संकटालाई ३–० ले पराजित गर्दै त्रिभुवन आर्मी सेमिफाइनलमा

A+ A A-

१८औँ संस्करणको आहा रारा गोल्डकपमा त्रिभुवन आर्मी क्लब सेमिफाइनल प्रवेश गरेको छ । मंगलबार पोखरा रंगशालामा जारी प्रतियोगिताको तेस्रो क्वार्टरफाइनलमा संकटा क्लबलाई पराजित गर्दै आर्मी क्लब सेमिफाइनलमा प्रवेश गरेको हो ।

खेलमा आर्मीले संकटालाई ३–० गोल अन्तरले पराजित गरेको हो । त्रिभुवन आर्मीको जितमा सुधिल राई, नवयुग श्रेष्ठ र विवेक बस्नेतले १÷१ गोल गरे । सुधिलले १४औँ मिनेटमा नवयुग श्रेष्ठले मिलाएको बललाई गोलमा परिणत गरे भने नवयुगले खेलको ७०औँ मिनेटमा गोल गरे । त्यस्तै नवयुगले गोल गरेको ४ मिनेटपछि खेलको ७४औँ मिनेटमा विवेक बस्नेतले उत्कृष्ट गोल गर्न सफल भए ।

खेलमा दुवै टोलीले धेरै गोल गर्ने मौका पाए पनि गोलमा परिणत गर्न सकेनन् । खेलको २३औँ मिनेटमा भरत खवासले मिलाएको ओपन बललाई जर्ज प्रिन्स कार्कीले गोलमा परिणत गर्न सकेनन् । उनको प्रहार संकटाका गोलरक्षक राजाबाबु थापाले बचाए । यस्तै, खेलको २९औँ मिनेटमा नवयुग श्रेष्ठले प्रहार गरेको बल आकासिन पुग्यो । खेलको ४०औँ मिनेटमा संकटाका विदेशी खेलाडी ड्याडी अम्बाले हानेको सटसमेत आकासिएको थियो ।

५९औँ मिनेटमा संकटाका मासिके पिएरीले उत्कृष्ट ड्रिब्लिङ गर्दै बल प्रहार गरे पनि गोल गर्न भने सकेनन् । ६१औँ मिनेटमा आर्मीका सन्तोष तामाङले गरेको प्रहार पोष्टमाथिबाट बाहिरिन पुग्यो । दोस्रो गोल गरेपछि आर्मीका खेलाडीले लगातार संकटाको पोष्टमा प्रहार गरे । खेलको ७१औँ मिनेटमा आर्मीका कप्तान भरत खवासले शक्तिशाली प्रहार गरे ।

त्यसको १ मिनेटमै सन्तोष तामाङले डि–बक्सभित्रबाट प्रहार गरे । ती दुवै प्रहारलाई संकटाका गोलरक्षक राजाबाबु थापाले उत्कृष्ट बचाउ गरे । ७९औँ मिनेटमा कप्तान भरत खवासको पासमा जर्ज प्रिन्स कार्कीले गरेको प्रहार बाहिरिएको थियो । खेलमा म्यान अफ द म्याच पुरस्कार नवयुग श्रेष्ठले प्राप्त गरे ।

अब आर्मीले सेमिफाइनलमा मनाङ मस्र्याङ्दी क्लबसँग खेल्नेछ । खेल फागुन २९ गते बिहीबार हुनेछ । मनाङले क्वार्टरफाइनलमा झापा–११ लाई पराजित गर्दै सेमिफाइनलमा आफ्नो स्थान पक्का गरेको थियो । यस खेलसँगै प्रतियोगितामा क्वार्टरफाइनलका खेल सकिएका छन् ।

अब सेमिफाइनलका खेल सञ्चालन हुनेछन् । सेमिफाइनलमा आर्मीसँगै मनाङ मस्र्याङ्दी क्लब, नेपाल पुलिस क्लब र थ्री स्टारले प्रतिस्पर्धा गर्नेछन् ।

नेपाल पुलिस क्लबले क्वार्टरफाइनलमा घरेलु क्लब सहारा क्लब पोखरालाई टाइब्रेकरमा पराजित गर्दै सेमिफाइनल प्रवेश गरेको हो । यता साविक विजेता समेत रहेको थ्री स्टारले भारतीय क्लब गान्टोक सिटी एफसी सिक्किमलाई पराजित गर्दै सेमिफाइनल यात्रा तय गरेको छ ।

अब पहिलो सेमिफाइनलमा बुधबार नेपाल पुलिस क्लब र थ्री स्टारबिच खेल हुनेछ । यस्तै, दोस्रो सेमिफाइनलमा २९ फागुनमा मनाङ र आर्मी भिड्नेछन् । प्रतियोगितामा विजेता टोलीले १० लाख १ हजार रुपैयाँ पुरस्कार पाउँनेछन् भने उपविजेताले ५ लाख १ हजार नगद पुरस्कार पाउनेछन् ।

प्रकाशित मिति: मंगलबार, फागुन २७, २०७६ १९:१८