प्रदेश ५ का सांसदले मागे राहत प्याकेज

A+ A A-

गत ३० फागुन र १ चैतमा परेको असिनापानीबाट किसानको बालीमा क्षति भएको भन्दै सांसदहरूले उचित क्षतिपूर्ति दिन प्रदेश सरकारसँग आग्रह गरेका छन् । मंगलबार बसेको प्रदेश ५ प्रदेशसभामा बोल्ने सांसदहरूले असिनापानीबाट भएको क्षतिको विवरण निकालेर राहत प्याकेज घोषणा गर्न सरकारलाई माग गरे ।

सभामा बोल्दै सांसद रामजी घिमिरेले अर्घाखाँचीमा असिनापानीका कारण तरकारी बाली नष्ट भएको भन्दै त्यसको निरीक्षण गरेर किसानलाई राहत दिन आग्रह गरे । सांसद कुलप्रसाद पोखरेलले असिनापानीका कारण बर्दियामा मुसुरो, चना र गहुँ नास गरेको भन्दै समिति गठन गरेर छानबिन गरी राहत दिन आग्रह गरे ।

उनले बर्दिया राष्ट्रिय निकुञ्जमा रहेका वन्यजन्तुले जनतालाई सताएको भन्दै त्यसको नियन्त्रणका लागि सरकारलाई आग्रह गरे । अर्का सांसद धमकली चौधरीले असिनाले दाङमा हिउँदे बाली, गहुँ, तोरी, चना र बेमौसमी तरकारी खेती सबै नष्ट गरेको भन्दै क्षतिपूर्ति उपलब्ध गराउन सरकारसँग माग गरिन् ।

सांसद वीरबहादुर रानाले प्रदेशका सबै जिल्ला र पाल्पा रिब्दिकोटमा ४० घरका तरकारी पूरै नष्ट भएको भन्दै क्षतिपूर्ति दिन माग गरे । सांसद फकरुद्दिन खानले कलाकार टेप प्रकरणमा सरकारले यथार्थ कुरा बाहिर ल्याउन आग्रह गरे ।

सभामा सांसद दीपा बि.क., भोजप्रसाद श्रेष्ठ, धनबहादुर श्रीवास्तव, विजयबहादुर यादवले कोरोना सतर्कताका लागि प्रदेश सरकारको तयारीबारे प्रश्न गरेका थिए । सांसदहरूको जवाफ दिँदै सामाजिक विकासमन्त्री सुदर्शन बरालले कोरोनाको तयारीमा प्रदेश सरकार लागेको बताए ।

उनले प्रदेशका १५ वटा अस्पतालमा आइसोलेसन बेड तयार गरेको र सीमामा हेल्थ डेस्क राखेर जाँच भइरहेको जानकारी दिए । उनले तापक्रम जाँचका लागि ४५ वटा मेसिन अस्पतालमा राखेको र सङ्क्रमितलाई उपचार गर्दा लगाइने किट, मास्कको आवश्यक तयारी भइरहेको समेत बताए ।

पीसीआर मेसिन उपलब्ध हुने प्रक्रियामा रहेको, नेपालगञ्ज, दाङ र बुटवलमा १२ सय जनालाई क्वारेन्टाइनमा राख्ने गरी स्थानको खोजी गरिरहेको उनको भनाइ छ ।

त्यस्तै, कलाकारको अडियो टेपमा उल्लेख भएअनुसार आफू उक्त प्रकरणमा नजोडिएको मन्त्री बरालले प्रष्ट पारे । उनले सरकारले मेला नगर्ने निर्णय गरेअनुसार नै मेला बन्द भएको समेत बताए ।

प्रकाशित मिति: मंगलबार, चैत ४, २०७६ १६:२३