काेरोना त्रासले रक्तदान राेकिएपछि पोखरामा रगत अभाव

A+ A A-

पोखरामा रगतको अभाव देखिएको छ । कोराना भाइरस संक्रमणको त्रासले गर्दा विभिन्न संघसंस्थाले नियमित गर्दै आएको रक्तदान कार्यक्रम रोकिदिँदा पोखरामा रगतको अभाव भएकाे हाे ।

काेरोना त्रासका कारण विभिन्न संघ संस्थाले रक्तदान कार्यक्रम सञ्चालन नगर्दा पोखरामा ए पोजेटीभ र एबी पोजेटिभ रक्त समूहका रगत अभाव हुन थालेको अस्पतालहरूले जनाएका छन् ।

धेरै मानिसमा पाइने ‘ए पोजेटिभ’ रक्त समूहको रगत भए पनि अस्पतालहरूमा अपरेसन गराउने बिरामी र दुर्घटनामा पर्नेको संख्यासमेत धेरै भएका कारण उक्त समूहको रगतको माग उच्च छ।

विभिन्न संघ संस्थाले वार्षिक कार्यतालिका बनाएर रक्तदान कार्यक्रम सञ्चालन गर्दै आएका भए पनि यतिबेला कोरोना भाइरसको त्रासले रक्तदानका कार्यक्रम अत्यन्तै कम राख्ने गरिएकाे छ । रगतकाे माग उच्च भएकाे समयमा रक्तदान कार्यक्रम कम हुनु नै अभावकाे मुख्य कारण भएकाे क्षेत्रीय रक्त सञ्चार केन्द्र पोखराका निर्देशक ध्रुवमणि लामिछानेले बताए । दुई हप्तायता पोखरामा रक्तदान कार्यक्रम नहुँदा ए पोजेटिभ र एबी पोजेटिभ समूहको रगत अभाव भएको उनले बताए ।

निर्देशक लामाछानेका अनुसार ए पोजेटिभ रगतको माग पछिल्ला दिनमा अत्यधिक छ। ‘कोरोना संक्रमणको त्रासले रक्तदान कार्यक्रम सञ्चालन नभएका कारण ए पोजेटिभ र एबी पोजेटिभ रगतको अभाव भएको छ । पोखरामा अहिले दैनिक ४० देखि ५० पोका रगतको माग छ’, उनले भने ।

अन्य समूहअन्तर्गत ओ नेगेटिभ , ए नेगेटिभ , एबी नेगेटिभ रगतका लागि रक्तसञ्चार केन्द्रले आकस्मिक रक्तदाता युनिटमा आबद्ध सदस्यबाट पूर्ति गर्ने गरेको छ ।

रगतको अभाव बढेपछि नेपाल रेडक्रस सोसाइटी कास्की शाखाले शुक्रबार बिहान पोखराको महेन्द्र पुलमा रक्तदान कार्यक्रमको आयोजना गरेको छ। महेन्द्र पुलमा आयोजना गरिएको रक्तदान कार्यक्रमबाट तत्कालका लागि केही रगत संकलन गरिएको रेडक्रसले जनाएको छ ।

नेपाल रेडक्रस सोसाइटी कास्की शाखाका मन्त्री धर्मराज अधिकारीले रक्तदानका कार्यक्रम राख्न संघसस्थालाई आग्रह गरे । ‘रेडक्रसले रक्तदाताहरूबाट नै रगत लिएर रगत आपूर्ति गर्ने हो, अहिले कोरोनाको त्रासका कारण रक्तदान कार्यक्रम भएका छैनन । काेरोनाका कारण नियमित रक्तदान गर्दै आएका संघसस्थाले कार्यक्रम रोक्दा समस्या आयो’, उनले भने ।

प्रशासनले भेला नहुन र जमघट नगर्न आग्रह गरेपछि समस्या आएको अधिकारीले बताए। उनले भने, ‘प्रशासनको आग्रहपछि संघसंस्थाले आयोजना गरेका कार्यक्रम रोकेकाले रगत अभाव भयो। कार्यक्रम नै नभएपछि रगत थेग्न सक्ने स्थिति छैन ।’

यस क्षेत्रमा संगठित रूपमा ठूलो सञ्जालमार्फत रक्तदान कार्यक्रम सञ्चालन गर्दै आएको लायन्स क्लब इन्टरनेसनल ३२५ बी १ नेपालका रक्तदान डिपार्टमेन्ट चिफ शैलेन्द्र मोहन भट्टराईले पोखरामा भएको रगको अभावलाई कम गर्न यस क्षेत्रका क्लबलाई आग्रह गर्ने बताए । ‘हामीले हप्तामा शनिबार विभिन्न क्लबमार्फत रक्तदान कार्यक्रम गर्दै आएका छौं । तर, रगतको अभाव भएकाे सूचना आएपछि अन्य बार पनि रक्तदान गर्न क्लबलाई आग्रह गरेका छौँ । यस वर्ष हामीले जिल्लाका क्लबहरूमार्फत ५ हजार युनिट रगत संकलन गरिसकेका छौँ।’

दर्जनौँ क्लबहरूलाई आग्रह गरेर भए पनि लायन्सले पोखरामा भएको रगतको अभाव टार्ने उनले बताए ।

पोखरामा दैनिक ८० युनिटको हाराहारीमा रगतको माग हुने गरेको छ । पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल, मणिपाल शिक्षण अस्पताल र गण्डकी मेडिकल कलेजमा सबैभन्दा धेरै रगतको खपत हुने गरेको छ।

नेपाल रेडक्रस सोसाईटी र रक्त सञ्चार केन्द्रमार्फत पोखरामा नियमित २ सय ५० भन्दा बढी विभिन्न संघ संस्थाहरूले रक्तदान कार्यक्रम सञ्चालन गर्दै आएका छन । त्यसमध्ये यस क्षेत्रमा ३ सयभन्दा बढी लायन्स क्लबहरूले आफ्नो वार्षिक कार्यतालिका नै तयार पारेर रक्तदान कार्यक्रम गर्दै आएका छन् ।

प्रकाशित मिति: शनिबार, चैत १, २०७६ ०६:५५