बीमा कम्पनीको बेइमानी, भन्छन् : महामारी र युद्धको जोखिम बीमाले समेट्दैन

A+ A A-

चीनबाट फैलिएको कोरोना भाइरसले विश्वभरका मानिसलाई त्रासमा पारिरहँदा अर्थतन्त्रमा समेत ठूलो प्रभाव परेको छ । विश्व व्यापार कोरोना भाइरसका कारण अस्तव्यस्त भइसकेको छ ।

अर्थतन्त्रका अवयवभित्र पनि बीमितहरू सङ्क्रमित भए उपचार खर्च र मृत्यु भए बीमा रकम दिनुपर्ने हुन्छ ।

बीमा अर्थतन्त्रको एउटा पाटो हो । मानिसले आफ्नो सुरक्षाका लागि बीमा गर्छन् । कोरोना भाइरसले हाल विश्वमा ६ हजार ५ सयभन्दा बढी मानिसले ज्यान गुमाएका छन् । २ लाखभन्दा धेरैमा कोरोना भाइरसको सङ्क्रमण रहेको विश्व स्वास्थ्य सङ्गठनले जनाएको छ । सङ्गठनले नेपाललाई अति जोखिम देशको सूचीमा पनि राखेको छ ।

हाल नेपालमा ८० लाख बीमित रहेका राष्ट्रिय बीमा समितिको तथ्याङ्कमा उल्लेख छ । केही बीमितहरूमा कोरोना भाइरसको सङ्क्रमण देखा परे बीमा समितिको उपचारका लागि कस्तो भूमिका हुन्छ भनने आमनागरिकको चासोको विषय बनेको छ ।

यदि नेपालमा कोरोना भित्रियो र नियन्त्रणबाहिर गएको खण्डमा बीमा कम्पनीले दिने क्षतिपूर्तिमा कस्तो प्रभाव पर्छ ? कोरोना भाइरसका सङ्क्रमणका कारण बिरामीको मृत्यु भए बीमा कम्पनीले क्षतिपूर्ति तिर्नुपर्ने दात्यिवभित्र पर्छ कि पर्दैन ? भन्ने आममानिसमा चासो छ ।

‘महामारी र युद्धमा बीमा कम्पनी जिम्मेवार हुँदैन’

महामारी र युद्धको जोखिमलाई बीमाको नीतिमा नसमेटिने बीमा कम्पनीहरू बताउँछन् । महामारी र युद्धमा बिरामी भएका र ज्यान गुमाएका बीमितहरूलाई समेट्ने विषय अन्तर्राष्ट्रिय मापदण्डमा नरहेको उनीहरूले बताएका छन् ।

कोरोना भाइरस पहिचान नखुलेको रोग हो । यस्तो रोग महामारी र युद्ध जस्तो मान्यताभित्र पर्ने भएकाले बीमा कम्पनीहरूले समेट्न नसक्ने महालक्ष्मी लाइफ इन्स्योरेन्स कम्पनीका प्रमुख कार्यकारी अधिकृत रमेशकुमार भट्टराईले बताए ।

‘युद्ध र महामारीको जोखिम बीमा कम्पनीहरूले बोक्दैनन् । विश्वव्यापी मान्यता यस्तो छ । नेपालले मात्र मान्नुपर्छ भन्ने हुँदैन’, उनले भने, ‘इबोला र बर्डफ्लुको पनि असर नेपाली बीमा क्षेत्रमा खासै परेन । कोरोनाका कारण पनि अहिले नै डराउनुपर्ने अवस्था आइसकेको छैन । यसका कारण बीमा कम्पनीमा समस्या नपर्ला ।’

कोरोना भाइरसको महामारी फैलिएको खण्डमा बीमा क्षेत्र नाजुक अवस्थामा पुग्ने उनको भनाइ छ । कोरोना भाइरसको त्रासका कारण बीमा गर्न आउनेहरूमा द्विविधा उत्पन्न भइरहेको छ । यादि नेपालमा देखा परे बीमा क्षेत्रलाई अहिलेको अवस्थामा आउन ५ वर्ष लाग्ने प्रमुख कार्यकारी अधिकृत भट्टराईको तर्क छ ।

कोरोना भाइरसको सङ्क्रमण भएका बिरामीको उपचार गर्ने जिम्मा राज्यको भएको र यस्ता रोग स्वास्थ्य बीमाभित्र पर्ने बीमा समितिका निर्देशक राजुरमण पौडेलले बताए । बीमा कम्पनीलाई महामारी र अचानक लाग्न रोगमा आफ्ना ग्राहकप्रति जिम्मेवार भएर सेवा दिनुपर्ने समितिका निर्देशक पौडेलले बताए ।

विगतका स्पेनिस फ्लु र इबोला महामारीमा सङ्क्रमणले नेपालमा खासै प्रभाव परेन । यी रोगका सङ्क्रमितमध्ये ६० प्रतिशतको मृत्यु भएको विश्व स्वास्थ्य सङ्गठनको तथ्याङ्कमा छ ।

कोरोना भाइरस सङ्क्रमितमध्ये ७ प्रतिशतको मृत्यु भएको देखिएको छ । कोरोना भाइरसका कारण बीमा कम्पनीमा धक्का पर्ने बीमा कम्पनीहरू बताउँछन् । कोरोनाका कारण नेपालको बीमा कम्पनीलाई मात्र होइन, विश्वका बीमा कम्पनीमा समस्या उत्पन्न हुने उनीहरूको बुझाइ छ ।

अचानक फैलिने महामारीलाई बीमाले समेटनुपर्छ : विज्ञ

कोरोना भाइरसका बिरामीलाई स्वास्थ्य बीमामार्फत् समेट्नुपर्ने बीमाविज्ञ बताउँछन् । बीमा कम्पनीहरूको काम बीमा गर्नु मात्र होइन, उनीहरूले अचानक आउने रोगसँगै महामारी जस्ता विषयमा ध्यान दिनुपर्ने बीमाविज्ञ रवीन्द्र घिमिरेले बताए ।

बीमा गर्ने बेलामा यस्तो हुन्छ, उस्तो हुन्छ भनेर आश्वासन दिएपछि महामारी र युद्धको जोखिमलाई बीमाले समेट्दैन भन्नु मूर्खता भएको विज्ञ घिमिरेको भनाइ छ ।

‘कोरोना भाइरसको सङ्क्रमणले बीमित बिरामी भएर मरे भने बीमाले समेट्दैन भनेर पन्छिन खोज्नु गलत हो । सरकारले यो विषयमा ध्यान दिनुपर्छ । कोरोना भाइरस जस्ता महामारीमा बीमा कम्पनीलाई राज्यले जिम्मेवार बनाउनुपर्छ’, उनले भने, ‘बीमा गर्दा बचतसँगै सुरक्षा हुन्छ भन्ने बीमितलाई आस हुन्छ । महामारी र युद्धको जोखिममा बीमितलाई क्षतिपूर्ति दिएर नेपालका बीमा कम्पनी उदाहरणीय बन्नुपर्छ ।’

प्रकाशित मिति: सोमबार, चैत ३, २०७६ १२:०६