटिएको आर्मीको टोलीले ४ सय बेडसहितको क्वारेन्टाइन निर्माण थालेको हो ।

यसअघि शुक्रबार मुख्यमन्त्री महेन्द्रबहादुर शाहीको अध्यक्षतामा बसेको कोरोना भाइरस रोकथामसम्बन्धी उच्चस्तरीय समितिको बैठकले रेडियो नेपाल परिसर र मध्यपश्चिमाञ्चल विश्वविद्यालयमा गरी १ हजार शय्याको क्वारेन्टाइन कक्ष निर्माण गर्ने निर्णय गरेको थियो ।

तर रेडियो नेपालमा प्राविधिक रूपमा उपयुक्त नभएपछि सेनाले बुलबुलेमा क्वारेन्टाइन कक्ष निर्माणको काम अघि बढाएको थियो । बुलबुले पनि प्राविधिक हिसाबले उपयुक्त नभएपछि खुल्ला मञ्चमा निर्माणको काम सुरु गरिएको उत्तरपश्चिम पृतनाका उपरथी सरोजप्रताप राणाले जानकारी दिए ।

क्वारेन्टाइन कक्षका लागि पाता राख्ने काम सोमबारसम्म सकिने भए पनि बस्नका लागि बेड, ट्वाइलेट, बाथरुम, पानी, बिजुली बत्तीलगायतका कामको व्यवस्थापनका लागि केही दिन लाग्ने उनको भनाइ छ । अहिले निर्माणका अन्य सामग्रीहरू विभिन्न क्षेत्रबाट मगाउने काम भइरहेको भन्दै उनले केही दिनमै सामग्रीहरू आइसक्ने बताए । साथै उनले आवश्यकताअनुसार प्रदेश सरकारबाट बजेट प्राप्त हुने जानकारी दिए ।

‘प्रदेश सरकारको निर्णयअनुसार हाललाई ४ सय बेड बनाउनेछौँ,’ उनले भने, ‘आवश्यकताअनुसार बढाउन पनि सकिनेछ । एउटा बेडमा २ जना पनि बस्न सकिने बनाउन सकिनेछ भने अन्य बेडहरू पनि थप्न सकिनेछ ।’ क्वारेन्टाइन निर्माणमा २ सयभन्दा बढी नेपाली सेना जुटिरहेका छन् ।

साथै, उनले विश्वविद्यालयमा पनि क्वारेन्टाइनका लागि प्रक्रिया सुरु गर्ने तयारी भइरहेको बताए । मध्यपश्चिमाञ्चल विश्वविद्यालयले पनि क्याम्पस भवनहरूलाई क्वारेन्टाइन बनाउन सहमति दिइसकेको छ । प्रदेश सरकारले टेन्ट, पानी, शौचालयका लागि आवश्यक स्रोतसाधन जुटाएमा एक सातामै १ हजार शय्याका क्वारेन्टाइन कक्ष निर्माण गर्न तयार रहेको नेपाली सेनाको भनाइ छ ।

प्रदेश सरकारले १० दिनभित्र भारतमा रहेका कर्णालीवासीलाई फर्किन आह्वान गरिसकेकाले संक्रमित बिरामीलाई सिधै क्वारेन्टाइनमा राख्ने तयारी गरेको हो । भारतमा कोरोना भाइरसको संक्रमण दर बढेपछि त्यहाँका विभिन्न शहरमा बसोबास गर्दै आएका नेपालीहरू फर्किने क्रम बढ्दो छ । घर फर्कने कर्णालीवासीको बबईलगायतका नाकाहरूमा स्वास्थ्य परीक्षण गरी शंकास्पद बिरामीलाई क्वारेन्टाइनमा राखेर आवश्यक निगरानीका साथै औषधि उपचार गरिनेछ ।

मन्त्रालयमा साबुनपानी

कोराना संक्रमणलाई लक्षित गरेर मन्त्रालय तथा अन्य सरकारी कार्यालयहरूमा साबुनपानीले हात धोएर मात्रै प्रवेश गराउन थालिएको छ । कोराना संक्रमणबाट बच्चका लागि साबुनपानीले हात धुनु सबैभन्दा उपयुक्त उपाय भएको भन्दै मन्त्रालयहरूमा साबुन पानी राखिएको हो ।

जसअन्तर्गत सामाजिक विकास मन्त्रालयमा साबुनपानीले हात धोएर मात्रै प्रवेश गराउन थालिएको छ । जसमा मन्त्रालय जाने जोकोहीले पनि मन्त्रालयमा भित्र प्रवेश गर्दा हात धोएर जान पाउने, नत्र नपाउने मन्त्रालयले जानकारी दिएको छ । त्यति मात्रै नभएर हेल्थ डेस्क स्थापना गरेर सचेतनामूलक पर्चा पम्प्लेटहरू बाँड्नेलगायतका काम पनि सुरु गरिएको छ ।

कोराना संक्रमणलाई ध्यानमा राखेर स्वास्थ्यकर्मीहरूको नेतृत्वमा साबुनपानी, सचेतनासम्बन्धी विभिन्न कामहरू मन्त्रालयले सुरु गरेको मन्त्रालयको स्वास्थ्य महाशाखाका प्रमुख वृक्षबहादुर शाहीले जानकारी दिए । मन्त्रालयमा स्टाफ नर्स पुष्पा ओलीको नेतृत्वमा स्वास्थ्यकर्मीको टोलीले सचेतना फैलाउने काम गरिरहेको छ । शाहीले भने, ‘अन्य मन्त्रालयहरूले पनि साबुनपानीले हात धुने, हेल्थ डेस्क स्थापना गर्नेलगायतका कामहरू अघि बढाएका छन् ।’ अन्य मन्त्रालयहरूमा पनि केही दिनमा नै हेल्थ डेस्क स्थापना भइसक्ने बताए ।

अत्यावश्यक पसलबाहेक अन्य बन्द

सोमबारदेखि वीरेन्द्रनगरका अत्यावश्यक पसलबाहेक अन्य पसलहरू बन्द गर्न अपिल गरिएको छ । सुर्खेत उद्योग वाणिज्य संघ र सम्पूर्ण वस्तुगत समितिको आइतबार बसेको बैठकले अत्यावश्यकबाहेकका अन्य व्यवसाय बन्द गर्न अपिल गरेको हो ।

सुर्खेत उद्योग वाणिज्य संघका महासचिव लक्ष्मण कँडेलले आइतबार एक अपिल जारी गर्दै सुर्खेतमा रहेका अत्यावश्यकबाहेक व्यवसाय बन्द गर्न सबै व्यवसायीलाई अनुरोध गरिएको छ । अर्काे सूचना जारी नहुञ्जेलसम्मका लागि बन्द नै रहने उल्लेख गरिएको छ ।

दैनिक उपभोग्य वस्तुहरू खाद्य खुद्रा तथा किराना पसल, मेडिकल, तरकारी पसल, खाजा नास्ता पसल तथा इन्धन तथा पेटोलियम पदार्थ विक्रीवितरण गर्ने पसलबाहेक अन्य पसलहरू पूर्ण रूपमा बन्द गर्ने निर्णय गरेको महासचिव कँडेलको भनाइ छ ।

कर्णाली सरकारद्वारा टोल फ्रि नम्बर सञ्चालनमा

कर्णाली प्रदेश सरकारले कोरोना भाइरस (कोभिड १९) नियन्त्रण गर्ने उद्देश्यका साथ टोल फ्रि नम्बर सञ्चालनमा ल्याएको छ । कर्णाली प्रदेश सरकारको उच्चस्तरीय अनुगमन समितिको बैठकले टोल फ्रि नम्बर सञ्चालनमा ल्याउने भएको हो ।

कुनै पनि व्यक्ति बिरामी भएमा १११० नम्बरको टोल फ्रि नम्बर सञ्चालनमा ल्याएर बिरामीका विषयमा जानकारी दिन सक्ने कर्णाली प्रदेशका आन्तरिक मामिला तथा कानुनमन्त्री नरेश भण्डारीले बताए । ‘जोखिम न्यूनीकरणका लागि प्रदेश सरकारले हरप्रयास जारी राखेको छ,’ उनले भने, ‘तत्काल क्वारेन्टाइन निर्माण कार्यलाई तीव्रता दिइएको छ ।’

क्वारेन्टाइनको अवस्थामा र त्यहाँ पर्ने आवश्यक सामग्री आपूर्तिका लागि अनुगमन सचिवालयको गठनसमेत गरिएको मन्त्री भण्डारीले जानकारी दिए ।

प्रकाशित मिति: सोमबार, चैत १०, २०७६ १६:३०