कोरोनाले थलियो युरोप, इटली र स्पेन नराम्ररी प्रभावित

A+ A A-

चीनको वुहानबाट सुरु भएको कोरोना भाइरसका कारण युरोप नराम्ररी प्रभावित बनेको छ । चीनमा कोरोना भाइरस नियन्त्रण हुँदै जाँदा युरोपमा फैलिएको छ ।

कोरोना भाइरसका कारण इटाली र स्पेन नराम्ररी प्रभावित भएका छन् । पछिल्लो २४ घन्टामा कोरोना भाइरसका कारण इटलीमा मात्रै १ सय ७५ जनाको मृत्यु भएको छ भने स्पेनमा ६३ जनाले ज्यान गुमाएका छन् ।

यस्तै इरानमा पनि थप ९७ जनाको मृत्यु भएपछि मृतकको संख्या ६६ सय ११ पुगेको छ ।

इटलीमा ३ हजार ४ सय ९७ जना नयाँ संक्रमित देखिएका छन् भने इरानमा १ हजार ३ सय ६५ र स्पेनमा १ हजार १ सय ५९ नयाँ संक्रमित भेटिएको पुष्टि भएको छ ।

कोरोना भाइरस सबैभन्दा पहिले देखिएको चीनमा भने १० जनाको मृत्यु भएपनि एक जना पनि नयाँ बिरामी पछिल्लो २४ घन्टामा देखिएका छैनन् । गत डिसेम्बरमा चीनको वुहानमा कोरोना भाइरसको संक्रमण पत्ता लागेपछि पहिलो पटक नयाँ संक्रमित नभेटिएका हुन् ।

पछिल्लो २४ घन्टामा विश्वभर कोरोना भाइरसका कारण ४ सय ५ जनाको मृत्यु भएको छ भने ११ हजार ५१ जना नयाँ संक्रमित भेटिएका छन् । यसरी नयाँ संक्रमित हुनेमा सबैभन्दा बढी युरोपेली राष्ट्रमा रहेका छन् ।

हालसम्म चीनमा ३ हजार १ सय ९९, इटालीमा १ हजार ४ सय ४१, इरानमा ६ सय ११, दक्षिण कोरियामा ७५, स्पेनमा १ सय ९६, जर्मनीमा ९, फ्रान्समा ९१, अमेरिकामा ५७, स्वीट्जरल्यान्डमा १३, बेलायतमा २१, नेदरल्यान्डस्मा १२, जापानमा २२ जनाको कोरोना भाइरसका कारण मृत्यु भइसकेको छ ।

विश्व स्वास्थ्य संगठन (डब्लुएचओ) ले कोरोनाभाइरस विश्वव्यापी महामारीको केन्द्रबिन्दु अब युरोप बनेको जनाएको छ ।

डब्लुएचओका महानिर्देशक टेड्रोस एड्हानोम गेहब्रेयसले देशहरूलाई आक्रामक कदम चाल्न, समुदायलाई परिचालन गर्न र मृत्यु हुन नदिन मानिसहरूबीच दूरी कायम राख्न आग्रह गरेका छन् ।

चीनपछि सबैभन्दा बढी इटलीमा संक्रमित र मृत्यु हुनेको संख्या रहेको छ । युरोपमा इटलीपछिस्पेन प्रभावित बनेको छ । विश्व स्वास्थ्य संगठनका अनुसार विश्वका १ सय ४२ देशमा कोरोना भाइरस (कोभिड–१९) को संक्रमण देखिएको छ ।

विश्वभर कोरोना भाइरसका कारण ५ हजार ८ सय ३५ जनाको मृत्यु भएको छ भने १ लाख ५६ हजार ५ सय ३३ जना संक्रमित भइसकेका छन् । त्यसमध्ये ७५ हजार ९ सय २२ जना उपचारपछि घर फर्किएका छन् ।

प्रकाशित मिति: आइतबार, चैत २, २०७६ ०८:३०