सार्वजनिक जग्गा मिचेर घर, कारबाही भएन

A+ A A-

अरूले सार्वजनिक जग्गा मिचेर घर बनाउँदा आफ्नो जग्गामा मात्र सडक बनेको भन्दै सैनामैना– ४, सिसौडाँडाका कृष्णबहादुर थापाले सडकमै पर्खाल लगाइदिएका छन् ।

आफ्नो जग्गा मिचेर बनाइएको सडकमा पर्खाल लगाएपछि सैनामैनाको मुर्गिया–सिसौडाडा सडक अवरुद्धसमेत भएको छ । सिसौडाँडामा सार्वजनिक जग्गा अतिक्रम हुँदासमेत स्थानीय तहले त्यसको बचाउका लागि कुनै कदम चाल्न सकेको छैन ।

रूपन्देहीको सैनामैना नगरपालिका– ४, सिसौडाँडाँमा सार्वजनिक जग्गा मिचेर ४ जनाले घर बनाएको पाइएको छ । मुर्गिया–सिसौडाँडाको सडक बाटोमा उनीहरूले सार्वजनिक जग्गा अतिक्रमण गरेर घर बनाएका हुन् ।

सिसौडाँडामा हाल कि.नं. २३२ को सार्वजनिक बाटो कि.नं. १७७०, कि.नं. ५१५, कि.नं. १३६९, कि.न. १३७०, कि.नं. १०६७ र कि.नं ७४० का जग्गाधनीहरूले अतिक्रमण गरी भौतिक संरचना निर्माण गरेका हुन् । पीडित थापाका अनुसार बाटोको जग्गामा तुलसा बस्याल, डिलबहादुर खत्री, लालबहादुर रावल, पदमलाल श्रेष्ठलगायतले भौतिक संरचना निर्माण गरेका छन् ।

सडक मिचेका उनीहरूले जानकारी नपाएर यस्तो भएको जनाएका छन्, जबकि नापीको फिल्डबुकमा स्पष्ट रूपमा नै सडक देखाइएको छ । जग्गाधनी थापाले आफ्नो जग्गा गैरकानुनी तबरबाट अपरहण गर्ने आशंका सिर्जना भएको भन्दै अदालत गुहारेका थिए ।

अदालतले बाटो विस्तार गर्दा ३३६ र २४९५ को जग्गामा बाटो पर्ने गरी बाटो विस्तार नगर्नू, नगराउनू भनी अन्तरिम आदेशसमेत दिएको छ । तर, अदालतको आदेश पालना गर्न स्थानीय सरकारले तदारुकता नदेखाउँदा पीडितले अहिलेसम्म बाटोको आफ्नै जग्गामा वाल लगाएर यतिकै राखेका छन् ।

सडकको जग्गा मिचिएको प्रतिवेदन नापी र अख्तियार दुरूपयोग अनुसन्धान आयोगले समेत दिइसकेको छ । सैनामैना नगरपालिकाले भने सडक मिच्नेलाई नै प्रश्रय दिँदै पीडित थापालाई क्षतिपूर्ति भन्दै धुरको १ लाख रुपैयाँ दिने सहमति गराएको थियो । तर, त्यही सहमतिसमेत कार्यान्वयन नभएपछि उनले सडकमै पर्खाल लगाएका छन् ।

सडक विस्तार गर्ने बाटो रेखाङ्कन कार्य गरिँदा साविकको नापी नक्सामा रहेको बाटो अतिक्रमण गरिएकाले व्यक्तिको जग्गाबाट बाटो विस्तार गर्ने कार्य गरिएको अवस्थामा जग्गाधनीले साविक नक्साको केन्द्रविन्दुलाई आधार मानी बाटो विस्तार गर्नुपर्ने माग पीडित जग्गाधनीको रहेको छ ।

सैनामैना– ४ का वडाध्यक्ष धनबहादुर कार्कीले पुरानो बाटो नक्साभन्दा पश्चिम सरेकाले समस्या भएको बताए । फिल्ड नक्साअनुसार सडक कायम गर्दा आधा दर्जन घर भत्काउनुपर्छ ।

जनप्रतिनिधिले राजनीतिक प्रभावमा परेर सडक मिच्ने घर भत्काउन आनाकानी गरेकाे स्थानीयको भनाइ छ ।

प्रकाशित मिति: सोमबार, फागुन २६, २०७६ १०:५३