युवाका सीप र कलालाई राष्ट्रिय योगदानसँग जोड्नुपर्छः मन्त्री विश्वकर्मा

A+ A A-

युवा तथा खेलकूदमन्त्री जगतबहादुर विश्वकर्माले युवाका सीप र कलालाई राष्ट्रिय योगदानसँग जोड्न सरकार तत्पर रहेको बताएका छन् ।

नेपाल सुनचाँदी हस्तकला व्यवसायी संघले आयोजना गरेको ‘नेपालको सुनचाँदी हस्तकलाको क्षेत्रमा युवा व्यवसायी कालीगढको वर्तमान अवस्था र सीपको स्तरीकरणमा सरोकारवाला निकायको भूमिका’ विषयक कार्यशाला गोष्ठी उद्घाटनका क्रममा मन्त्री बिश्वकर्माले यस्तो बताएका हुन् ।

सरकारले अघि बढाएको समृद्ध नेपालः सुखी नेपाली सहितको राष्ट्रिय लक्ष्य हासिल गर्ने सवालमा युवाशक्तिको मुख्य भूमिका रहने उनको भनाइ छ ।

‘युवालाई श्रम र उत्पादनसँग जोड्दै उद्यमशील, स्वरोजगार र आत्मानिर्भर बनाउन नसकेसम्म उक्त लक्ष्य पूरा गर्न गाह्रो छ,’ मन्त्री विश्वकर्माले भने ।

कला, सीप र कालीगढको सम्मान एवं मूल्यांकन गर्न नसक्दा आर्थिक समृद्धिमा देश पछाडि परेको उनको भनाइ छ ।

सांसद आशाकुमारी विश्वकर्माले कालीगढको क्षमता र सीपलाई राज्यले आर्थिक उपार्जनमा लगाउनुपर्ने बताइन् ।

कार्यक्रममा प्राविधिक शिक्षा तथा व्यावसायिक तालिम परिषद (सिटिइभिटी का निर्देशक टेकबहादुर मल्लले सुनचाँदीका गहना निर्माण सम्बन्धी दक्ष बनाउन तालिममा पाठ्यक्रम तयार भइरहेको बताउँदै यसबाट हातमा सीप भएका तर आंैपचारिक शिक्षा हासिल नगरेका कालीगढलाई सहज हने बताए ।

नेपाल सुनचाँदी हस्तकला व्यवसायी संघका अध्यक्ष मोहन विश्वकर्माले राज्यले कला, सीप र कालीगढको उच्च व्यवस्थापन नगर्दा नेपालका कालीगढहरु धरासायी बन्दै गएको बताए ।

राज्यले सुनचाँदी क्षेत्रका कला र सीप मात्रै नभएर नेपालका समग्र कालीगढहरुको मूल्यांकन गर्न सके सीपको चाँडै स्तरोन्नति हुनुका साथै देशको समृद्धीमा टेवा पुग्ने बताए ।

प्रकाशित मिति: आइतबार, माघ १३, २०७५ ११:२७