बुटवल–बेलहिया सडकखण्डमा १३ वटा बायो शौचालय

A+ A A-

बुटवल–बेलहिया सडकखण्डअन्तर्गत योगीकुटीदेखि ड्राइभर टोलसम्म बायो शौचालय निर्माण गरिएको छ ।

तिलोत्तमा नगरपालिकाले अघि सारेको ‘ग्रीन तिलोत्तमा, क्लिन तिलोत्तमा अभियान’ लाई साथ दिँदै शंकरनगर खानेपानी तथा सरसफाइ संस्थाले बायो शौचालय निर्माण गरेको हो । अबको केही दिनमा यी शौचालयहरू पूर्ण रूपमा सञ्चालनमा आउँदै छन् ।

खुल्ला दिशामुक्तसमेत रहेको तिलोत्तमामा पैदलयात्रुहरूलाई लक्षित गरेर मुख्य चोकको दायाँबाँया बायो शौचालय निर्माण गरिएको छ ।

सडकमा सार्वजनिक शौचालय नभएपछि सडक यात्रीलाई दिसापिसाब फेर्न समस्या थियो ।

संस्थाले त्यस्ता १३ वटा बायो शौचालय खरिद गरी बुटवल–भैरहवा सडकअन्तर्गत तिलोत्तमाको योगीकुटीदेखि ड्राइभर टोलसम्मको सडक किनारमा १० वटा, मगरघाटमा १ र हाटबजारमा २ वटा शौचालय निर्माण गरेको छ ।

१ करोड १६ लाखको लगानीमा १३ वटा बायो शौचालय संस्थाले खरिद गरेको हो । सर्भिसलेनमा राखिएका बायो शौचालय सिंगल सिटका १० वटा र हाटबजार र मगरघाटमा डब्बल सिटका ३ वटा शौचालय छन् ।

भारतीय कम्पनी इलिफो बायोटेक प्रा.लि.बाट उत्पादित बायो प्रविधिको शौचालय खानेपानी संस्थाले खरिद गरेको हो ।

भारत भ्रमणका क्रममा संस्थाले बायो शौचालय प्रयोग भएको देखेपछि पैदलयात्रुलाई लक्षित गर्दै शौचालयहरू राखिएको शंकरनगर खानेपानी तथा उपभोक्ता सरसफाइ संस्थाका अध्यक्ष हरि तिवारीले जानकारी दिए ।

निःशुल्क रूपमा प्रयोग गर्न सकिने यो शौचालयमा विद्युत, पंखा र सरसफाइको व्यवस्था हुनेछ । अध्यक्ष तिवारीले व्यवस्थापनमा चुनौती भए पनि कर्मचारी राखेरै त्यसलाई व्यवस्थापन गरिने बताए ।

शौचालयहरूका लागि आवश्यक पर्ने विद्युतका लागि विद्युत प्राधिकरणसँग खानेपानी संस्थाले सहमति गरिसकेको छ ।

तिलोत्तमा नगरपालिकाले समेत अन्य खानेपानी संस्थासँग सहकार्य गरेर सडक क्षेत्रमा बायो शौचालय राख्ने बताएको छ ।

तिलोत्तमा नगरपालिकाका नगरप्रमुख वासुदेव घिमिरेले शंकरनगरले बायो शौचालय राखिसकेको र आनन्दवन, टिकुलीगढलगायतका खानेपानी संस्थासँग सहकार्य गरेर शौचालय राखिने बताए ।

सडक किनारमा शौचालय राख्दा पैदलयात्रु अब कसैको घर वा होटलमा शौच गर्न जानुपर्ने बाध्यताको अन्त्य भएको नगरप्रमुख घिमिरेको भनाइ छ ।

शौचालयमा आवश्यक पर्ने विद्युत् जडान गर्न नगरपालिकाको उपस्थितिमा विद्युत् प्राधिकरणसँग खानेपानी संस्थालाई सहमति दिएको छ ।

शंकरनगर खानेपानी तथा उपभोक्ता सरसफाइ संस्थाले अहिले ६ हजार २ सय ६३ घरधुरीमा पानी वितरण गर्दै आएको छ । जाडो समयमा प्रतिदिन ८० लाख लिटर र गर्मी समयमा १ करोड १० लाख लिटर पानी वितरण गर्दै आएको छ ।

प्रकाशित मिति: बिहीबार, चैत ६, २०७६ ११:४१