कोरोना सङ्कटबीच सम्बन्धविच्छेद बढ्यो, यस्तो छ कारण

A+ A A-

कोरोना भाइरसको संकट बढिरहँदा सम्बन्धविच्छेदका घटना बढेका छन् । डेली मेलको रिपोर्टअनुसार चीनको विवाह दर्ता गर्ने स्थानीय निकायले सम्बन्धविच्छेदका घटना बढेको जनाएको छ ।

उनीहरूले कोरोना भाइरसको संक्रमणका कारण घरभित्रै अधिक समय बिताउनुपरेको थियो । कोरोना भाइरसको संक्रमण नियन्त्रणका लागि चीनले देशका केही इलाकामा ‘लक डाउन’ को घोषणा गरेको थियो ।

आपतकालीन अवस्थाका कारण लाखौँ मानिसहरूले बन्द घरमा बिताउनुपरेको थियो । आपतकालको अवस्थामा अत्यावश्यक काम परेमा मात्रै बाहिर जाने अनुमति दिइएको थियो ।

चीनको सिचुआन प्रान्तको एक स्थानीय पञ्जिकाधिकारी लु सिजुनले २४ फेब्रुअरीपछि मात्रै ३ सय जोडीले सम्बन्धविच्छेदका लागि निवेदन दिएको बताएका छन् ।

स्थानीय सञ्चारमाध्यमसँगको कुराकानीमा सिजुनले यसअघिको तुलनामा रोग फैलिएको समयमा सम्बन्धविच्छेदका घटना बढेको बताएका छन् ।

उनले भने, ‘युवाहरूले धेरै समयसम्म बन्द घरभित्र बिताएका छन् । सामान्य कुराका कारण उनीहरूबीच तनाव उत्पन्न हुने गर्छ र त्यस्ता झगडाहरू बढ्दै जाँदा सम्बन्धविच्छेदका घटनासमेत बढेका छन् ।

शांसी प्रान्तको पञ्जिकाधिकारीको कार्यालयमा पनि सम्बन्धविच्छेदको स्वीकृति लिनेको संख्या बढेको छ । १ महिना घरभित्रै रहनु पनि सम्बन्धविच्छेदका घटना बढ्नुको एउटा कारकका रूपमा देखिएको छ ।

ग्लोबल टाइम्सले एक अधिकारीलाई उद्धृत गर्दै एक कार्यालयमा एकै दिनमा सम्बन्धविच्छेदका १४ वटा घटना आएको उल्लेख गरेको छ ।