धनी मुख्यमन्त्रीको सम्पत्ति ९ वटा भेडा र ७ वटा बाख्रा !

A+ A A-

गण्डकीका मुख्यमन्त्रीसहित मन्त्रीले सम्पत्ति विवरण सार्वजनिक गरेका छन् । कानुनविपरीत २ वर्षसम्म सम्पत्ति विवरण सार्वजनिक नगरेका मुख्यमन्त्री र मन्त्रिपरिषदका सदस्यलाई लेखा समितिको तेस्रो निर्देशनपछि सम्पत्ति विवरण सार्वजनिक गरेका हुन् ।

बुधबार सरकारका प्रवक्ता तथा भौतिक पूर्वाधार विकासमन्त्री रामशरण बस्नेतले प्रदेशका सातजना मन्त्रीमध्ये ६ जनाको सम्पत्ति विवरण सार्वजनिक गरेका छन् । २ वर्ष बितिसक्दासमेत सामाजिक विकासमन्त्री नरदेवी पुनमगर सम्पत्ति विवरण उपलब्ध गराएकी छैनन् ।

सरकारका प्रवक्ता बस्नेतले सार्वजनिक गरेको विवरणअनुसार प्रदेशका मुख्यमन्त्री पृथ्वीसुब्बा गुरुङसँग ५१ तोला सुन र ९० तोला चाँदी रहेको छ । उनले विवरणमा सुन र चाँदीलाई दाइजो, खरिद, पेवा र उपहारबाट प्राप्त भएको उल्लेख गरेका छन् ।

मुख्यमन्त्री गुरुङको लमजुङको खिलुङमा कित्ता नं २८१ मा २०४५ सालमा किनेको घरसहितको जग्गा छ । मुख्यमन्त्रीकी आमा आशकुमारी गुरुङको नाममा खिलुङमा नै २५९ कित्ता नं. मा एकतले २ वटा घर छन् ।

यस्तै, आशकुमारीकै नाममा खिलुङ ८ र ९ मा नै, ३६४, १४७, १५१, १८२, २१९ र १५९ कित्ता नं. मा २९ रोपनी १४ आना ३ पैसा ३ दाम जग्गा रहेको छ । यस जग्गा अंशबण्डाबाट प्राप्त भएको विवरणमा उल्लेख गरिएको छ ।

मुख्यमन्त्री गुरुङको नाममा खिलुङ-८ मा १३२, २७६, ३३८ र ४८७ कित्ता नं. मा १० रोपनी ३ आना २ दाम अंशबण्डाबाट पाएको उल्लेख छ ।

मुख्यमन्त्री गुरुङको व्यक्तिगत खातामा १६ लाख ५० हजार रुपैयाँ नगद रहेको विवरणमा उल्लेख गरिएको छ । एभरेष्ट बैंकमा १५ लाख ५० हजार रुपैयाँ र सिभिल बैंकमा १ लाख रुपैयाँसहित १६ लाख ५० हजार रुपैयाँ बैंक ब्यालेन्स नगद छ ।

उनका छोरा विज्ञान गुरुङको नाममा लक्ष्मी बैंकमा १० लाख रुपैयाँ छ भने नबिलमा ६० लाख रुपैयाँ नगद छ । यसको स्रोत पारिश्रमिक भनेर उल्लेख गरिएको छ । विज्ञान नाममा पिपुल्स हाइड्रो कम्पनीमा शेयर १५ हजार कित्ता शेयर छ । यस रकम जग्गा बेचेर प्राप्त भएको जनाइएको छ । विज्ञानको नाममा मोटरसाइकल ५ लाख रुपैयाँको र माउण्टेन बाइकसमेत रहेको उल्लेख छ ।

लमजुङको क्होंलासोथर गाउँपालिकाको उपाध्यक्षसमेत रहेकी मुख्यमन्त्री पत्नी कुमारीमुनि गुरुङको नाममा सिभिल बैंकमा ३ लाख ५० हजार रुपैयाँ नगद रहेको छ । यसैगरी, उनकै नाममा जनकल्याण बचत तथा ऋण सहकारी संस्थामा पाँच लाख रुपैयाँ बैंक मौज्दात रहेको छ ।

कुमारीकै नाममा राष्ट्रिय वाणिज्य बैंक जावलाखेलमा २ लाख रुपैयाँ नगद रहेको विवरणमा उल्लेख छ । यसैगरी, छोरी इश्वरी गुरुङको नाममा स्कुटर १ लाख २० हजार रुपैयाँ मूल्यको रहेको छ।

मुख्यमन्त्रीले सम्पत्ति विवरणमा भेडीगोठमा रहेका नौवटा भेडा र सातवटा बाख्रा पनि समावेश गरेका छन् ।

आर्थिक मामिला तथा योजनामन्त्री किरण गुरुङको तनहुँ भीमाद नगरपालिकामा आमा बालकुमारी गुरुङको नाममा ११ रोपनी ५ आना २ दामको जग्गा, स्वर्गीय बुवा पूर्णराम गुरुङको नाममा ८९ रोपनी जग्गा रहेको छ । सबै जमिन १ बहिनीसहित ४ दाजुभाइको संगोलमा रहेको मन्त्री गुरुङले सार्वजनिक गरेको विवरणमा उल्लेख छ । बुवाको स्वर्गारोहण भए पनि जग्गा नामसारी भइनसकेको जनाइएको छ ।

यसैगरी, मन्त्री गुरुङको नाममा पोखरा १२ मा २२५.२० वर्ग मिटरको घडेरी, पर्वत फलेवास नगरपालिका ६ मा ६ आना र ललितपुर धापाखेलमा ५ आना घडेरी रहेको छ। उनको चल सम्पत्तिमा ४ तोला सुन, श्रीमती कृष्णकुमारी श्रेष्ठको नाममा १५ तोला सुन, मन्त्री गुरुङको नाममा विभिन्न बैंकमा करिब १ लाख नगद रहेको छ ।

आन्तरिक मामिला तथा कानुनमन्त्री हरिबहादुर चुमानको तनहुँ आँबुखैरहनीमा श्रीमती धनकुमारी चुमानको नाममा १३ रोपनी जग्गा रहेको विवरणमा उल्लेख छ । मन्त्री चुमानको १० तोला सुन, विभिन्‍न बैंकमा करिब २ लाख नगद रहेको छ । यस्तै, कृषि विकास बैंकमा ३२ सय सेयरसमेत रहेको उल्लेख छ ।

भौतिक पूर्वाधारमन्त्री रामशरण बस्नेतको गोरखा-३ नारेश्वरमा बुवा लिलाबहादुर बस्नेतको नाममा एउटा घरसहित करिब ५० रोपनी जमिन रहेको विवरणमा उल्लेख छ । उनको चल सम्पत्तिमा १४ तोला सुन, १० तोला चाँदी र विभिन्‍न बैंकमा करिब साढे ४ लाख नगद रहेको छ ।

उनको विवरणमा करिब १० लाख ऋण तिर्न रहेको र त्यत्ति नै रकम आफूले लिनु पर्ने भएका कारण ऋण-धन बराबर रहेको मन्त्री बस्नेतले बताए । मन्त्री बस्नेतको एउटा बस, नमूना कृषि फार्म र गोर्खामा गोर्खा बुक्स एण्ड स्टेसनरी सञ्चालनमा रहेको छ ।

उद्योग, पर्यटन, वन तथा वातावरणमन्त्री विकास लम्सालको पर्वत फलेवास नगरपालिका-५ मा करिब साढे ५ रोपनी जग्गा रहेको विवरणमा उल्लेख छ । उनको नगद ५ लाख, सुन १० तोला र चाँदी ५० तोला रहेको छ । उनको विभिन्‍न बैंकमा १० लाख मौज्दात रहेको छ ।

यस्तै, कृषि विकास बैंकमा ३ सय कित्ता सेयर रहेको छ । उनको कृषि विकास बैंकमा १५ लाख ऋण तिर्नु पर्ने पनि विवरणमा उल्लेख छ ।

भूमि व्यवस्था, कृषि तथा सहकारीमन्त्री लेखबहादुर थापाको संयुक्त परिवारमा एउटा घर र ४३ रोपनी जग्गा रहेको जनाइएको छ । जग्गा बुबा भीमबहादुर थापाको नाममा रहेको र अंशवण्डा भइनसकेको विवरणमा उल्लेख छ ।

उनको आफ्नै नाममा भने ३५ तोला सुन, विभिन्‍न बैंकमा ४ लाख नगद, दरौंदी बचत तथा ऋण सहकारी संस्थामा सेयर रहेको उल्लेख छ । यसैगरी, १ हल गोरु र ७ वटा बाख्रासमेत रहेको सरकारका प्रवक्ता मन्त्री बस्नेतले जानकारी दिए ।

मन्त्रिपरिषद्‍मा नियुक्त भएको मितिले ६० दिनभित्र सम्पत्ति विवरण बुझाउनु पर्ने आचारसंहिता भए तापनि २ वर्ष बितिसक्दासमेत सामाजिक विकासमन्त्री पुनमगरको सम्पत्ति सार्वजनिक भएको छैन । मन्त्रिपरिषद्‍का सदस्यले पद धारणको ६० दिनभित्र सम्पत्ति विवरण बुझाउनु पर्ने कानुनी व्यवस्था रहेको छ ।

मन्त्रिपरिषद्को २०७४ चैत्र २ गतेको बैठकले मन्त्रिपरिषद्का सदस्यको ३० बुँदे आचारसंहिता जारी गरेको थियो । आचारसंहिताको ८ औं नम्बर बुँदामा मन्त्रिपरिषद्‍मा नियुक्त भएको मितिले ६० दिनभित्र प्रचलित कानुनबमोजिम सम्पत्ति विवरण सार्वजनिक गर्नुपर्ने उल्लेख छ ।

प्रकाशित मिति: बुधबार, चैत ५, २०७६ १७:४२