नेपाल-चीन ३ हवाई सेवा नियमित, अन्त कहाँ-कहाँ भइरहेको छ उडान ?

A+ A A-

विश्वव्यापी रुपमा फैलिएको कोरानाको भाइरसको सबैभन्दा ठूलो प्रभाव उड्डयन क्षेत्रमा परेको छ । विश्‍व स्वास्थ्य संगठनले नेपाललाई उच्च जोखिमको सूचीमा राखेपछि नेपाल हुदै जाने उडानमा पनि समस्या पर्ने गरेको छ । श्रमिक आवत जावतमा समस्या भएको छ ।

नेपालमा र नेपालबाट हुने उडानमा हालसम्म ४ एयर कम्पनीले उडान स्थगित गरेका छन् । नियमित उडान हुने मध्ये दुई देशसँग यस्तो समस्या परेको छ ।

चीनबाट नेपाल उडान हुनेमध्ये तिब्बत एयर र सिचुवान एयरले उडान स्थगित गरेको छ । त्यस्तै, हिमालय एयरलाइन्सले समेत चीनका लागि उडान स्थगित गरेको छ ।

तर, चीनबाट ३ वटा एयरलाइन्सको उडान भने जारी छ । नेपाल नागरिक उड्यन प्राधिकरका सह-सचिव राजेन्द्रकुमार क्षेत्रीका अनुसार एयर चाइना, साउथन एयर र चाइना इष्ट्रनले उडान भरिरहेका छन् । चीनमा ३ कम्पनीले अहिले उडान क्यान्सिल गरेका छन् क्षेत्रीले शिलापत्रसँग भने अन्य ३ को उडान भइरहेको छ ।

त्यस्तै, हिमालय एयरलाइन्सले कतारको उडान स्थगित गरेको छ । हामीले निरन्तर उडाइरहेका थियाैँ तर त्यहाँको सरकारले नेपाली नागरिकलाई समेत प्रवेश रोक लगाएपछि हामीले स्थगित गरेका हौँ, हिमालयन एयरलाइन्सका उपाध्यक्ष विजय श्रेष्ठले भने, यात्रु नै नपाएपछि उडान गर्नुको अर्थ भएन ।

हिमालयन एयरलाइन्सले यात्रु नपाएको भन्दै चीनमा पनि केही समय अघि उडान स्थगित गरेको थियो । हिमालयनले बैइजिङमा उडान भर्दै आएको थियो ।

त्यस्तै, नेपाल एयरलाइन्सले पनि कतारमा हुने उडान मंगलबारबाट स्थगित गरेको छ । उसले पनि कतार सरकारले नेपाली नागरिकलाई प्रवेशमा रोक लगाएसँगै मंगलबार बैठक बसेर अस्थायी स्थगन गरेको हो ।

हिमालयन एयरलाइन्सले दुई देशबाहेक अन्य देशमा भने उडान नरोकिएको र यात्रुका कारण समस्या पनि नपरेको जनाएको छ ।

हिमालयनले ढाका, साउदी अरब, यूएई, मलेसियालगायतका देशमा उडान भर्दै आएको छ । अहिले नै उडान रोक्नुपर्ने अवस्था आएको छैन, श्रेष्ठले भने ।

पछिल्लो समय समस्याको रुपमा हेरिएको कतारमा नेपाल एयरलाइन्स र हिमालयन एयरलाइन्सले उडान स्थगित गरे पनि कतार एयरवेज र नेपाल एयरलाइन्सले भने उडानलाई निरन्तरता दिएका छन् । कतार एयरलाइन्सले अनअराइभल भिसा रोके पनि उडानलाई निरन्तरता दिइनै रहेकाे छ, नागरिक उड्यन प्राधिकरणका प्रवक्तासमेत रहेका क्षत्रीले भने । तर कतारले पनि उडान संख्या भने घटाएको छ ।

नेपालमा कोरियाबाट कोरियन एयरलाइन्सले उडान भरिरहेको छ भने हङकङबाट ड्रागन एयरलाइन्सले उडान भरेको छ । सिंगारपुरबाट पनि उडान भइरहेको छ ।

नेपाल एयरलाइन्सले हालसम्म आधिकारिक रूपमा कतारमा मात्रै स्थगित गरेको छ । केही दिनअघि सुरु गरेको जापानको उडान भने निरन्तर रहेको नेपाल एयरलाइन्सले जनाएको छ । हामीलाई कतारमा जस्तै प्रवेशमा रोक लगाउने निर्णय भयो भने हामी पनि रोक्दै जान्छौँ, अहिले कतारबाहेक अन्यत्र भने रोकिएको छैन, नेपाल एयरलाइन्सका महाप्रबन्धक गणेश चन्दले भने ।

प्रकाशित मिति: मंगलबार, फागुन २७, २०७६ १४:४२