'कोरोनाका कारण रोकिएका श्रमिक पठाउन पहल गरिनेछ'

A+ A A-

सरकारले वैदेशिक रोजगारीमा जाने श्रमिकलाई दिइने श्रम स्वीकृति अनिश्चितकालका लागि गत ३० फागुनमै बन्द गरेको छ । विश्वव्यापी रूपमा फैलिरहेको कोरोना भाइरसको सङ्क्रमण झन् फैलिँदै गएपछि सरकारले श्रम स्वीकृति दिन बन्द गरेको श्रम, रोजगार तथा सामाजिक सुरक्षा मन्त्रालयले जनाएको छ ।

सरकारद्वारा गठित कोभिड– १९ रोकथाम तथा नियन्त्रण उच्चस्तरीय समन्वय समितिले अध्ययनका लागि विदेश जाने विद्यार्थीहरूलाई पनि ३० अप्रिल अर्थात् १२ वैशाखभन्दा अगाडि नो अब्जेक्सन सर्टिफिकेट नदिने निर्णय गरेको थियो । यसका कारण अध्ययन अनुमति पाएका धेरै विद्यार्थी जान पाएका छैनन् ।

सरकारले कोरोना भाइरसको सङ्क्रमणका कारण श्रम स्वीकृति बन्द गर्दा करिब ५० हजार वैदेशिक रोजगारीमा जान तयारी रहेका श्रम रोकिएका छन् । रोजगादाता देशले समेत विदेशी श्रमिक भित्र्याउन बन्द गरेपछि उनीहरूमा जान नपाइने हो कि भन्ने शंका उत्पन्न भएको छ ।

रोजगारदाता देशमा श्रमिक भित्र्याउन रोक

कोरोना प्रभावित देशले विदेशी श्रमिक रोजगारीका लागि लिन १ महिनाअघिदेखि नै बन्द गरिरहेका छन् भने अन्य रोजगारदाता देशले पनि स्वास्थ्य सुरक्षाको कारण देखाउँदै विदेशी श्रमिकसँगै विदेशी नागरिक आउनमा रोक लगाएका छन् ।

दक्षिण कोरियाले गत महिना कोरोना भाइरसको सङ्क्रमण बढेपछि विदेशी कामदार रोजगारीका लागि भित्र्याउन बन्द गरेको छ । यस्तै, कतार, मलेसिया, यूएई, साउदी अरब, ओमान, बहराइन, जोर्डन र कुवेतले समेत विदेशी श्रमिक भित्र्याउन गत हप्तादेखि बन्द गरेका छन् ।

यी देशबाट घर बिदामा आएका र नयाँ श्रम स्वीकृति लिएर जाने तयारीमा रहेका श्रमिकमा अन्योल छाएको छ । नेपाल र रोजगारदाता देशले कोरोना भाइरसका कारण श्रमिक ल्याउन, लैजान बन्द गरेपछि फेरि जान पाइन्छ कि पाइँदैन भन्ने दोधारमा छन् श्रमिक । हाल घर बिदामा आएका २ हजार र अन्तिम श्रम स्वीकृति लिएका करिब ९ देखि ११ हजार श्रमिक जान नपाएको वैदेशिक रोजगार विभागले जनाएको छ ।

नयाँ श्रम स्वीकृति लिएका कामदारकाे श्रम अवधि २ वर्षको हुन्छ भने घर बिदामा आएका श्रमिकको मात्र श्रम अवधि थोरै हुन्छ । घर बिदामा आएका श्रमिकका हकमा समस्या हुने विभागको भनाइ छ ।

‘सरकारले रोजगारदाता देशसँग पहल गर्छ’

कोरोना भाइरसका कारण घर बिदामा आएर जान नपाएका र अन्तिम श्रम स्वीकृति लिएका श्रमिकलाई म्याद थप गरी रोजगारीमा लैजान सरकारले रोजगारदाता देशसँग पहल गर्ने वैदेशिक रोजगार विभागका महानिर्देशक कुमार दाहालले जानकारी दिए ।

विश्वमा कोरोना भाइरसको त्रास बढ्दै गएकाे विषयमा सबै रोजगारदाता देश जानकार छन् । नेपाली श्रमिक लिँदै आएका रोजगारदाता देशले पनि यस विषयमा बुझ्छन्, जसका कारण श्रमिकलाई अप्ठ्यारो नपर्ने विभागका महानिर्देशक दाहालले बताए ।

‘सरकारले कूटनीतिक नियोगमार्फत घर बिदामा आएर समयमा जान नपाएका श्रमिकलाई रोजगारदाता कम्पनीसँग उनीहरूको समस्याका विषयमा अपिल गर्छ ।

कोरोना भाइरसको त्रास विश्वमा छ । स्वास्थ्य सुरक्षा र सङ्क्रमण रोक्न श्रमिक रोकेको देशले आफैँ धेरै बुझेका छन्’, उनले भने, ‘हाल विश्वमा रोग रोक्न र मानवीय क्षति नियन्त्रण गर्न आवतजावत नै बन्द गर्नुपर्ने अवस्था छ । त्यसमा पनि श्रमिक र श्रम जस्तो संवेदनशील क्षेत्रमा हेलचेक्र्याइँ गर्नु हुँदैन ।’

वैदेशिक रोजगारीका कारण धेरै कोरोना भाइरसको सङ्क्रमण सर्न सक्ने सम्भावना भएका कारण श्रमिक पठाउने र लिने देशले होसियारी गर्नुपर्ने उनको भनाइ छ । कोरोना भाइरसको सङ्क्रमण फैलिन नदिन रोजगारदाता देशले श्रमिक र अन्य नागरिक रोकेका हुन् । रोग नियन्त्रण भएपछि उनीहरूले श्रमिकलाई समस्या नपार्ने विभागका महानिर्देशक दाहालको भनाइ छ ।

घर बिदामा आएका श्रमिकको श्रम अवधि सकिए सरकारले रोजगारदाता कम्पनीलाई पत्राचार गरेर भए पनि रोजगारीमा लिन आग्रह गर्ने उनले जानकारी दिए ।

प्रकाशित मिति: मंगलबार, चैत ४, २०७६ १३:०६