कोरोना परीक्षणः ज्वरो नापेर हवाई यात्रु भित्र्याउँछ त्रिभुवन विमानस्थल

A+ A A-

विश्वमै कोरोना भाइरसको त्रास बढिरहेका बेला नेपाल पनि त्यसबाट अछुतो छैन । अहिले तपाईं त्रिभुवन अन्तर्राष्ट्रिय विमानस्थलको आन्तरिक उडानमार्फत् कतै जाँदै हुनुहुन्छ भने विमानस्थलमा तपाईंको ज्वरो सम्बन्धित एयरलाइन्सले खटाएका कर्मचारीले परीक्षण गर्छन् । सामान्य ज्वरोको परीक्षण गर्ने उपकरणले यात्रुलाई जाँच गरिन्छ ।

भद्रपुरदेखि बुद्ध एयरमा काठमाडौं आउने एक यात्रुले विमानस्थलमा ज्वरो परीक्षण गर्ने बुद्ध एयरका कर्मचारीलाई ज्वरो नापेर कोरोना थाहा हुन्छ ? भनेर प्रश्न गरेका थिए । यो प्रश्नको यस्तो उत्तर दिएका थिए ती कर्मचारीले, ‘यसरी परीक्षण गर्दा कोरोनाका लक्षण थाहा हुन्छ त ? भन्ने यात्रुको प्रश्नमा ती कर्मचारी सहजै उत्तर दिन्छन्– नियम फलो गरेका हौँ । यहीँ ज्वरो नाप्न दिएको छ । हामीलाई अराएजति गरेको हो ।’

यसरी आन्तरिक उडानमार्फत् एक स्थानदेखि अर्को स्थानमा जाने हवाई यात्रुको कोरोना परीक्षण एयरलाइन्सकै कर्मचारीले गरिरहेका छन्, त्यो पनि सामान्य ज्वरो नाप्ने थर्मोमिटरले ।

हाल कोरोना भाइरसको त्रास विश्वमा छ । कोरोना भाइरसको त्रास फैलिएसँगै धेरै देशले विदेशी नागरिक आवतजावतलाई समेत रोक लगाएका छन् । कोरोना भाइरसको सङ्क्रमण नियन्त्रण गर्न विश्वका धेरै देशले आफ्ना नागारिकलाई अन्य देशमा जान दिएका छैनन् ।

कोरोना भाइरसको सङ्क्रमण फैलिएसँगै एक स्थानदेखि अर्को देशमा हिँडडुल गर्न मानिस डराउन थालेका छन् । कोरोना भाइरसको सङ्क्रमण फैलिएसँगै स्वास्थ्य तथा जनसंख्या मन्त्रालय, त्रिभुवन अन्तर्राष्ट्रिय विमानस्थल र देशभरका आन्तरिक विमानस्थलमा अवतरण गर्ने सबै विमानका यात्रुहरूको इमिग्रेसनमा जानुअघि नै कोरोना परीक्षण गर्न थालेको छ ।

तर, यसरी गरिएको परीक्षणमा ज्वरो मात्र नापिन्छ । यसरी परीक्षण गर्दा वास्तविक कोरोना भाइरसको पहिचान खुल्छ त ? भन्ने कुराचाहिँ प्रश्नको विषय बनेको छ ।

सरकारले कोरोना भाइरसको त्रास फैलिएसँगै विमानस्थल र सिमानाका मुख्य भन्सार नाकामा परीक्षण गर्न हेल्थ डेस्क सञ्चालनमा ल्याएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताएका छन् ।

विमानस्थलमा परीक्षण गर्दा कोरोना भाइरसको लक्षण देखा परे तत्काल उपचारका लागि अस्पताल लैजाने प्रवक्ता डा. देवकोटाले बताए । हेल्थ डेस्कबाट कोेरोना भाइरसको लक्षण देखिए उपचारका लागि सम्बन्धित क्षेत्रका अस्पतालमा लैजान मन्त्रालयले निर्देशन दिएको उनको भनाइ छ ।

ज्वरो नापेर कोरोना भाइरसको लक्षण थाहा हुन्छ त ? भन्ने प्रश्नमा प्रवक्ता डा. देवकोटाले कोरोनाको मुख्य लक्षणभित्र ज्वरो पनि पर्ने जवाफ दिए ।

फितलो परीक्षण

कोरोना भाइरसको जोखिम न्यूनीकरणका लागि स्वास्थ्य तथा जनसंख्या मन्त्रालयले विमानस्थलस्थित हेल्थ डेस्कमा थर्मल स्क्यानर मेसिन जडान गरी परीक्षण गरिरहेको छ । नेपालको एक मात्र अन्तर्राष्ट्रिय विमानस्थलमा हवाई यात्रुको ज्वरो परीक्षण गर्ने थर्मल स्क्यानर मेसिन जडान गरिएको थियो । तर, उक्त मेसिनबाट ज्वरोको मात्र परीक्षण हुँदै आएको छ ।

विदेशबाट फर्किएका नेपालीहरू विदेशका अन्तर्राष्ट्रिय विमानस्थलमा कोरोनाको कडाइसाथ परीक्षण गरेर मात्र आउन दिने गरेको बताउँछन् ।

कोरोना भाइरसको परीक्षणमा श्वास, रुघाखोकी, ज्वरो र अन्य शारीरिक अवस्थाको परीक्षण हुन्छ । यसरी परीक्षण गर्ने डाक्टर नै हुने गरेको उनीहरूले बताए । यसरी परीक्षण गर्दा शंका लागेपछि विमानस्थलबाट फर्काउने गरेको उनीहरूले जानकारी दिएका छन् ।

धरानका दिनेश राईले कतारको विमानस्थलमा ३ पटकसम्म कोरोना भाइरसको परीक्षण गरेर मात्र नेपाल आउन दिएको बताए । त्रिभुवन विमानस्थलमा भेटिएका राईले नेपाल फर्किनुअघि २ पटक कोरोना परीक्षण गराएको जानकारी दिए ।

नेपालको विमानस्थलमा सामान्य ज्वरो मात्र नापिएको उनको भनाइ छ । उनी जस्ता धेरै यात्रुको विमानस्थलमा सामान्य कोरोनाको परीक्षण गरिन्छ । नेपालमा भने सामान्य ज्वरो नापेर कोरोना भाइरसको परीक्षण गर्नु गलत भएको उनीहरूको भनाइ छ ।

विमानस्थलस्थित हेल्थ डेस्कका कर्मचारीले खाडीका देश, मलेसिया, चीन, थाइल्याण्ड, जापान र कोरियाबाट आएका कोरोना शंकास्पद यात्रुको स्वास्थ्य परीक्षण गरिरहेको देखिन्छ ।

आन्तरिक विमानस्थलहरूमा समेत एयरलाइसन्सका कर्मचारीले हवाई यात्रुको ज्वरोको परीक्षण गरिरहेका छन् । यसरी परीक्षण गरिरहेका एयरलाइन्सका कर्मचारी आफैँ असुरक्षित भएको बताउँछन् ।

सरकारले चीन, दक्षिण कोरिया, कतार, मलेसिया, जापान, फ्रान्स, जर्मनी, इटाली र इरानबाट स्वदेश फर्किन चाहने नेपालीलाई त्यहाँका चिकित्सकले ७ दिनअघिदेखि कोरोनाको सङ्क्रमण छैन भन्ने प्रमाणित गरेको प्रमाणपत्र भए मात्रै नेपाल प्रवेश गर्न दिइरहेको जानकारी दिएको छ ।

तर, कोरोना भाइरस पत्ता लाग्न पनि २ हप्ता लाग्छ । यसका कारण यात्रा क्रममा कोरोना भाइरस देखा परे नेपालमा भित्रिँदै गर्दा गरिने परीक्षण फितलो भइरहेको स्वास्थ्य जानकारहरू बताउँछन् ।

सरकारले चीन, दक्षिण कोरिया, जापान, फ्रान्स, जर्मनी, इटाली र इरानबाट स्वदेश फर्किन चाहने नेपालीलाई त्यहाँको चिकित्सकले ७ दिनअघिदेखि कोरोनाको संक्रमण छैन भन्ने प्रमाणित गरेको प्रमाणपत्र भए मात्रै नेपाल प्रवेश गर्न पाउँछ ।

प्रकाशित मिति: बुधबार, फागुन २८, २०७६ १५:१२