थ्रीस्टार आहा रारा गोल्डकपको सेमिफाइनलमा

A+ A A-

१८औँ संस्करणको आहा रारा गोल्डकपमा थ्री स्टार क्लब सेमिफाइनल प्रवेश गरेको छ । गोल्डकपको तेस्रो क्वार्टरफाइनलमा सोमबार पाहुना टोली गान्तोक सिटी एफसी भारतलाई पाखा लगाउँदै थ्री स्टार सेमिफाइनल प्रवेश गरेको हो ।

पोखरा रङ्गशालामा भएको खेलमा गान्तोक सिटीलाई थ्री स्टारले ३–० गोल अन्तरले पराजित गरेको हो ।थ्री स्टारको जीतमा सन्जोग राईले १ गोल गर्दा सुशन श्रेष्ठले २ गोल गरेका थिए । खेलको ७८औँ मिनेटमा सन्जोगले दिपेश घलेको पासमा बललाई जाली चुमाएका थिए ।

यस्तै, खेलको अतिरिक्त समयमा सुशनले २ गोल गर्दै थ्री स्टारको जीत सुनिश्चित गरे ।

१३ वर्षअघि थ्रीस्टारले फागु पूर्णिमाकै दिन पाँचाैँ आहा गोल्डकपको फाइनल खेलेको थियो । १८औं संस्करणको आहा रारा गोल्डकपको क्र्वाटरफाइनल खेल्दा पनि थ्रीस्टारले फागु पूर्णिमाकै दिन जित हात पार्न सफल भएको थियो ।

यस्तै, आज फागु पूर्णिमाकै दिन पुनः थ्रीस्टारले पाहुना टोली गान्तोक फुटबल क्लबलाई ३–० गोलले पराजित गर्दै सेमिफाइनल प्रवेश गरेको हो ।

१३ वर्षअघिको पाँचौँ आहाको फाइनल फागु पूर्णिमाकै दिन हुँदा थ्रीस्टारले मनाङ मस्र्याङ्दीलाई पेनाल्टी सुटआउटमा पराजित गर्दै उपाधि जितेको थियो । पाहुना टोलीले थ्रीस्टारलाई पहिलो हाफ गोलरहित बराबरीमा रोक्दै उत्कृष्ट लय प्रस्तुत गरेको थियो ।

सहारा क्लबको आयोजना पोखरा रंगशालामा सञ्चालित तेस्रो क्र्वाटरफाइनलमा खेलको आठौँ मिनेटमा मिक्छेन तामाङको कर्नरमा अनन्त तामाङको हेडर बाहिरिँदा रुस्लान थ्री स्टारले महत्त्वपूर्ण अवसरलाई गुमाउन पुग्यो ।

२१औं मिनेटमा मिक्छेन तामाङको फ्रिकिकमा कप्तान विक्रम लामाको हेडर बाहिरिँदा थ्री स्टारले खेलमा अग्रता लिनबाट फेरि चुक्यो । लगत्तै मिक्छेन तामाङको कर्नरमा अनन्तको हेडर बाहिरियो । ४३औँ मिनेटमा डन छिरिङ लेप्चाको फ्रिकिक पोस्टबाट थोरै बाहिरिँदा गान्तोक सिटीले अग्रता लिने अवसर गुमायो ।

६४औँ मिनेटमा डन छिरिङ लेप्चाको फ्रिकिकमा छिरिङ लेन्डुप भुटियाको हेडर पोस्टबाट थोरै बाहिरिँदा ग्याङ्तोकले अग्रता लिने अवसर गुमायो । थ्री स्टारले सेमिफाइनलमा नेपाल पुलिस क्लबसँग खेल्नेछ । पुलिसले क्वार्टरफाइनलमा घरेलु क्लब सहारालाई टाइब्रेकरमा पराजित गर्दै सेमिफाइनलमा आफ्नो स्थान पक्का गरेको थियो । थ्री स्टार र पुलिसको खेल यही २८ फागुनमा हुनेछ ।

यसअघि आइतबार भएको दोस्रो क्वार्टरफाइनलको खेलमा मनाङ मस्र्याङ्दी क्लबले झापा– ११ लाई पराजित गर्दै सेमिफाइनलमा स्थान बनाएको छ । पहिलो क्वार्टरफाइनलमा भने पुलिस सहारामाथि हावी भएको थियो ।

सहारा क्लबको आयोजना र रारा चाउचाउको प्रायोजनमा फागुन २२ देखि चलिरहेको प्रतियोगिता १ चैतसम्म चल्नेछ । १० टोलीको सहभागिता रहेको प्रतियोगितामा विजेता टोलीले १० लाख १ हजार रुपैयाँ पुरस्कार पाउँदा उपविजेताले ५ लाख १ हजार पाउनेछन् ।

प्रकाशित मिति: सोमबार, फागुन २६, २०७६ १८:३६