राजधानी दाङ लैजान मन्त्रीको ‘तुरुप’ फाल्दै मुख्यमन्त्री पोखरेल

A+ A A-

प्रदेश ५ को राजधानी सार्न मुख्यमन्त्री शंकर पोखरेल नै सक्रिय भएर लागेका छन् । दाङलाई प्रदेशकाे स्थायी राजधानी बनाउन मुख्यमन्त्री पोखरेलले दबाब बढाएका हुन् । दाङलाई दुईतिहाइ समर्थन बटुल्न नेकपाका प्रदेश ५ इन्चार्जसमेत रहेका पोखरेल मन्त्रीको ‘तुरुप’ फाल्ने प्रयासमा छन् ।

आफू निर्वाचनमा उम्मेदवार हुने बेलामा प्रदेशको राजधानी दाङ बनाउने उद्घोष गरेर निर्वाचनमा होमिएका पोखरेल दाङमा राजधानी बनाउनका लागि प्रयत्न गरिरहेका छन् । अस्थायी राजधानी रहेको बुटवलबाट राजधानी सार्ने प्रयास उनले सुरुवातमै गरेका थिए । हुँदै नभएको कानुनमाथि टेकेर राजधानी र नामकरणका लागि विशेष सिफारिस समिति बनाउनु, समितिको म्याद पटक–पटक थप गर्नु, समितिमा सबैलाई भागबन्डा लगाउनु र जिल्लामा गएको टोलीले गर्ने सर्वेक्षणपत्रको संख्या दाङ क्षेत्रमा बढी लैजाने भूमिका पोखरेलकै थियो ।

गत साता मात्र प्रदेश सरकारले स्थापनाको दोस्रो वर्षमा दाङको बेलझुण्डीमा प्रदेश एक्स्पो गरेपछि उनी भित्रभित्रै राजधानीको क्याम्पियनमा समेत लागेका छन् । रुपन्देही वा दाङ कहाँ राजधानी हुने विषय पेचिलो बन्दै गर्दा कपिलवस्तु पनि उत्तम हुन सक्ने समितिले निचोड निकालेको थियो । हालसम्म समितिको प्रतिवेदन सार्वजनिक नभइरहेको अवस्थामा समितिकै सदस्य विष्णु पन्थीले कपिलवस्तु राजधानी प्रस्ताव गरिएको भन्दै प्रचार गरे । किनकि उनी कपिलवस्तुका सांसद हुन् ।

प्रदेश सरकार गठन भएपछि पन्थी अर्थमन्त्री बन्ने चर्चा थियो । तर, मुख्यमन्त्री शंकर पोखरेलले अर्थ मन्त्रालय आफ्नै मातहातमा राखेपछि उनी जिल्ल परे । हाल उनी मुख्यमन्त्री शंकर पोखरेलसँगै जिल्ला दौडको कार्यक्रममा सहभागी भइरहेका छन् । शक्तिको वरपर दौडेर मन्त्री पद पाउने भएपछि कपिलवस्तुको जनमत शंकरपोखरेललाई सुम्पिने ध्यानमा पन्थी लागेका छन् ।

मुख्यमन्त्री पोखरेलले अर्घाखाँचीका चेतनारायण आचार्यलाई पनि मन्त्री पद दिने र त्यहाँको मत दाङको पक्षमा पार्ने चलखेलसमेत गर्न खोजेको स्रोतले बताएको छ । यस्तै, प्युठानका हरि रिजाललाई पनि मन्त्री बनाउने प्रयास पोखरेलले गरेका छन् ।

त्यति मात्र होइन, प्युठानको मतसमेत दाङको पक्षमा पार्न पोखरेलले लविङ गरिरहेको स्रोतको भनाइ छ । हाल कायम रहेका मन्त्रालयहरू टुक्र्याएर मन्त्री पद दिने र दाङ राजधानी बनाउने लविङ पोखरेलको छ ।

गुल्मीका सुदर्शन दाङको पक्षमा

यता सामाजिक विकासमन्त्री सुदर्शन बराल भने बारम्बार दाङ नै राजधानी हुने बताउँदै आएका छन् । गुल्मीका सुदर्शन बराल तत्कालीन माओवादी कोटाबाट मन्त्री बनेका हुन् । नेकपाका नेता वर्षमान पुनकै कारण सामाजिक विकासमन्त्री बनेका सुदर्शन पुनकै आग्रहमा दाङ राजधानी भन्दै लविङ गरेका हुन् ।

उनले त व्यक्तिगत भेटघाटमा बुटवल राजधानी हुँदैन, दाङ नै हुन्छ भन्ने गरेका छन् । सँगसँगै उनले साना दलहरूलाई पनि लोभको हतियार प्रयोग गर्ने तयारीमा रहेको मुख्यमन्त्री निकट स्रोत बताउँछ । सद्भावना पार्टीका ५ सांसद, जनमोर्चा र राजपाका १/१ सांसदलाई पनि कार्यक्रम र योजना दिएर आफ्नो पक्षमा ल्याउन कसरत गरिरहेका छन् ।

नागरिक समाज भन्छ : सामान पोका पार्न दिइँदैन

राजधानी सार्ने चलखेल सुरु भएपछि यस क्षेत्रका नागरिक समाजले मन्त्रालयहरूलाई सामान पोका पार्न नदिने र संघर्ष नै गर्ने चेतावनी दिएका छन् । भूकम्पले थलिएको भवनमा जोखिम मोलेर संघसंस्थाहरू बसेको र भवन प्रदेशलाई दिएको भन्दै उनीहरूले राजधानी अन्यत्र सार्ने प्रयास नगर्नसमेत चेतावनी दिँदै आएका छन् ।

रुपन्देही उद्योग वाणिज्य संघका अध्यक्ष खेम हमाल रुपन्देही सामाजिक, आर्थिक, पूर्वाधार सबै हिसाबले सम्पन्न भएको भन्दै राजधानी सार्न नदिने बताउँछन् । उनी प्रदेश सरकारका लागि आफूहरूले भवनहरू उपलब्ध गराएको भन्दै राजधानी सार्ने चलखेलविरुद्ध संघले आन्दोलन नै गर्ने बताउँछन् । रुपन्देही व्यापार संघका अध्यक्ष यमलाल लोहनी पनि मुख्यमन्त्री पोखरेलले पूर्वाधार अभाव देखाउँदै राजधानी सार्न चलखेल गरेको बताउँछन् ।

रुपन्देही उद्योग संघका अध्यक्ष बाबुराम बोहोरा मन्त्रालय र सरकारका लागि आफूहरूले भवन त्याग गरेर बसेको भन्दै राजधानीका बारेमा नेताहरूले साथ दिए आन्दोलनको नेतृत्व संघले गर्ने बताउँछन् ।

संघका पूर्वअध्यक्ष एजाज आलम साविक लुम्बिनी अञ्चलका नेताहरूलाई बुटवलमा स्थायी राजधानी बनाउनुपर्ने प्रस्ताव संसदमा छिटो प्रस्तुत गर्न र त्यसको नेतृत्व लिन आग्रह गर्छन् । पश्चिम नेपाल बस व्यवसायी प्रा.लि.का अध्यक्ष दधिराम खरेलले यातायातको सुगमताका दृष्टिकोणले रुपन्देही राजधानीका लागि उपयुक्त भएको बताउँछन् ।

यस्तो छ अंक गणित, कुन जिल्लाबाट कति सांसद ?

८७ जना सांसद रहेको प्रदेश ५ मा दुईतिहाइ समर्थनका लागि ५८ जनाको समर्थन चाहिन्छ । प्रदेश नम्बर ५ मा नेकपाका ६१, कांग्रेसका १९, संघीय समाजवादी फोरम ५, राजपा र राष्ट्रिय जनमोर्चाका १–१ जना सांसद छन् ।

जिल्लागत विवरणअनुसार नवलपरासी पश्चिममा ५ जना, रुपन्देहीमा १९ जना, कपिलवस्तुमा १२ जना, पाल्पामा ७ जना, गुल्मीमा ५ जना, अर्घाखाँचीमा ४ जना, प्युठानमा ३ जना, रोल्पामा २ जना, रुकुम पूर्वमा ३ जना, दाङमा १० जना, बाँकेमा ९ जना र बर्दियामा ८ जना सांसदले प्रदेशसभामा प्रतिनिधित्व गर्छन् ।

प्रकाशित मिति: आइतबार, फागुन २५, २०७६ १९:०८