व्यापारमा छैन कोरोना प्रभाव : बढ्दो आयात, घट्दो निर्यात

A+ A A-

चालू आर्थिक वर्षको सुरुवातदेखि नै गत वर्षको तुलनामा आयात व्यापार घट्ने र निर्यात व्यापार बढे पनि फागुनमा भने ठीक उल्टो देखिएको छ । फागुन महिनामा आयात व्यापार गत वर्षको तुलनामा बढेको छ भने निर्यात व्यापार घटेको छ ।

चीनको वुहान शहरबार फैलिएको कोरोना भाइरसको सङ्क्रमण विश्‍वव्यापी रूपमा फैलिएको अवस्थामा व्यापारमा अवरोध आउने आँकलन गर्दै उपभोक्ता स्वयंले पनि मौज्दात बढाएको व्यापारीहरूको गुनासो छ ।

यता व्यापारीहरूले पनि मौज्दात बढाएका छन् भने सरकारी संस्थानहरूमा पनि मौज्दात बढाइएको छ, जसको परिणाम स्वरूप गत वर्षको फागुन महिनाको तुलनामा चालू आर्थिक वर्षको फागुन महिनामा आयात व्यापार बढेको छ ।

माघ, फागुन भनेका विशिष्ट महिना हुन्, हामीले गत वर्षको सोही अवधिसँग तुलनाम गर्‍यौँँ भने आयात व्यापार बढेको छ , भन्सार विभागमा महानिर्देशक सुमन दाहालले शिलापत्रसँग भने ।

चालू आर्थिक वर्षको पहिलो महिनामा गत वर्षको सोही अवधिको तुलनामा ११ प्रतिशतले आयात व्यापार घटेकामा क्रमश: कम हुँदै आठौँ महिनामा २.२ प्रतिशत मात्रै न्यूून भएको छ ।

फागुन मसान्तसम्म नेपालको आयात व्यापार ९ खर्ब २४ अर्ब २४ करोड रुपैयाँ रहेको छ । गत वर्ष ९ खर्ब ४९ अर्ब रुपैयाँ रहेको थियो । साउन, भदौ र असोजमा केही परिमाणमा आयात भएकाा कारण कम देखिएको भन्सार विभागले जनाएको छ ।

भन्सार विभागको तथ्याङ्कअनुसार ८ महिनाको अवधिमा ७४ अर्ब ९० करोड रुपैयाँ भएको छ । गत वर्षको सोही अवधिको तुलानामा निर्यात व्यापार २२ प्रतिशतले बढी भए पनि गत वर्ष फागुनमा भएको निर्यातभन्दा यस वर्ष फागुनमा भएको निर्यातमा भने कमी आएको छ ।

व्यापार घाटा भने गत वर्षको सोही अवधिको तुलनामा ३८ अर्ब रुपैयाँले कमी देखिएको छ ।

८ महिनाको अवधिमा नेपालले १ रुपैयाँको सामान किन्दा विदेशबाट १२ रुपैयाँ बराबरको सामान आयात गरेको छ । गत वर्ष १ रुपैयाँ बरनबरको सामान बेच्दा १५ रुपैयाँ बराबरको आयात भएको थियो ।

चीनसँग आयात बढ्यो, निर्यात घट्यो

चालू आर्थिक वर्षको ८ महिनाको अवधिमा नेपालको दोस्रो व्यापारिक साझेदार देश चीनसँग आयात व्यापार उल्लेख्य बढे पनि निर्यात भने घटेको छ । गत वर्षको ८ महिनाको अवधिमा १ खर्ब ३९ अर्ब रुपैयाँको सामान आयात भएकामा चालू वर्षमा भने १ खर्ब ४६ अर्ब रुपैयाँ पुगेको छ ।

गत वर्षको भन्दा चीनसँग ५ अर्ब रुपैयाँ बराबरको बढी सामान आयात भएको छ । माघ र फागुनमा केही कमी देखिए पनि औसत व्यापार भएको भन्सार विभागको तथ्याङ्कले देखाएको छ ।

पछिल्लो केही महिनामा भने केही असर देखिन सक्ने भन्सार विभागको आँकलन छ । तर, गत वर्षको बराबरको कारोबार भने चीनसँग हुनेे अनुमान गरिएको छ ।

चीनसँग आयात बढे पनि निर्यात भने घटेको छ । गत वर्ष ८ महिनाको अवधिमा १ अर्ब ३५ करोड रुपैयाँको सामान पठाएकामा चालू वर्षमा भने १ अर्ब ८ करोड रुपैयाँको मात्र भएको छ । निर्यात घट्ने र आयात बढ्ने भएपछि ८ महिनाको अवधिमा चीनसँगको व्यापारमा १ खर्ब ४५ अर्ब ८६ करोड रुपैयाँको घाटा रहेको छ ।

गर्त वर्ष १ खर्ब ३७ अर्ब ८२ करोड रुपैयाँको घाटा रहेको थियो ।

भारतसँग आयात घट्यो, निर्यात बढ्यो

व्यापारका हिसाबले नेपालको सबैभन्दा ठूलो व्यापारिक साझेदार राष्ट्र भारतसँग भने निर्यात बढेको छ । तर , आयात उल्लेख्य घटेको देखिएको छ । भारतको आयात व्यापारमा गत वर्षको तुलनामा करिब ४६ अर्ब रुपैयाँले कमी आएको छ ।

निर्यात भने भारतसँग उल्लेख्य रूपमा बढेको छ । भारतसँग यो अवधिमा १४ अर्ब रुपैयाँले निर्यात व्यापार बढेको देखिएको छ । गत वर्ष ८ महिनाको अवधिमा ३८ अर्ब ५७ करोड रुपैयाँ मात्रको निर्यात व्यापार बढेकामा चालू आर्थिक वर्षमा ५२ अर्ब २७ करोड रुपैयाँको निर्यात व्यापार भएको छ ।

प्रकाशित मिति: सोमबार, चैत १०, २०७६ ०९:०५