होटल मजदुरको ७५ प्रतिशत तलब कटौती हुँदै, विरोधमा मजदुर (भिडियोसहित)

A+ A A-

विश्वव्यापी कोरोनाको सन्त्रासलाई देखाएर होटल मालिकहरूले होटललाई क्वारेन्टाइनका लागि तयारी अवस्थामा राख्ने भन्दै कामदारहरूलाई घरमै बसाउने तयारीमा जुटेका छन् । हाटेल मालिकहरूले सरकारको सहमतिमा होटलका कामदारहरूलाई घरमै राख्ने तयारी थालेका हु्न् ।

यसरी कामदार कर्मचारीहरूलाई घरमा राख्दा कुल तलबको २५ प्रतिशत मात्र दिने हानको तयारी छ । यसका लागि साढे १२ प्रतिशत रकम सरकारले अनुदान दिनुपर्ने र बाँकी साढे १२ प्रतिशत होटल मालिकहरूले व्यहोर्नुपर्ने व्यवसायीहरूको माग छ ।

व्यवसायीहरूले यसका लागि पटकपटक उपप्रधानमन्त्री ईश्वर पोखरेललाई भेटिसकेका छन् । यसमा सरकार सकारात्मक रहेको होटल एसोसियसन नेपाल (हान) का वरिष्ठ उपाध्यक्ष विनायक शाहले बताए ।

केही समयअघिसम्म होटलका मालिकहरू नेपालमा कोरोना देखा नपरेकाले आत्तिइहाल्ने अवस्था नआएको भन्दै नेपाल भ्रमण वर्ष स्थगित गर्नु नपर्ने बताउँदै आइरहेका थिए ।

हानका वरिष्ठ उपाध्यक्ष विनायक शाहले भनेका थिए, ‘आन्तरिक पर्यटन प्रवर्द्धनका लागि सरकारले सहयोग गर्नुपर्छ, कि त कुनै न कुनै किसिमको प्याकेज नै ल्याउनुपर्छ ।’

आन्तरिक पर्यटन प्रवद्र्धनका लागि शनिबार र आइतबार गरी हप्तामा २ दिन बिदा दिनुपर्नेदेखि निजामती कर्मचारीहरूलाई पनि देशव्यापी रूपमा घुमघामका लागि पठाउनुपर्नेसम्मका योजनाहरू सरकारले ल्याउनुपर्नेमा उनले जोड दिएका थिए ।

तर विश्वमा बढ्दै गएको कोरोनाको त्रास र नेपालको परिस्थितिलाई मध्यनजर गर्दै बुधबार नै पुनः त्यस्ता योजनाहरूलाई थाँतीमा राख्दै होटलहरूलाई क्वारेन्टाइनका लागि दिने र कामदारलाई आराम गराउने निर्णयमा होटल सञ्चालकहरू पुगेका छन् ।

होटल सञ्चालकहरूको यो निर्णयप्रति भने होटल मजदुरहरूले असन्तुष्टि जनाउँदै चर्को विरोध गरेका छन् । नेपाल ट्रेड युनियन महासंघ (जिफन्ट) का केन्द्रीय अध्यक्ष विनोद श्रेष्ठले भने, ‘कुनै पनि निर्णय गर्दा प्रचलित कानुनको पालना हुनुपर्छ, अथवा निर्णयमा पुग्नुअघि सम्बन्धित प्रतिष्ठानका कामदार कर्मचारीसँग सहमति गरेर मात्र निर्णय गर्नुपर्नेमा अहिले एकलौटी रूपमा त्यस्तो निर्णय गरिएको छ ।’

श्रम ऐनमा कुनै पनि संस्थामा ठूलै संकट आएको अवस्थामा मात्र आफ्ना कर्मचारीलाई बढीमा १५ दिनका लागि जगेडामा राख्न सकिने व्यवस्था छ । सो अवधिमा खाईपाई आएको सेवासुविधालाई बढीमा ५० प्रतिशतसम्म मात्र कटौती गर्न सकिने व्यवस्था छ ।

अहिले नेपालमा पर्यटकस्तरीय होटलहरूको संख्या ३ हजार ३ सय छ । यो तथ्यांकलाई हेर्ने हो भने सरकारको निर्णयले ठूलो तप्कालाई दीर्घकालीन असर गर्ने निश्चित छ ।

प्रकाशित मिति: बिहीबार, चैत ६, २०७६ १८:१७