तनावमा नेपाली श्रमिक : भिसा रद्द गरेर घर फर्कन दबाब दिँदै कम्पनीहरू

A+ A A-

कोरोना भाइरसका कारण विश्वले अन्तर्राष्ट्रिय उडान बन्द गरिसकेका छन् । नेपाल सरकारले पनि अन्तर्राष्ट्रिय उडान गत शुक्रबारदेखि बन्द गरेको छ ।

कोरोना भाइरसका कारण वैदेशिक रोजगारीमा कार्यरत श्रमिक रोजगारदाता देशमा अलपत्र अवस्थामा छन् ।

रोजगारदाता देशका साना तथा मझौला होटल, व्यवसायीले नेपाली श्रमिकलाई घर फर्कन दबाब दिन थालेको श्रमिकको गुनासो छ । रोजगारदाता देशले भिसा रद्द गरेर घर जान दबाब दिन थालेपछि हजारौँ श्रमिक विदेशमा अलपत्र हुने अवस्था सिर्जना भएको वैदेशिक रोजगार व्यवसायीहरू बताउँछन् ।

कतार, मलेसिया, यूएई, कुवेत, बहराइन र साउदी अरबका प्रतिष्ठित होटल र अन्य कम्पनीहरूले विदेशी श्रमिकको भिसा रद्द गरेर नेपाल फर्कन दबाब दिइरहेको गुनासो श्रमिकले गर्न थालेको वैदेशिक रोजगार व्यवसायीहरूले जानकारी दिए ।

खाडीका देश र मलेसियाका धेरै होटलमा कार्यरत श्रमिकलाई रोजगारदाता कम्पनीले भिसा रद्द गरेर घर फर्कन दबाब दिइरहेको श्रमिकले फोन गरेर जानकारी गराएको वैदेशिक रोजगार व्यवसायी संघका पूर्वउपाध्यक्ष राजप्रसाद भन्तानाले बताएका छन् ।

कतार, यूएई र साउदीका धेरै प्रतिष्ठित होटलहरूले श्रमिक फर्काउन खोजिरहेका उपाध्यक्ष भन्तानाले बताए । ‘रोजगारदाता देशबाट करिब ३ सय जनाभन्दा धेरै श्रमिक फर्काउन कम्पनीले दबाब दिइरहेको जानकारी पाइएको छ । नेपाल सरकारको नियमअनुसार नेपाली कामदार २ वर्षको करार तथा भिसा लिएर वैदेशिक रोजगारीमा जाने गरेका छन्’, उनले भने, ‘कोरोनाका कारण वैदेशिक रोजगारीबाट घर फर्कने कामदारलाई करारअनुसारको तलब दिन जिम्मेवारी कम्पनीको हुन्छ । तलबलगायत सुविधा पाउने कि नपाउने भन्नेबारे यकिन भइसकेको छैन । तर, कतिपय कम्पनीले नियमअनुसार बिदासमेत दिएका होलान् ।’

कतिपय रोजगारीमा गएका नेपालीलाई रोजगारदाता देशले कोरोनाबाट बच्न लगाएको नियम नमान्दा कम्पनीले पठाइरहेको उनको भनाइ छ । कम्पनीले बाहिर नहिँड्न सूचना जारी गरे पनि बाहिर निस्कँदा कम्पनीले बाध्य भएर पठाउन लागेको भन्तानाले बताए ।

रोजगारदाता देशमा कोरोना भाइरसको सङ्क्रमण फैलिएसँगै कतिपय नेपाली स्वयं फर्कन खोजिरहेका पाइएको छ । तर सबैले अन्तर्राष्ट्रिय हवाई उडान बन्द गरेका छन् । त्यही कारण सङ्क्रमणबाट बच्न कम्पनीको होस्टेलमा बस्न उनको आग्रह छ ।

नेपाल सरकारले घरमा सुरक्षित बस्न गरेको आग्रह जस्तै त्यहाँ पनि रोजगारदाता कम्पनीले श्रमिकलाई नियमअनुसार बिदा दिएको भन्तानाको भनाइ छ ।

नेपाल सरकारले २० मार्चदेखि आउँदो ३ वैशाखसम्म रोजगारीका लागि विदेश गएका नेपाली स्वदेश फर्किन नपाउने निर्णय गरेको छ । यसका कारण घर फर्कन चाहनेको पनि आउन पाउने अवस्था छैन ।

बुझिरहेका छौँ : राजदूतहरू

रोजगारदाता कम्पनीले श्रमिकलाई भिसा रद्द गरेर घर फर्कन दबाब दिएको गुनासो दूतावासमा नआएको कतारस्थित नेपाली दूतावासले जनाएको छ । यस्तो समस्या आए दूतावासले तत्काल कम्पनीसँग छलफल गरेर समस्या समाधान गर्न तयार रहेको दूतावासका राजदूत नारदनाथ भारद्वाजले जानकारी दिए ।

यदि कुनै रोजगारदाता कम्पनीले जबर्जस्ती घर फर्कन दबाब दिएको भए दूतावासमा सम्पर्क गर्न उनले आग्रह गरेका छन् ।

यसैगरी यूएईमा रहेका नेपालीहरूलाई कोरोना भाइरसबाट नआत्तिन यूएईस्थित नेपाली राजदूत कृष्णप्रसाद ढकालले आग्रह गरेका छन् । यूएईमा रहेका नेपाली दूतावासका कर्मचारी श्रमिकका समस्या सुन्न र समाधान गर्न तयारी अवस्थामा बसेको राजदूत ढकालले जानकारी दिए । यूएईमा पनि रोजगारदाता कम्पनीले नेपाली श्रमिकलाई घर फर्कन दबाब दिएको सूचना दूतावासमा नआएको उनको भनाइ छ ।

रोजजारदाता देशको सरकार र नेपाल सरकारले जारी गरेका सूचनाअनुसार आफ्नो व्यक्तिगत सरसफाइमा ध्यान दिन, भीडभाडबाट सकेसम्म टाढै बस्न र स्वास्थ्यका बारेमा ख्याल गर्न दूतावासले नेपाली आग्रह गरेका छन् ।

यस्तै, मलेसिया, साउदी, ओमान र कुवेतमा रहेका नेपाली दूतावासहरूले समेत नेपालीहरूको समस्याका बारेमा जानकारी दिइरहेको बताएका छन् ।

जब्स ग्लोबल डटकम प्रालिलगायत ४ म्यानपावर कम्पनीमार्फत् गएका कामदारको भिसा रद्द गरी नेपाल फर्काउन थालिएको नेपाल वैदेशिक रोजगार व्यवसायी संघका महासचिव सुजीतकुमार श्रेष्ठले जानकारी दिए ।

प्रकाशित मिति: आइतबार, चैत ९, २०७६ १२:४२