बुटवल उपमहानगरले २४ घण्टामा बनाउँदै सय बेडको अस्पताल

A+ A A-

ज्वरो, रुघाखोकीका लक्षण लिएर आउने बिरामीलाई अस्पतालले कोरोना भाइरस (कोभिड-१९) संक्रमणको आशंकामा भर्ना लिन नमानेपछि बुटवलमा छुट्टै आइसोलेसन वार्ड बनाइने तयारी गरिएको छ । बुटवल उपमहानगरपालिकाको अगुवाइमा रामनगरस्थित औद्योगिक क्षेत्रमा बन्द अवस्थामा रहेको धागो कारखानामा आइसोलेसन वार्ड संचालन गर्न लागिएको हो ।

२४ घण्टाभित्र संचालनमा ल्याउने गरी एक सय बेडको आइसोलेसन संचालनका लागि तीव्ररूपमा काम सुरु गरिएको बुटवल उपमहानगरपालिकाका प्रमुख शिवराज सुवेदीले बताए ।

यसअघि बुटवलभित्रकै सरकारी तथा निजी अस्पतालमा कोरोना संक्रमणका बिरामीको उपचारका लागि डेढ दर्जन बढी आइसोलेसन बेड तयार रहेको दाबी गरिए पनि कोरोनासँग मिल्दो लक्षण लिएर आउने बिरामीलाई अस्पतालले अन्यत्र पठाउने गरेपछि अस्थायी अस्पताल संचालन गर्न लागिएको हो ।

धागो कारखानाका भवनमा खाली अवस्थामा रहेका हलको प्रयोग गरि बेड राखेर आइसोलेसन अस्पताल संचालन गर्न लागिएको उपमहानगरपालिकाले जानकारी दिएको छ । अस्पताल संचालनका लागि आवश्यक बेड यहाँका निजी अस्पतालले समेत उपलब्ध गराउने छन् भने आवश्यक प्राविधिक सहयोग लुम्बिनी प्रादेशिक अस्पताल बुटवलले गर्ने भएको छ ।

शनिबार साँझसम्म संचालनमा ल्याउने तयारीस्वरूप अहिले धागो कारखाना परिसरमा शौचालय निर्माण, विद्युत जडान तथा रङरोगनको काम भइरहेको छ । निर्माण व्यवसायी संघ रुपन्देहीले अस्पतालको लागि ३० वटा अस्थायी शौचालय निर्माण गरिदिने भएको छ ।

त्यस्तै, बिरामीको उपचारमा खटिने चिकित्सक तथा स्वास्थ्यकर्मीको लागि एकसय थान सुरक्षित एप्रोन काठमाडौंबाट ल्याउँदै गरिएको सुवेदीले बताए । बुटवलमा हालसम्म कोरोना भाइरसको संक्रमण पुष्टि भएको कुनै पनि बिरामी नभेटिए पनि कोरोनासँग मिल्दो लक्षण लिएर दैनिक चार/पाँच जना बिरामी आउने गरेकोले ती बिरामीको ल्याब परीक्षणको रिपोर्ट नआउँदासम्म आइसोलेसन अस्पतालमै राखी उपचार गरिने उपमहानगरपालिकाले जनाएको छ ।

प्रकाशित मिति: शुक्रबार, चैत ७, २०७६ १७:४७