मातृशिशु मृत्युदर घटाउन प्रदेश ५ सरकारको विशेष अभियान

A+ A A-

मातृशिशु रूग्णता तथा मृत्यु न्यूनीकरणका लागि प्रदेश ५ मा विशेष अभियान सञ्चालन गरिने भएको छ । प्रदेशको सामाजिक विकास मन्त्रालयले प्रदेशका गर्भवती महिला तथा नवजात शिशुको मृत्युदरलाई घटाउन स्वास्थ्यकर्मीलाई तालिमदेखि बर्थिङ सेन्टरको सुधार तथा उपकरणमा सहयोग गर्ने भएको छ ।

प्रदेश सरकारले १२ जिल्लाहरूमा संस्थागत प्रसूतिको सुनिश्चित गर्दै मातृशिशु मृत्युदर न्यूनीकरण गर्न संघीय सरकारको विशेष अनुदान तथा प्रदेशको आफ्नै लगानीमा उक्त कार्यक्रम गर्न लागेको हो ।

प्रदेशका सामाजिक विकासमन्त्री सुदर्शन बरालले संघीय सरकारले मातृशिशु मृत्यु न्यूनीकरणका लागि १० करोड रुपैयाँ अनुदान उपलब्ध गराएको र सोही रकमबाट विभिन्न कार्यक्रम गर्न लागिएको जानकारी दिए ।

हाल प्रदेश नं. ५ मा २१ प्रतिशत गर्भवती स्वास्थ्य संस्थाभन्दा बाहिर असुरक्षित सुत्केरी हुने तथ्यांक छ । स्वास्थ्य संस्थामै सुत्केरी हुनेहरूमध्ये पनि २८ प्रतिशत अदक्ष प्रसूतिकर्मीबाट हुने गरेका छन् । यही तथ्यांकलाई आधार मान्दा मातृशिशु मृत्युको जोखिम अत्यधिक भएकाले मृत्युदर रोक्न प्रदेश सरकारले ग्रामीण क्षेत्रका बर्थिङ सेन्टरलाई प्राथमिकतामा राखेर दक्ष जनशक्ति र उपकरणको व्यवस्था गर्दै छ ।

त्यस्तै, विभिन्न हेल्थपोष्ट तथा अस्पतालहरूमा कार्यरत मेडिकल अफिसरहरूका लागि एड्भान्स दक्ष प्रसूति तालिम दिइनेछ भने बर्थिङ सेन्टरहरूमा कार्यरत नर्सलाई ग्रामीण अल्ट्रासाउण्ड तालिम र पोर्टेबल अल्ट्रासाउण्डसमेत उपलब्ध गराउने स्वास्थ्य तालिम केन्द्र बुटवलका निर्देशक महेश्वर श्रेष्ठले जानकारी दिए ।

हाल प्रदेशका अस्पताल तथा स्वास्थ्य संस्थाहरूमा करिब १ हजार ७ सय नर्स कार्यरत रहेकोमा करिब आधा नर्सलाई दक्ष प्रसूति तालिम दिइनेछ । प्रदेश ५ मा ३ सय ६३ बर्थिङ सेन्टर, ५ सय ७० हेल्थपोष्ट र ३० पीएचसी रहेका छन् ।

दक्ष प्रसूतिकर्मी बनाउन एसबीए तालिम

एसबीए तालिमका लागि चालू आर्थिक वर्षभित्र ग्रामीण क्षेत्रका २ सय ९० नर्सिङ कर्मचारीहरूलाई छनोट गरी ६० दिने तालिम दिइनेछ, जसअन्तर्गत हाल देशभरका १ हजार ३ वटा ट्रेनिङ सेन्टरमा १ सय ३० जना ग्रामीण क्षेत्रका नर्सहरूले दक्ष प्रसूतिकर्मी (एमबीए) तालिम लिइरहेको स्वास्थ्य तालिम केन्द्र बुटवलका निर्देशक महेश्वर श्रेष्ठले बताए ।

त्यस्तै, कार्यक्रमअन्तर्गत १२ जना मेडिकल अफिसरलाई एड्भान्स एसबीए तालिम दिइनेछ भने ग्रामीण क्षेत्रका ३० जना स्वास्थ्यकर्मीलाई ग्रामीण अल्ट्रासाउण्ड तालिम प्रदान गरिनेछ । नर्सिङ कर्मचारीहरूका लागि १३ वटा तालिम केन्द्रमा तालिम सुरू भइसकेको छ । मेडिकल अधिकृतका लागि र ग्रामीण अल्ट्रासाउण्ड तालिम भने क्रमशः १६ र १२ चैतदेखि हुँदै छ ।

यस्तै, कार्यक्रमअन्तर्गत बर्थिङ सेन्टरमा रहेका स्थानीय सरकारलाई १ सय ३५ वटा उपकरण उपलब्ध गाउने प्रदेश स्वास्थ्य आपूर्ति व्यवस्थापन केन्द्रका प्रमुख दिनेश चापागाईले जानकारी दिए । उनले स्थानीय सरकारको मागअनुसार डेलिभरी टेबल, बेबी वार्मर तथा सक्सन मेसिनलगायतका २६ सामग्री रहने उक्त उपकरण सेट उपलब्ध गराइने बताए । साथै, तालिमपश्चात् ग्रामीण क्षेत्रका बर्थिङ सेन्टरहरूमा पोर्टेबल अल्ट्रासाउण्ड मेसिनसमेत उपलब्ध गराइने उनको भनाइ छ ।

प्रदेश ५ मा ३ हजारभन्दा बढीको जाँच

यसैबीच, प्रदेश ५ मा अहिलेसम्म कोरोना भाइरसको संक्रमण नदेखिएकाले त्रसित नहुन चिकित्सकहरूले सर्वसाधारणलाई आग्रह गरेका छन् । प्रदेश ५ अस्पताल विकास महाशाखा प्रमुख उमाशंकर प्रसाद चौधरीले कोरोनाको संक्रमण नदेखिएकाले आशंकाकै भरमा त्रसित नहुन आग्रह गरे ।

नेपालमा हालसम्म देखा नपरेको कोरोना संक्रमण भइहालेमा पनि ८० प्रतिशत बिरामी सामान्य उपचारबाटै निको हुने उनले बताए । प्रदेश ५ भित्र गत शनिबारसम्म ३ हजार ३ सय जनाको स्वास्थ्य परीक्षण गर्दा कुनै पनि संक्रमित व्यक्ति फेला नपरेको चौधरीले जानकारी दिए ।

प्रदेश ५ स्वास्थ्य विभाग निर्देशनालयका निर्देशक डा. विनोदकुमार गिरीले बजारमा हल्ला फैलिएजस्तो नेपालमा कोरोनाको जोखिम नभएको बताए ।

२७ वटा आइसोलेसन बेड व्यवस्थापन

कोरोना भाइरस प्रकोपको पूर्वतयारीका लागि बुटवलका विभिन्न अस्पतालहरूमा २७ वटा आइसोलेसन बेड व्यवस्थापन गरिएको छ ।

बुटवल उपमहानगरपालिका र सामाजिक विकास मन्त्रालय प्रदेश नं. ५ को पहलमा मेडिटेक अस्पतालमा ६, मर्सिसिटी अस्पतालमा २, लुम्बिनी सिटी अस्पतालमा ४, सिद्धबाबा अस्पतालमा ५, तिनाउ इन्टरनेसनल अस्पतालमा ८ वटा बेड आइसोलेसनका लागि छुट्याइएको बुटवल उपमहानगरपालिका शिक्षा तथा जनस्वास्थ्य महाशाखा प्रमुख मित्रमणि खनालले बताए ।

प्रकाशित मिति: आइतबार, चैत २, २०७६ १९:०५