पीडित भन्छन्, 'निको हुन्छ भन्दै थिए, लास ल्याएर दिए'

A+ A A-

नवलपरासीको बर्दघाट– २ की यमकुमारी पुनले शुक्रबार बिहान घरमा खाना पकाइन् । श्रीमान् दिनेश पुन (५३) र छोरा योगेश पुन (१९)लाई खुवाइन् ।

दिउँसो करेसाबारीमा गोडमेल गर्न थालिन् । करेसाबारीमा हुँदा उनलाई अचानक दाँत र टाउको दुख्यो । त्यसपछि घर नजिकै रहेको रोयल कटेजमा गफ गर्दै बसेका श्रीमान् दिनेश पुनलाई फोन गरिन् र भनिन्, ‘पहिले दाँत दुखेको ठाउँमा एकदम दुख्यो, टाउको पनि दुखेको छ । घरमा आउनुस् ।’

त्यसपछि श्रीमान् दिनेश पुन घरमा आए । करेसाबारीमा रहेकी श्रीमतीलाई घरमा ल्याए ।

दिनेशलाई पनि दाँत दुखेको हुन सक्ने अड्कल काटे । किनकि १ वर्षअघि श्रीमती यमकुमारी पुनको दाँत किराले खायो । बाहिरी दाँत पूरै किराले खाएपछि बाँकी जरामा रहेको दाँतको ठेटो एक वर्षअघि नै उपचार भए पनि कुनै कारणले दुखेको हुन सक्ने अड्कल काटे ।

घरमा आएका उनले श्रीमतीलाई दाँत नदुख्ने औषधि खुवाए । केही वर्षअघि स्वास्थ्य चौकीमा काम गरेका दिनेशले दुखाइ कम गर्ने औषधि श्रीमतीलाई खुवाए । तर, श्रीमतीको दुखाइ बीसको उन्नाइस भएन । त्यसपछि नजिकैको चिसापानी हस्पिटल लैजाने निधो दिनेशले गरे ।

श्रीमती यमकुमारीलाई घरमा लगाउने साँचो कहाँ छ भने तर श्रीमतीले बताउन सकिनन् । त्यसपछि केही मानसिक समस्या भएको दिनेशले विचार गरे । त्यसपछि उनलाई चिसापानी हस्पिटल लगे । दाँतको दुखाइ भएकाले कहीँ कतै इमरजेन्सी टिकट नहुने भएपछि भोलिपल्ट अन्यत्र लैजाने कुरा अस्पतालमा भयो ।

त्यहाँ पनि दुखाइ कम गर्ने औषधि दिइयो तर दुखाइ कम भएन । त्यसबीचमा २–३ पटक बमिट पनि भयो । त्यसपछि त्यहाँबाट मेडिकल कलेज लैजान भने ।

दिनेशका परिवारले यमकुमारीलाई शुक्रबार साँझ साढे ९ देखि १० बजेसम्म भैरहवास्थित युनिर्भसल मेडिकल कलेजको इमरजेन्सीमा भर्ना गरियो ।

अस्पतालमा ल्याउँदा प्रेसर ठीक थियो । सुरुमै सिटी स्क्यान भयो । सिटी स्क्यानमा दिमागको नसा फुटेको र भोलि पुनः सिटी स्क्यान गर्ने डाक्टरले सल्लाह दिए । डाक्टरको सल्लाहअनुसार शनिबार सिटी स्क्यान भयो ।

डाक्टरले आत्तिनुपर्दैन, औषधिले ठीक हुन्छ भने । बिरामीलाई राखिरहे । यसबीचमा अस्पतालले ५ वटा सिटी स्क्यान गरेको बिरामीका आफन्त बताउँछन् ।

पटक पटक उपचार सम्भव नभए अन्यत्र डिस्चार्ज दिन बिरामीका आफन्तले भनिरहेका थिए । तर, डाक्टरले औषधिले ठीक हुने र ४–५ दिनमै घरमा जान सक्ने आश्वासन दिइरहे । खतरा छैन भने । अप्रेसन पनि गर्नुपर्दैन भने ।

आइतबार बिहान बिरामी यमकुमारी पुनले खाना खाइन् । डाक्टरको सल्लाहअनुसार अस्पतालमा बसे । तर, सोमबार बिहानै डाक्टरले आफन्तलाई भने, ‘राती अत्यधिक ज्वारो आएकाले नसा फुटेर उहाँको मृत्यु भयो, सरी !’

बिरामीका आफन्त छाँगाबाट खसेजस्तै भए । त्यसपछि बिरामीका आफन्त अस्पताल प्रशासनले गैरजिम्मेवारी काम गर्‍यो भन्दै कराउन थाले ।

यसका कारण दिनभर अस्पताल तनावग्रस्त भयो । बिरामी र अस्पालका डाक्टरबीच चर्काचर्की मात्र भएन, हात हालहालको स्थितिसमेत हुन पुग्यो । बिरामीका आफन्तले हातपात गर्दा उपचारमा संलग्न जुनियर रेसिडेण्ट (जेआर) डाक्टर अर्चन घिमिरे घाइते भए ।

अन्य चिकित्सकहरू समेत घाइते भएको अस्पताल प्रशासनले बताएको छ । मृतक यमकुमारी पुनका भाइ धर्मराज थापाका अनुसार चिकित्सकसँग झगडा हुँदा ४ जना आफन्त पनि घाइते भएका छन् ।

थापा भन्छन्, ‘हामीले पटक पटक डिस्चार्ज माग्दा दिइएन । निको हुन्छ भनेर डाक्टरले भने । तर, एक्कासि बिहान मृत्यु भयो भनेर खबर लिएर आए । हामीले अस्पतालको गैरजिम्मेवारी भयो भन्दा उल्टै उहाँहरूले हामीलाई धम्की शैलीमा बोल्नुभयो । त्यसपछि केही धकेलाधकेल भएको हो ।’

थापाले अस्पतालका विद्यार्थीहरूले ‘सिंगल सिंगल लड्न’ आफूहरूलाई भनेको समेत बताए । ‘हामी १६ सय छौँ, सिंगल भिड्छौँ, गेट लगा, आइजसमेत भने’ उनले भने ।

बिरामीका आफन्तले मृतक यमकुमारी पुनको शव उठाइसकेका छन् ।

ओपीडी सेवा बन्द

अस्पतालका चिकित्सकमाथि हातपात भएको भन्दै अहिले अस्पतालको ओपीडी सेवा डाक्टरहरूले बन्द गराएका छन् । बिरामीका आफन्तले बिहान दाँतको उपचार गर्न आएको बताए पनि दाँत नभई टाउको उपचारका लागि बिरामी आएको र उपचारका क्रममा मृत्यु भएको अस्पतालले पुष्टि गरेको छ ।

डाक्टरहरूले ओपीडी सेवा बन्द गर्दा उपचार सेवा प्रभावित भएको छ । डाक्टरहरूले सुरक्षा र हातपात गर्ने बिरामीका आफन्तमाथि कारबाहीको माग गरेर पेन डाउन गरेको अस्पताल प्रशासन प्रमुख तेज के.सी.ले बताए ।

याे पनि

दाँतको उपचार गर्न आएकी बिरामीको मृत्यु, भैरहवा मेडिकल कलेज तनावग्रस्त

बिरामी मृत्यु प्रकरणः तनाव बढेपछि भैरहवा अस्पतालको ओपीडी सेवा बन्द

प्रकाशित मिति: सोमबार, चैत ३, २०७६ १९:१७