उपत्यकाका ठूला अस्पतालमै छैन ‘आइसोलेसन’ कक्ष

A+ A A-

उपत्यकामा ठूला भनिएका निजी अस्पतालहरूले अझैसम्म कोरोना भाइरस (कोभिड–१९) का बिरामीका लागि पूर्वतयारी गरेका छैनन् ।

उपत्यकाका ठूला भनिएका अस्पतालहरू ललितपुरको मेडिसिटी, अल्का, बीएण्डबी, त्यसरी नै काठमाडौंको ह्याम्स, बयोधा अस्पतालले कोरोनाका बिरामी राख्ने ‘आइसोलेसन’ कक्ष निर्माण नगरेका हुन् ।

माथि उल्लेख गरेका अस्पताल प्रशासनका अनुसार कोरोनाका बिरामी आइहाले पहिला नै बनाएका क्याबिन कक्षहरूमा राखिने बताए ।

त्यसबाहेक नर्भिक अन्तर्राष्ट्रिय अस्पताल र ग्राण्डी अस्पतालले भने केही कोरोनाका बिरामी राख्ने ‘आइसोलेसन’ कक्ष निर्माण गरेको छ । ग्राण्डी अस्पतालका प्रशासनिक अधिकृत हरि खण्ड्काका अनुसार ग्राण्डी अस्पतालले २ वटा छुट्टै ‘आइसोलेसन’ कक्ष निर्माण गरेको छ ।

‘हामीले ‘आइसोलेसन’ कक्षबाहेक ग्राण्डी अस्पताल आउने बिरामी र बिरामी भेट्न आउने ‘भिजिटर’हरूलाई जाँच गर्न अस्पतालभित्र छिर्नुअगाडि नै ज्वरो नाप्नेदेखि ‘ह्याण्ड’ सेनिटाइजरले हात सफा गर्न लगाउँछौँ,’ उनले भने ।

नर्भिक अस्पतालले पनि कोरोनाका बिरामीका लागि भनेर केही कक्ष निर्माण गरेको जनाएको छ । विश्वभरि कोरोनाको महामारी फैलिएपछि सरकारले उपप्रधानमन्त्री तथा रक्षामन्त्री ईश्वर पोखरेल संयोजकत्वमा कोरोना रोकथाम उच्चस्तरीय समन्वय समिति गठन गरेको छ ।

उक्त समितिको बिहीबार बसेको बैठकले कोरोना रोकथाम तथा सजगताका लागि १९ निर्णय लिएको थियो । उक्त बैठकले अर्को सूचना जारी नभएसम्म वैदेशिक रोजगारीका लागि दिइने श्रम स्वीकृति स्थगन गर्ने, रोकथाम नियन्त्रण तथा उपचारका लागि आईसीयू तथा ‘आइसोलेसन’ कक्ष निर्माण गर्ने निर्णय गरेको छ ।

कोरोनाको परीक्षण हाल शुक्रराज ट्रपिकल तथा सरुवा रोग अस्पताल टेकुमा मात्रै हुने गरेको छ । सो अस्पतालले कुनै बिरामीमा कोरोनाको लक्षण देखिए कि आफ्नै आइसोलेसन कक्षमा राखेर उपचार गर्छ कि त पाटन अस्पतालमा रेफर गर्दै आएको छ ।